Ra Jesús bi ma ndaꞌa dí tsꞌonba rá mbʉi nꞌda ra jąꞌi
7
Nɛ bi nɛxpʉ Jerusalén ꞌda yʉ fariseo nɛ yʉ xänbate niją, bi zøm bʉ mi ꞌbʉh ra Jesús. 2 Nɛ bi nu ʉ ꞌda yʉ́ xädi ra Jesús i sihmɛ nɛ hin nin xʉꞌyɛ tengu rán sʉꞌyɛ bi zänzɛhɛ yʉ́n tꞌɛ̨tizɛhɛ ʉ. Nɛ bi ꞌyɛ̨mbi øt ra tsꞌoqui ʉ. 3 Nguetho nuꞌʉ yʉ fariseo nɛ gätho miꞌda ma mijudíohe ɛ̨mmɛ i tɛndaꞌʉ yʉ́n tꞌɛ̨di yʉ dącꞌyɛi. Nɛ nuꞌbʉ hin nin xʉꞌyɛ tengu man yʉ́n tꞌɛ̨di, ya hin din sihmɛ ꞌbʉ. 4 Nɛ ngutho ꞌbʉ xpá mbenga täi, him ꞌbex gue i sihmɛ, ꞌbɛ din xʉꞌyɛ xʉn ho tengu yʉ́n tꞌɛ̨dizɛhɛ i tɛnꞌdʉ. Nɛ manꞌda xʉn ngu yʉn sʉtꞌi i tɛnꞌdʉ, tengu yʉ́n tꞌɛ̨di yʉ dącꞌyɛi. Yʉ́n sʉtꞌi ngue yʉ tasa, nɛ yʉ xaro, nɛ yʉ tꞌɛgui, nɛ yʉ́m ꞌbeꞌtꞌe yʉ tꞌotsꞌi. 5 Janangue nu yʉ fariseo nɛ yʉ xänbate niją bi ꞌyänna ra Jesús:―Hanja ʉ ni xädi hingui tɛn yʉ́n tꞌɛ̨di yʉ dącꞌyɛi nɛ i sihmɛ nɛ hin nin xʉꞌyɛ, bi ꞌyɛ̨mpꞌʉ.
6 Bi dąh ra Jesús, bi ꞌyɛ̨mpꞌʉ:
―Nuꞌahʉ yoho nin ꞌyomfɛ̨nihʉ, bi ꞌyɛ̨mpꞌʉ. Nɛ majuąni bi man ra Isaías nangueehʉ ꞌbʉ mim pøngahyą, bi ꞌyɛ̨na:
Nuya yʉ jąꞌi nangue yʉ́ nde i ɛ̨scagui,
pɛ maxøtsꞌe thoho, hinga gätho mbo yʉ́ mbʉi im bɛ̨ngui.
7 Säti thoho i ɛ̨scagui nguetho høntꞌʉ
yʉ́n tꞌɛ̨di zɛhɛ i xänba ʉ miꞌda,
i ɛ̨n Oją, bi ꞌyɛ̨n a ra Isaías, bi ꞌyɛ̨n a ra Jesús. 8 Gueꞌa gá ꞌyøthʉ a nguetho gá hyɛhmbʉ yʉ́n tꞌɛ̨di Oją nɛ gá tɛnhdʉ yʉ́n ntꞌɛ̨di zɛhɛ yʉ jąꞌi nangue yʉ́n sʉtꞌi yʉ xaro, nɛ yʉ tasa nɛ xʉn ngu miꞌda guí øthʉ , bi ꞌyɛ̨mpꞌʉ.
9 Nɛ manꞌda bi xi ʉ, bi ꞌyɛ̨mpꞌʉ:
―Nɛ høntꞌa ram fɛꞌtsꞌi guí øthʉ nangue yʉ́n tꞌɛ̨di Oją, tengu ꞌbʉ nte di muui, nguetho høntꞌʉ nin tꞌɛ̨di zɛhɛhʉ guí nde gui tɛnhdʉ. 10 Gueꞌa gní fɛstahʉ rán tꞌɛ̨di Oją bi xi a ra Moisés a guí øthʉ, nguetho nu a ra Moisés bi ꞌyɛ̨na: “Gui numansu ni tahʉ nɛ ni mbehʉ” Nɛ manꞌda ram hma bi ma: “Nuꞌa toꞌo da zan rá ta o gue rá mbe, jatho da tho a.” 11,12 Pɛ nuꞌahʉ ꞌdanꞌyo thoho guí mamhbʉ ngue guí ɛ̨mhbʉ hing ra tsꞌoqui ꞌbʉ bi yąrba Oją a mi ja ngue xtá mbäx a rá mbe o gue rá ta nꞌda ran ꞌyohʉ. Nɛ hin gá xihmbʉ ngue him bi numansu yʉ́ ta ꞌbʉ ngubʉ bi ꞌyøtꞌe. 13 Gueꞌa gní combahʉ rám hman Oją a, nangue ni tꞌɛ̨cꞌyɛi zɛhɛhʉ guí xänbahʉ miꞌda yʉ jąꞌi. Nɛ xʉn ngu miꞌda guí øthʉ, bi ꞌyɛ̨mpꞌʉ yʉ fariseo a ra Jesús.
14 Nɛ nubʉya bi zohni gätho yʉ jąꞌi bi ꞌyɛ̨mpꞌʉ:
―Dami ꞌyøhmbʉ, gätho ahʉ, nɛ dami pąhmbʉ na ga xi ahʉ ya. 15 Hinꞌyʉ ꞌbɛꞌa da yʉrpʉ mbo rá mbʉi nꞌda, gue di tsꞌonba bʉ, pɛgue nuꞌa ní bøm bʉ ja rá mbʉi nꞌda gue a dí tsꞌonba rá jąꞌi nꞌda a. 16 Høntꞌa go toꞌo ja yʉ́ zagu bi ꞌyø a dím mangä, bi ꞌyɛ̨mpꞌʉ yʉ jąꞌi a ra Jesús.
17 Nɛ bi ꞌuepʉ ꞌbʉh yʉ jąꞌi a ra Jesús, bi mbähä yʉ́ xädi bʉ ja ra ngu. Nɛ nubʉya bi ꞌyänꞌdʉ yʉ́ xädi:
―ꞌBɛꞌa gue na mbønꞌa ran tꞌuti gá ma.
18 Nɛ bi ꞌyɛ̨mpꞌʉ yʉ́ xädi bʉya:
―Ha nɛ ahʉ hin guí pąhmbʉ a dá mangä. Ha hin guí pąhmbʉ hinꞌyʉ ꞌbɛꞌa da yʉrpʉ mbo rá mbʉi nꞌda, gue hinga gueꞌa dí tsꞌonba bʉ a. 19 Nguetho nuꞌa ꞌbɛꞌa gätho i si nꞌda, hin din ząm bʉ rá mbʉi nꞌda, pɛ da mba bʉ rá foho nꞌda nɛ da thotho a, bi ꞌyɛ̨n a ra Jesús.
Ngubʉ bi man ra Jesús i ndepe da fądi ngue xʉn ho ꞌbɛꞌa gätho i ja ua ngue da zi nꞌda. 20 Nɛ mi ɛ̨nꞌa ra Jesús:
―Nuꞌa ní bøm bʉ rá mbʉi nꞌda ra jąꞌi, gue a dí tsꞌonꞌa nꞌda a. 21 Nguetho nubʉ ja yʉ́ mbʉi yʉ jąꞌi ní bøm bʉ gätho yʉ tsꞌonꞌyomfɛ̨ni, nɛꞌbʉ i ꞌyomtꞌɛ̨ni thoho nꞌda, nɛꞌbʉ di ꞌyomtꞌɛ̨niba nꞌda ra xisu nɛ i ꞌbʉh rá xisu, nɛꞌbʉ i hącpa rá te rá mijąꞌiui. 22 Nɛꞌbʉ øtꞌ ram fɛ̨, nɛꞌbʉ øtꞌ ran tsꞌiyate, nɛꞌbʉ nząi øt ran tsꞌo, nɛꞌbʉ i häte, nɛꞌbʉ ra ꞌyąsä o gue ran tsꞌɛya, o gue yʉn cꞌąte, o gue yʉn ꞌyɛ̨tsꞌi, o gueꞌbʉ i øtꞌe tengu ꞌbʉ hinꞌyʉ rán ꞌyomfɛ̨ni nꞌda. 23 Gueꞌʉ gätho ní bøm bʉ yʉ́ mbʉi yʉ jąꞌi nɛ gueꞌʉ ní tsꞌonba yʉ́ mbʉi yʉ jąꞌi ʉ, bi ꞌyɛ̨mpꞌʉ yʉ́ xädi ra Jesús.
Nꞌda ra xisu ngue hing yʉ judío bi ꞌyɛ̨cꞌyɛi ra Jesús
24 Nuꞌbʉ mi jua a bin yąhʉ yʉ́ xädi a ra Jesús, bi mbähä bʉ ra xɛqui yʉ hnini Tiro nɛ Sidón. Nɛ nuꞌbʉ mi dįni hapʉ din säya bi nde ngue njon da bądi, pɛ njąmꞌbʉ bi zä bin ꞌyągui. 25,26 Nguetho ꞌbex bi zøm bʉ nꞌda ra xisu mi ꞌbʉ a nꞌda rá tꞌįxu min ꞌyoui ra zįthu. Bi zøm bʉ ngue ya xí ꞌyøde nangue rá tsꞌɛdi ra Jesús. Nu ra xisu, hin ma mijudíohe a, ra mɛngu bʉ ra xɛqui Sirofenicia. Bin dąnyahmu bʉ ja rá gua ra Jesús nɛ ntsꞌɛdi bi ꞌyäp ra mate ngue da hyønba thi a ra zįthu in ꞌyoui a rá tꞌįxu. 27 Nuꞌa ra Jesús bi ꞌyɛ̨mbi:
―Hin nin säui ga øtꞌa a guím ma nguetho him ma mɛnguhʉ. Tenguthoho bʉ ja nꞌda ra ngu hin rán sähʉ rá mbʉdi da tꞌįn ʉ yʉ tꞌʉꞌyo, yʉ́ mbʉdi ʉ go yʉ tꞌʉhni, bi ꞌyɛ̨mbi.
28 Bi dą a ra xisu bʉya:
―Majuąni guím ma, gra Hmu, pɛ nɛꞌʉ yʉ tꞌʉꞌyo i sip yʉ́ xɛni yʉ tsꞌʉntꞌʉ i hɛpʉ ꞌbimɛxa.
29 Nuꞌa ra Jesús bi ꞌyɛ̨mpꞌa:
―Xʉn ho ngue ngubʉ gá bɛ̨ni, janangue nu ra zįthu min ꞌyoui ni tꞌįxu ya bi bøni. Ni mba ya.
30 Nuꞌbʉ mi zøm bʉ rá ngu bi nu a rá tꞌįxu ꞌbɛm bʉ ja rá oi, ya xí ꞌue a ra zįthu bʉya.
Ra Jesús bi hocꞌa nꞌda ran ꞌyohʉ i gogu nɛ i ꞌbare
31 Nɛ bi bøm bʉ ra häi Tiro a ra Jesús bi thotho bʉ ra hnini Sidón, nɛpʉ yʉ hnini ra häi Decápolis, nɛ bi zøm bʉ ja ra dądehe Galilea mahønꞌa. 32 Bá tsꞌinba nꞌda ra gogu nɛ i ꞌbare, bi tꞌäp ra mate ra Jesús da dospa rá yą a. 33 Nuꞌa ra Jesús bi zixa ra gogu bʉ maꞌueni tsꞌʉ nguepʉ njongui ꞌbʉh yʉ jąꞌi, nɛ bi dįmba rá saha bʉ ja yʉ́ zagu, nɛ nu rá jįni bi gospa rá jąni. 34 Nɛ nubʉya, bi ndøtsꞌ mahɛ̨tsꞌi a ra Jesús nɛ bin gąꞌtsꞌi nɛ bi ꞌyɛ̨na:
―Efata, bi ꞌyɛ̨n a ra Jesús.
Nuꞌa i nde da ma: “Dami xoqui.”
35 Nɛ ꞌbex bi xoh yʉ́ zagu, nɛ bi xoh rá nde nɛ bin yą xʉn ho bʉya. 36 Nu ra Jesús bʉya ntsꞌɛdi bi xifi njon da xifi ꞌbɛꞌa bi ꞌyørpe. Pɛ nuꞌbʉ mi sifi hin da ma pɛ manꞌda bi ma. 37 Nɛ gätho ʉ bi xifi ɛ̨mmɛ bi hyonya thoho ʉ, nɛ bi ꞌyɛ̨nꞌʉ:
―Xøgue xʉn ho tho gätho i øtꞌa ra Jesús. Di jap yʉ gogu da ꞌyøhnahyą nɛ di japi din yą yʉ gore, bi ꞌyɛ̨n ʉ.