Ra Jesús bi un ran tsꞌihmɛ ʉ goho mahuąhi
8
Nuꞌʉ yʉ pa ʉ, xʉn ngu yʉ jąꞌi bim pɛti mahønꞌa bʉ maꞌueni mi ꞌbʉh ra Jesús, nɛ nte mi ja bʉ ꞌbɛꞌa da zi, nguetho maꞌueni bʉ. Janangue a bi zohnꞌdʉ yʉ́ xädi ra Jesús nɛ bi ꞌyɛ̨mpꞌʉ:2 ―Nhuɛ̨cate tho yʉ jąꞌi nguetho ná hyupa dí ꞌbʉhmbʉ ua ya, nɛ hinꞌyʉ da zi. 3 Nɛ nuꞌbʉ ga pɛnpʉ yʉ́ ngu yʉ jąꞌi ngue ban sihmɛ bʉ masque da güent ra thuhu bʉ ꞌyu nguetho nuꞌʉ ꞌda yabʉ bá nɛtsꞌi, bi ꞌyɛ̨n a ra Jesús.
4 Bi dą ʉ yʉ́ xädi bʉya:
―Maꞌueni ua, hapʉ da zä da thįn a da zi ya ꞌbʉcua.
5 Nu ra Jesús bi ꞌyänꞌdʉ:
―Hangu yʉ hmɛ guí cʉhʉ, bi ꞌyɛ̨mpꞌʉ.
―Yotomhmɛ, bi ꞌyɛ̨n ʉ.
6 Nu ra Jesús bʉya bi xifi da hyupʉ häi yʉ jąꞌi. Nɛ bi hyąn ʉ yotomhmɛ bi ꞌyäp ra jamadi Oją nɛ bi xɛm bʉya, bi unꞌdʉ yʉ́ xädi di darpa ʉ yʉ jąꞌi i hupʉ. 7 Nɛ yʉ tꞌʉhuą mi cʉ ʉ, bi jąpi nɛ bi unꞌdʉ yʉ́ xädi bʉya bi darpa yʉ jąꞌi hupʉ. 8 Gätho bin sihmɛ ʉ nɛ bin niyą xʉn ho. Nɛ nuꞌbʉ mi mba ma pɛti ʉ bi bongui, bin ja yoto ꞌbøtsꞌe. 9 Nɛ nuꞌʉ bin sihmɛ mi juaꞌi goho mahuąhi. Nɛ nubʉya, bi xih yʉ jąꞌi da mba yʉ́ ngu. 10 Nɛ bi yʉrpʉ ja ra mbosa ra Jesús bʉya nɛ yʉ́ xädi, bi zøm bʉ ra häi Dalmanuta.
Yʉ fariseo i äp ra hmɛpya a ra Jesús
11 ꞌBex bi zøm bʉ yʉ fariseo bʉya bi zä ra Jesús ꞌbʉ majuąni Oją bi un rá tsꞌɛdi nɛ bi ꞌyäp yʉ hmɛpya mahɛ̨tsꞌi. 12 Pɛ nu ra Jesús bin gąꞌtsꞌi, bi du rá mbʉi nguetho guextaꞌa hingui ɛ̨cꞌyɛi gue ja rá tsꞌɛdi, nɛ bi ꞌyɛ̨mpꞌʉ:
―Hanja ngue guextaꞌa guí äjʉ yʉ hmɛpya. Majuąni dí xi ahʉ hin te ma hmɛpya ga utꞌahʉ ya.
13 Nɛ bi zopʉ ʉ bʉya, bi mba bi yʉrpʉ ja ra mbosa mahønꞌa ʉ, bi mba bʉ ꞌdanguadi.
Yʉ́ xädi ra Jesús bi xifi di jamansu nangue yʉ́n xädi yʉ fariseo
14 Pɛ nu yʉ́ xädi ra Jesús bi pumbɛ̨ni him bi hyąx ra hmɛ. Nɛ høntꞌa zi nꞌdam hmɛ mi o bʉ ja ra mbosa. 15 Nꞌda ran tꞌuti bi xih yʉ́ xädi ra Jesús nɛ bi ꞌyɛ̨mbi:
―Dami jamansuhʉ nangue rá íxi yʉ fariseo nɛ rá íxi ra Herodes, bi ꞌyɛ̨mpꞌʉ.
16 Pɛ yʉ́ xädi bʉya sä bin ꞌyɛ̨mzɛhɛ nꞌda ngu nꞌda ʉ:
―Masque i xijʉ nguetho him bá hąhʉ ra hmɛ.
17 Pɛ nu ra Jesús ꞌbex bi bądi ngue him mi pą ʉ ngue gueꞌʉ yʉ́n tꞌøtꞌe yʉ fariseo nɛꞌʉ mi tɛn ra Herodes bi xifi, nɛ bi ꞌyɛmpꞌʉ:
―Ha gueꞌa gnín ꞌyänhdʉ a, ngue nte bá hąhʉ ra hmɛ. Hin gadin ꞌyomfɛ̨nihʉ, xʉm mɛ tho ni mbʉihʉ. 18 Ja ni dähʉ nɛ hin guím bɛ̨mhbʉ ꞌbɛꞌa gá nuhʉ, ja ni zaguhʉ nɛ hin guím bɛ̨mhbʉ a gá ꞌyøhmbʉ. 19 Nɛ nuꞌbʉ má xɛngä cʉtꞌa yʉ hmɛ dá japi bin xąndi janague bin niyą xʉn ho cʉtꞌa mahuąhi dá ꞌuįngä, haꞌmi ꞌbøtsꞌe yʉ xɛqui gá pɛthʉ thą.
Nɛ bi ꞌyɛ̨n ʉ:
―ꞌDɛꞌmayo ꞌbøtsꞌe.
20 Nɛ nuꞌbʉ má xɛngä yoto yʉ hmɛ dá japi bin xąndi janangue a bin niyą xʉn ho goho mahuąhi dá ꞌuįngä, haꞌmi ꞌbøtsꞌe gá pɛthʉ yʉ xɛqui thą.
Nɛ bi ꞌyɛ̨nꞌʉ:
―Yoto ꞌbøtsꞌe.
21 ―Ha guextaꞌa hin guí pąhmbʉ a dím mangä, bi ꞌyɛ̨nꞌa ra Jesús.
Ra Jesús bi hocꞌa nꞌda ra xädä bʉ ra hnini Betsaida
22 Nuꞌbʉ mi zøm bʉ ra hnini Betsaida ra Jesús nɛ yʉ́ xädi, ꞌbex bá tsꞌinba nꞌda ra xädä, nɛ bi tꞌäp ra mate da dädi. 23 Nu ra Jesús bʉya bi bɛnba rá ꞌyɛ ra xädä nɛ bi zix bʉ maꞌueni tsꞌʉ ra hnini. Bi zorpa yʉ́ dä nɛ bi därpa yʉ́ xidä, nɛ nubʉya bi ꞌyän ꞌbʉ in nu tsꞌʉ ran nɛqui. 24 Nɛ nuꞌbʉ min hanni ra xädä bi ꞌyɛ̨na:
―Dín nugä yʉ jąꞌi ya, ɛ̨na yʉ za, pɛ i ꞌyo, bi ꞌyɛ̨na.
25 Nɛ bi därpa yʉ́ dä mahønꞌa nɛ bi japi bi nu xʉn ho ran nɛqui bʉya. 26 Nɛ nu ra Jesús bʉya bi mbɛnpʉ rá ngu bi ꞌyɛ̨mbi:
―Hin gui mba bʉ hnini nɛ njoꞌo to gui xifi nangue a dá øtꞌeꞌe, bi ꞌyɛ̨mpꞌa mí xädä.
Ra Pedro bi ma gue gueꞌa rá Thahni Oją a ra Jesús
27 Nɛ nuꞌbʉ mi bøm bʉ ra hnini Betsaida a ra Jesús nɛ yʉ́ xädi, bi mbähä bʉ ja yʉ hnini ra xɛqui Cesarea Filipo. Nuꞌbʉ mi mba bʉ ꞌyu bi ꞌyänꞌndʉ yʉ́ xädi nɛ bi ꞌyɛ̨mpꞌʉ:
―ꞌBɛꞌa i man yʉ jąꞌi nanguecä, bi ꞌyɛ̨nꞌa ra Jesús.
28 Nɛ nuꞌʉ bi dąti:
―Ɛ̨n ʉ ꞌda yʉ jąꞌi gueꞌe grá Xuua Nxixyą. Nɛ nuꞌʉ miꞌda i ɛ̨n ʉ gueꞌe grá Elías. Nɛ miꞌda i ɛ̨n ʉ, gueꞌe ꞌda ʉ yʉ pøngahyą mi ꞌbʉh mayaꞌbʉ, bi ꞌyɛ̨n ʉ yʉ́ xädi.
29 Nu ra Jesús bi ꞌyänzɛhɛ yʉ́ xädi mahønꞌa:
―Xi ahʉ, ꞌbɛꞌa guí mamhbʉ nanguecä.
ꞌBex bi dą a ra Pedro, bi ꞌyɛ̨mbi:
―Nuꞌi gueꞌe grá Cristo, rá Thahni i Oją, bi ꞌyɛ̨nꞌa. 30 Nɛ nuꞌa ra Jesús bi hɛcua yʉ́ xädi ngue hin da ma toꞌo a.
Bi man ra Jesús nangue rán dątezɛhɛ
31 Nu ra Jesús bi dʉꞌmi bi xi ʉ yʉ́ xädi ꞌbɛꞌa da tꞌørpe ngue gueꞌa bin jąꞌi ua ja ra ximhäi a, nɛ bi xiꞌʉ ngue hin da numanho ma ngʉrbihe yʉ dącꞌyɛi, nɛ yʉ ngʉrba mbäją nɛ yʉ xänbate niją, nɛ bi xi ʉ jatho da nu xʉn ngu ran ʉnbi nɛ da tho, nɛ da dąmbɛ̨ni ꞌbʉ ná hyupa. 32 Nɛ bi xifi xʉn ho ꞌbɛꞌa da tꞌørpe, hinꞌyʉ ꞌbɛꞌa bi gønꞌdʉ. Pɛ nu ra Pedro bi zixmanhɛ̨ nɛ bi hɛcpi, bi ꞌyɛ̨mbi:
―Njon gui japi da bɛntꞌi i, damin yąni, bi ꞌyɛ̨mbi. 33 Nu ra Jesús bi hyand bʉ mi ꞌbäh miꞌda yʉ́ xädi ꞌbʉ mi ꞌyɛ̨mpꞌa ra Pedro:
―Dami ꞌuegue nangue ma hmigä grá zįthu Satanás. Nuꞌi hingui sä guim bɛ̨ni tengu im bɛ̨n Oją, høntꞌa guím bɛ̨n a guín nu ua ja ra ximhäi, bi ꞌyɛ̨mbi.
34 Nuꞌa ra Jesús bʉya bi zohnꞌdʉ yʉ jąꞌi nɛ yʉ́ xädi nɛ bi ꞌyɛ̨mpꞌʉ:
Høntꞌa go toꞌo i nde da dɛngui, hin da zän zɛhɛ ꞌbɛꞌa da ꞌyøtꞌe nɛ da hyät yʉn ʉnbi madague da tho, nɛ da bɛ̨ni tengu dím bɛngä. 35 Nguetho nuꞌʉ toꞌo i su da du nanguecä, pɛ gätho yʉ pa da nu ran ʉnbi maząi ʉ, pɛ nuꞌʉ hingui su da du nanguecä nɛ nangue mam hmangä, gätho yʉ pa maząi dim ꞌbʉ ʉ. 36 Hinꞌyʉ ꞌbɛꞌa xʉn ho da nu ʉ yʉ jąꞌi ꞌbʉ xtí pɛti gätho ꞌbɛꞌa i ja ua ja ra ximhäi, nɛ høntꞌa ran ʉnbi maząi da nu ʉ. 37 Hinꞌyʉ ꞌbɛꞌa sä da ꞌyøtꞌa nꞌda ra jąꞌi ngue da ꞌyɛ̨na di pøsɛ rá te, bi ꞌyɛ̨n a ra Jesús.
38 Nɛ xø bi ꞌyɛ̨na:
―Nɛ nuꞌa toꞌo i pɛꞌtsꞌ rá sä nanguecä nɛ nangue mam hmangä bʉ ꞌbʉ ʉ hingui ɛ̨cꞌyɛi Oją, nɛcä ngue dán jąꞌigä ua ja ra ximhäi, xín ga ɛ̨mbi ma tꞌʉhni ꞌbʉ rán zɛgui ra pa a, ꞌbʉ bá pengä mahønꞌa. Nɛ din jagä rá tsꞌɛdi ma Ta bʉ mahɛ̨tsꞌi nɛ gätho yʉ́m ꞌbɛhni ban ꞌyohe ꞌbʉ bá ɛ̨cä mahønꞌa, bi ꞌyɛ̨n a ra Jesús.