Ra Jesús bim pä a nꞌda ora bʉ ja ra nyuni
9
Nɛ manꞌda bi xi ʉ, bi ꞌyɛ̨mbi:―Majuąni dí xi ahʉ, ꞌbʉ i ꞌda ahʉ ngue hin gni tuhʉ ꞌbʉ bi dʉꞌmi di manda ua rá tsꞌɛdi Oją.
2 Nuꞌbʉ mi thoꞌa nꞌdato pa xím man ra Jesús na, bi zixa ra Pedro nɛꞌa ra Jacobo nɛ ra Xuua bʉ maꞌueni bʉ bí ja nꞌda ra tꞌøhø xʉn hɛ̨tsꞌi. Nuꞌbʉ mí zøm bʉ, bi nu yʉ́ xädi bim päꞌa ra Jesús. 3 Nɛ rá pahni bim pädi bi fɛxni, nɛ ɛ̨mmɛ bi tꞌaxqui xinda gueꞌʉ gätho miꞌda tꞌɛ̨mbi xʉn tꞌaxi. 4 Nɛ bi nɛqui bʉ ra Elías nꞌyoui ra Moisés, bin yąhʉ ra Jesús, mi ꞌbʉh mayaꞌbʉ ʉ. 5 Nu ra Pedro bʉya bi xih ra Jesús:
―Ma xänbate i, xʉn ho ngue gätho dí ꞌbʉhmbʉ ua ya, bi ꞌyɛ̨na. Ga høhmbe hyu yʉ tꞌʉngu. Nꞌdaꞌe nɛ nꞌda Moisés, nɛ nꞌda Elías, bi ꞌyɛ̨na.
6 Ngubʉ bi ma nguetho him mi pądi ꞌbɛꞌa bi ma nguetho ɛ̨mmɛ bi mbidi. 7 Nɛ nubʉya, bá ɛ̨h yʉ güi bi gompꞌʉ mi ꞌbä ʉ nɛ bi ꞌyø a nꞌda ra nde ʉ ngue bin yą bʉ ja yʉ güi, bi ꞌyɛ̨na:
―Guehna ma Tsꞌʉntꞌʉ ɛ̨mmɛ dadí huɛ̨qui, dami ꞌyømanhohʉ ꞌbɛꞌa da man na, bi ꞌyɛ̨n a ra nde bin yą.
8 Nɛ nuꞌbʉ min hanni ʉ yʉ́ xädi ra Jesús, njon mam bi nu, høntꞌa ra Jesús bi nu i ꞌbäpʉ.
9 Nɛ nuꞌbʉ mi gąpʉ ja ra tꞌøhø, bi ꞌyɛ̨mpꞌʉ yʉ́ xädi ngue njoꞌo to da xifi ꞌbɛꞌa xi nu bʉ, jagueꞌbʉ bi dąmbɛ̨nisɛ a ra Jesús gue nuꞌa bin jąꞌi ua ja ra ximhäi a. 10 Janangue a bi bɛ̨ntho a ram hma bi sifi nɛ him bi ma. Nɛ bin ꞌyänzɛhɛ nɛ bin ꞌyɛ̨mpꞌʉ:
―Bɛꞌa ní mba a ram hma bi ma ra Jesús ngue da dąmbɛ̨ni.
11 Nɛ bi ꞌyänꞌna ra Jesús ʉ bʉya:
―ꞌBɛꞌa ní mba a i man yʉ xänbate niją ngue jatho duam ꞌbɛtꞌo ra Elías nɛ mꞌbɛjua ra Cristo, bi ꞌyɛ̨mbi.
12 Mi dą a ra Jesús, bi ꞌyɛ̨mpꞌʉ:
―Majuąni im man ʉ, bam ꞌbɛtꞌo ra Elías di hoqui gätho ꞌbɛꞌa ja ua. Nɛ ha guím bɛ̨mhbʉ ꞌbɛꞌa man rám hman Oją ngue din ja bʉya, ngue da zøh manꞌda din jąꞌi ua ja ra ximhäi, da nu xʉn ngu ran ʉnbi nɛ da tꞌɛ̨mbi nte di muui. 13 Pɛ dí xi ahʉ ngue bi zøcua a gue bi thocpa rá ꞌbɛfi ra Elías, nɛ bi ꞌyørpe gätho mí ndesɛ yʉ jąꞌi da ꞌyørpe, tengu ntꞌoꞌtꞌi nangue a, bi ꞌyɛ̨na.
Ra Jesús bi hocꞌa nꞌda ra tꞌʉhni min ꞌyoui ra zįthu
14 Nɛ nuꞌbʉ mi zøpʉ ꞌbʉh miꞌda yʉ́ xädi bi nu nꞌda muntsꞌi yʉ jąꞌi ngue madi thɛ̨ꞌtsꞌʉ. Nɛ nuꞌʉ ꞌda yʉ xänbate niją ngue madin junthʉ yʉ́ xädizɛhɛ ra Jesús. 15 Gätho yʉ jąꞌi mi ꞌbʉpʉ bi hyonya thoho ꞌbʉ min nu ba ɛ̨pʉ ra Jesús nɛ bin ꞌyɛ̨mpꞌʉ: “Bɛꞌa din ja ya.” Nɛ ꞌbex bin tihi bi mba bí zɛngua. 16 Nɛ nu ra Jesús bi ꞌyänꞌdʉ nɛ bi ꞌyɛ̨mpꞌʉ:
―ꞌBɛꞌa gue gnín junthʉ, bi ꞌyɛ̨mpꞌʉ.
17 ꞌBex bi dą a nꞌda ran ꞌyohʉ mín ꞌyohʉ yʉ jąꞌi:
―Xänbate i, nugä bá sigä ua nꞌda ma tsꞌʉntꞌʉ ngue in ꞌyoui ra zįthu di japi i gore. 18 Nɛ hønbʉ go hapʉ i sitsꞌi, nɛ i huąꞌtsꞌi, nɛ i pøn yʉ fʉgui rá nde bʉya. Nɛ di cuxtꞌ yʉ́ tsꞌi nɛ di bøcabi. Nɛ dá xi ʉ ni xädi bʉya gue da hyønba thi ra zįthu pɛ him bi zä, bi ꞌyɛ̨nꞌa.
19 Nuꞌa ra Jesús bi ꞌyɛ̨mpꞌa:
―Nuꞌehʉ guexta a hin guí ɛ̨cꞌyɛihʉ ꞌbɛꞌa dí xi ahʉ. Haꞌmi pa ngue ga tøpꞌa thoho ahʉ ngue gui ꞌyɛ̨cꞌyɛigahʉ. Nuꞌa ni tsꞌʉntꞌʉ ba singa ya, bi ꞌyɛ̨nꞌa ra Jesús.
20 Bá tsꞌi bʉya. Nuꞌa ra zįthu ꞌbʉ mi nu ra Jesús ꞌbex bi dɛxa häi ra tsꞌʉntꞌʉ min ꞌyoui. Nɛ nuꞌbʉ mi zo bʉ häi din dąn bʉya, nɛ i pøn yʉ fʉgui rá nde. 21 Nu ra Jesús bi ꞌyänꞌna rá ta ra tsꞌʉntꞌʉ:
―Man jąmꞌbʉ bi mbʉdi.
Bi dą a rá ta ra tsꞌʉntꞌʉ bʉya:
―Bi mbʉ ꞌbʉ min tꞌʉhni. 22 Nɛ xʉn ngu yʉ nįdi di japi i apʉ ja ra sibi nɛpʉ po ra dehe ꞌbʉ i ꞌyo bʉ, i nde dí du a. Nuꞌbʉ da zä, dami zɛcꞌbe gui huɛ̨gaꞌbe, bi ꞌyɛ̨mbi.
23 Nu ra Jesús bi dądi:
―Hąhą, nuꞌbʉ guí ɛ̨cꞌyɛi gue i ja ma tsꞌɛdi. Gätho din ja a da nde nꞌda ra jąꞌi ꞌbʉ i ɛ̨cꞌyɛi i ja rá tsꞌɛdi Oją, bi ꞌyɛ̨mbi.
24 Nuꞌa rá ta ra tꞌʉhni ꞌbex bi dąti ntsꞌɛdi:
―Majuąni dí ɛ̨cꞌyɛi pɛ dami jaqui manꞌda ga ɛ̨cꞌyɛi xʉn ho, bi ꞌyɛ̨na.
25 Nɛ min nu ra Jesús, manꞌda ni zøtho yʉ jąꞌi, janangue a ꞌbex bi hyøn a thi ra zįthu min ꞌyoui ra tsꞌʉntꞌʉ, bi ꞌyɛ̨mbi:
―Grá gore zįthu nɛ grá gogu, dami pøm bʉ nɛ him man gui cʉrpʉ rá mbʉi na ra tsꞌʉntꞌʉ, bi ꞌyɛ̨mbi.
26 Nɛ nuꞌa ra zįthu bi mbafi nɛ ntsꞌɛdi bi huąspa rá jąꞌi ra tꞌʉhni, nɛ bi bøm bʉya. Nuꞌa ra tꞌʉhni bi gohi tengu ꞌbʉ xi du. Nɛ xʉn ngu ʉ ɛ̨na: “Bi du.” 27 Pɛ nuꞌa ra Jesús bi bɛnba rá ꞌyɛ, nɛ bi xotsꞌi, nɛ bim ꞌbäh ra tꞌʉhni bʉya.
28 Nɛ bi mbähä yʉ́ xädi ra Jesús bʉ ja ra ngu bʉya. Nuꞌbʉ mi zøm bʉ bi ꞌyän bʉ maꞌueni tsꞌʉ:
―Hanja him bi zä dá hømhbe thi ra zįthu min ꞌyoui ra tꞌʉhni, bi ꞌyɛ̨nꞌʉ yʉ́ xädi.
29 Nɛ nu ra Jesús bi ꞌyɛ̨mpꞌʉ:
―Nuna ra zįthu tengu na, hin da zä gui hyømhbʉ thi ꞌbʉ hinga mꞌbɛtꞌo gui ꞌyɛꞌtꞌ nin sihmɛhʉ nɛ ɛ̨mmɛ gan yąhʉ Oją, bi ꞌyɛ̨mpꞌʉ yʉ́ xädi ra Jesús.
Ra Jesús im ma mahønꞌa rán dąte
30 Nuꞌbʉ mi bøm bʉ ra Jesús nɛ yʉ́ xädi, bi mbähä bʉ Galilea, nɛ nu ra Jesús njom bi ndepe da bądi ngue i ꞌyo bʉ. 31 Nguetho mí xänba yʉ́ xädi nɛ mí ɛ̨mbi:
―Nugä nque dán jąꞌigä ua ja ra ximhäi, da mba ma dägä bʉ ja yʉ́ ꞌyɛ yʉn ꞌyohʉ nɛ da thogä. Nɛ nuꞌbʉ dá tu, ga thąmbɛ̨nigä ꞌbʉ na hyupa. 32 Pɛ nu yʉ́ xädi him bi bądi ꞌbɛꞌa nam bønꞌa bi ma nɛ mí su da ꞌyänni.
Nuꞌa i nde dim ꞌbɛtꞌo din ꞌyɛ̨hɛ thoho a
33 Nɛ bi zøm bʉ Capernaum bʉya. Nɛ nuꞌbʉ mi zøm bʉ ja yʉ́ ngu, nu ra Jesús bi ꞌyän ꞌdʉ yʉ́ xädi:
―ꞌBɛꞌa gnín junthʉ bʉ ꞌyu.
34 Nɛ him bi dą ʉ nguetho xin junt pʉ ꞌyu, xin ꞌyänni nangueꞌa toꞌo dim ꞌbɛtꞌo. 35 Nuꞌbʉ min säya ra Jesús,
―Bá thąmhbʉ ua, bi ꞌyɛ̨mpꞌʉ ꞌdɛꞌmayoho yʉ́ xädi. Nɛ nubʉya bi ꞌyɛ̨mpꞌʉ:
―Toꞌo nde di ngʉrbi da ꞌyøtꞌe ngue dim ꞌbɛjua thoho nɛ din ꞌyɛ̨hɛ nangue gätho ʉ miꞌda, bi ꞌyɛ̨nꞌa ra Jesús.
36 Nɛ nubʉya bi japi dim ꞌbä inde nꞌda ra tꞌʉhni, nɛ bi dospa rá xįxi nɛ bi ꞌyɛ̨mpꞌʉ:
37 ―Nuꞌa teꞌo i simanho nꞌda ra tꞌʉhni nangue ma thuhugä, nɛcä i simanhogui. Nɛ nuꞌa toꞌo i simanhogui, hinga høngdä i simanhogä a pɛ nɛꞌa Oją bá pɛngä ua i simanho a, bi ꞌyɛ̨n a ra Jesús.
Nuꞌa i tɛn rá tsꞌɛdi ra Jesús rám fätsꞌiui a
38 Nu ra Xuua bi ꞌyɛ̨mpꞌa ra Jesús:
―Xänbate i, xtán nuhe nꞌda ran ꞌyohʉ i ndønꞌna ni thuhu ꞌbʉ i høn a thi yʉ zįthu in ꞌyoui ꞌda yʉ jąꞌi, nɛ dá hɛcpahe, nguetho hin dín ꞌyohʉ.
39 Pɛ nu ra Jesús bi ꞌyɛ̨mpꞌʉ:
―Ndeꞌbʉ hin xqui hɛcpahʉ nguetho hin di cꞌąmanꞌʉgä toꞌo øtꞌ yʉn tꞌøtꞌe mixte nangue ma tsꞌɛtigä. 40 Nɛ nuꞌʉ toꞌo i ꞌbʉi ngue him man sʉihʉ, gueꞌʉ mam fätsꞌihʉ ʉ. 41 Høntꞌa go teꞌo di ꞌda ahʉ tsꞌʉ ra dehe ngue i pądi guí tɛngahʉ, majuąni dí xi ahʉ i ja ꞌbɛꞌa di un Oją a nangue ran ho bi ꞌyøtꞌahʉ, bi ꞌyɛ̨n a ra Jesús.
Nuꞌa da ꞌyøtꞌ ran tsꞌo xʉn ngu ran ʉnbi da nu a
42 Nɛ xø bi ꞌyɛ̨nꞌa ra Jesús:
―Høntꞌa teꞌo di ꞌbɛpi da ꞌyøtꞌ ran tsꞌo nꞌda ra tꞌʉhni i ɛ̨cꞌyɛigui, xʉn ʉtho ran tsꞌɛmbi da nu a. Manꞌda xʉn ʉ xinda gueꞌbʉ da thurpi rá ꞌyʉga bʉ ja ra do ngue ra jʉni xʉn hyʉ, nɛ da tꞌɛn bʉ mbonthe ja ra deją. 43 Nuꞌbʉ ni ꞌyɛhʉ di ja ahʉ gui ꞌyøthʉ ran tsꞌo, xʉn ho ꞌbʉ gui ꞌyøthʉ tengu ꞌbʉ gui hyɛjʉ. Madague gan doꞌyɛhʉ pɛgue gui tįmhbʉ ra te maząi, xinda gueꞌbʉ di ja yoho ni ꞌyɛhʉ nɛ gui nuhʉ ran ʉnbi maząi guepʉ ja ra sibi njąmꞌbʉ i huɛ̨tꞌi. 44 Xʉn ʉtho guin nuhʉ bʉ ꞌbʉ, tengu tho ꞌbʉ i sa a ni ngøhʉ yʉ zuꞌuɛ̨, nɛ njąmꞌbʉ din hɛ̨ a dí zapi gätho yʉ pa, nɛ tengu ꞌbʉ nꞌda ra sibi njąmꞌbʉ da huɛ̨tꞌi.
45 O nuꞌbʉ ni guahʉ di ja ahʉ gui ꞌyøthʉ ran tsꞌo, xʉn ho ꞌbʉ gui ꞌyøthʉ tengu ꞌbʉ gui hyɛjʉ. Madague gan doguahʉ pɛgue gui tįmhbʉ ra te maząi xinda gueꞌbʉ di ja yoho ni guahʉ nɛ gui nuhʉ ran ʉnbi maząi. 46 Xʉn ʉ tho guin nuhʉ bʉ ꞌbʉ, tengu tho nꞌda ra du ngue ꞌbʉh yʉ́ zuꞌuɛ̨ sap yʉ́ ngø nɛ njąmꞌbʉ din hɛ̨ a ni zapi gätho yʉ pa, nɛ tengu ꞌbʉ nꞌda ra sibi njąmꞌbʉ da huɛ̨tꞌi.
47 O nuꞌbʉ ni dähʉ di ja ahʉ gui ꞌyøthʉ ran tsꞌo, xʉn ho ꞌbʉ gui ꞌyøthʉ tengu ꞌbʉ gui hyąhmbʉ. Madague gan ꞌdadä thohohʉ, pɛgue gui cʉthʉ bʉ di manda rá tsꞌɛdi Oją, xinda gueꞌbʉ di ja yoho ni dähʉ nɛ gui nuhʉ ran ʉnbi maząi. 48 Xʉn ʉ tho guin nuhʉ bʉ ꞌbʉ, tengu tho nꞌda ra du ngue ꞌbʉh yʉ́ zuꞌuɛ̨ sap yʉ́ ngø nɛ njąmꞌbʉ din hɛ̨ a ni zapi gätho yʉ pa, nɛ tengu ꞌbʉ nꞌda ra sibi njąmꞌbʉ da huɛ̨tꞌi.