Ra Jesús bi hyønba thi yʉ zįthu a ra mɛngu bʉ Gadara
5
Nubʉya nu ra Jesús nɛ yʉ́ xädi bi zøm bʉ ꞌdanguadi ra dądehe nubʉ ja ra häi Gadara. 2-6 Nɛ mi ꞌbʉpʉ nꞌda ran ꞌyohʉ min ꞌyoui yʉ zįthu. Nuꞌa mi ząm bʉ ja ran ꞌyägui, nɛ njoꞌo toꞌo mi sä da ząmmi nguetho gä i xɛcthoho yʉ cadena mi pa nthątꞌi. Xʉn ngu yʉ nįdi bi thurpa yʉ́ ꞌyɛ nɛ yʉ́ gua nangue yʉ cadena, pɛ gätho i xɛcthoho. Njon mi sä di hɛcpi. Gätho ra pa nɛ ra xui mi mbapʉ ja ra dąpo o guepʉ ja ran ꞌyägui, nɛ midi ʉnba zɛhɛ nguetho mi hɛzɛhɛ rá jąꞌi nangue yʉ do. Nuꞌbʉ mí bøm bʉ ja ra mbosa a ra Jesús nɛ yʉ́ xädi, ꞌbex bá ɛ̨ a ran ꞌyohʉ bin cꞌathʉ, bí ꞌyɛ̨pʉ ja ran ꞌyägui, bin dąnyahmu bʉ ꞌbäh ra Jesús, bi dąnde, 7 nɛ ntsꞌɛdi mbafi, bi ꞌyɛ̨na:―ꞌBɛꞌa guí nde gui ꞌyørcahe grá Jesús, rá Tsꞌʉntꞌʉ i Oją mahɛ̨tsꞌi. Nuya dí ä a ra mate hin gui ʉngahe, 8 bi ꞌyɛ̨nꞌʉ yʉ zįthu ꞌbʉ mi sifi da bøm bʉ rá mbʉi ran ꞌyohʉ. 9 Nɛ nubʉya nu ra Jesús bi ꞌyänꞌnʉ yʉ zįthu:
―ꞌBɛꞌa ní thuhu, bi ꞌyɛ̨mbi.
―Ma thuhu “Nꞌdan nɛtsꞌigähe” nɛ ɛ̨mmɛ xʉn ngu gähe, bi ꞌyɛ̨na. 10-12 Nɛ ntsꞌɛdi dí ä a ra mate gueꞌbʉ ga pømhbe hin gui pɛngahe bʉ nꞌdanni i ja yʉ häi, dami ꞌyørcahe ra mate gui pɛngahe nʉ ꞌbʉh yʉ tsꞌʉdi ga cʉthe nʉ, bi ꞌyɛ̨nꞌʉ. Nguetho hinga yatho mí ꞌyo ʉ yʉ tsꞌʉdi xʉn ngu, mi sapaxi bʉ.
13 Nu ra Jesús ya bi un ran tꞌɛ̨di da yʉrpʉ ꞌbʉh yʉ tsꞌʉdi. Nuꞌbʉ mí yʉrpʉ ya ꞌbex bán tih yʉ tsꞌʉdi bá cąpʉ ja ra nguani ʉ ꞌbex bi yʉpʉ ja ra dehe ʉ, nɛ gä bi du bʉ ʉ bʉya. Mbɛ yo mahuąhi i jua ʉ.
14 Nu ʉ yʉn ꞌyohʉ midi jamansu yʉ tsꞌʉdi, ꞌbex bi ꞌda ꞌbʉ min nu ꞌbɛꞌa bi ꞌyøtꞌʉ yʉ tsꞌʉdi. Bi mba bá mam bʉ ja ra hnini nɛpʉ huąhi a bin ja. ꞌBex bi mba yʉ jąꞌi bʉya da nusɛ ʉ ꞌbɛꞌa bi man ʉ yʉ́ mbädi yʉ tsꞌʉdi. 15 Nuꞌbʉ mí zøm bʉ, bi nu i hupʉ a ran ꞌyohʉ madí ʉnba ra zįthu, ya xí zä nɛ i he rá zi pahni. Ɛ̨mmɛ bi mbidi yʉ jąꞌi bʉya. 16 Nuꞌʉ xí nu yʉ tsꞌʉdi, xø bi xifi xʉn ho yʉ jąꞌi mahønꞌa ꞌbɛꞌa xín ja. 17 Nɛ nubʉya, nu yʉ mɛngu bʉ ɛ̨mmɛ bi ꞌyäp ra mate ngue ꞌbex gue da bøn a ra Jesús bʉ ja yʉ́ häi ʉ.
18 Bi mba da ndex ra mbosa a ra Jesús bʉya. Nɛ nuꞌa ran ꞌyohʉ xí ʉnba ra zįthu ɛ̨mmɛ i nde da dɛnꞌna ra Jesús gue ꞌdarpʉ din ꞌyohʉ. 19 Pɛ nu ra Jesús him bi un ran tꞌɛ̨di nɛ bi hɛcpi.
―Ni mba bʉ ni ngu, nɛ gui xi ʉ nim ꞌbʉihʉ ran ho bi ꞌyøtꞌa Oją ra Hmu ngue bi huɛ̨cꞌa i, bi ꞌyɛ̨mpꞌa ran ꞌyohʉ.
20 Nuꞌa min ꞌyoui ra zįthu bʉya, bi mba rá ngu. Bi dʉꞌmi bi mam bʉ gätho ra xɛqui Decápolis ꞌbɛꞌa xí ꞌyørpa ra Jesús. Nɛ gätho ʉ bi xifi bi hyonya thoho ʉ.
Ra Jesús bi ꞌyäꞌa rá tꞌįxu ra Jairo nɛ bi hocꞌa nꞌda ra xisu mi hɛ̨mb ra mbɛji
21 Nɛ nuꞌbʉ ya mi zøn ra Jesús bʉ ná ꞌdanguadi ra dądehe, ɛ̨mmɛ xʉn ngu yʉ jąꞌi bim pɛti bʉ ndenthe mahønꞌa guepʉ bin säya ra mbosa. 22 Bi zøꞌa nꞌda rá ngʉrbi ra niją i Jairo a, bin dąnyahmu bʉ ja rá gua ra Jesús. 23 Nɛ ɛ̨mmɛ bi ꞌyäp ra mate, bi ꞌyɛ̨mbi:
―ꞌYørqui tsꞌʉ ra mate ga mbähä ba cäx ni ꞌyɛ ma tꞌįxu nguetho ɛ̨mmɛi, janangueꞌa da yąni nɛ hin da du, bi ꞌyɛ̨mbi.
24 Nu ra Jesús bi mbɛ bʉya, nɛ xʉn ngu yʉ jąꞌi bi dɛnꞌndʉ, xøgue bin dʉ bʉ ni mba ʉ. 25 Nɛ bi zʉpʉ ꞌyu nꞌda ra xisu ná ꞌdɛꞌmayon jɛya mi hɛ̨mb ra mbɛji. 26 Ɛ̨mmɛ xí nu ran ʉnbi nangue xʉn ngu yʉ ꞌyøthebate xí ꞌyøthe. Xi juadi gätho rá mbɛti mi ja, nɛ xingui tsꞌʉ bi dįtsꞌi, xøgue manꞌda ɛ̨mmɛi. 27 Pɛ nuya i hon a ra Jesús nguetho xí ꞌyøꞌam man yʉ jąꞌi ngue di hoqui høntꞌa go ꞌbɛꞌa man ʉ. Janangue nuꞌbʉ mi zʉdi ꞌbex bi yʉtꞌi nde bʉ ní mba ʉ, bi därpa rá xʉthapahni ra Jesús bʉya. 28 Nguetho mí ɛ̨nsɛ ra xisu, “Høntho ga thärpa rá pahni, ya da yąngui,” mi ɛ̨na. 29 Nɛ nuꞌbʉ mi därpa rá pahni ra Jesús ꞌbex bin hɛ̨ a rá mbɛji mí hɛ̨mb bʉya. ꞌBex bi bą a ra xisu ngue ya bi zä xʉn ho. 30 ꞌBex bi bąh ra Jesús ngue bi hocꞌa nꞌda ra jąꞌi rá tsꞌɛdi ꞌbʉ mí därpa rá pahni. Janangue bi nyɛ̨ꞌa ra Jesús, bi hyɛ̨tꞌʉ yʉ jąꞌi min ꞌyohʉ nɛ bi ꞌyɛ̨na:
―Toꞌo bi därca ma pahni, bi ꞌyɛ̨na.
31 Nu yʉ́ xädi bʉya bi ꞌyɛ̨mbi:
―Guín nuhma ɛ̨mmɛ dʉ ua yʉ jąꞌi, “Toꞌo bi därca ma pahni,” nɛ guí ɛ̨na.
32 Nu ra Jesús i tøꞌmi da mansɛ toꞌo xí därpa rá pahni. 33 Nɛ nu ra xisu bʉya, bin su nɛ di fɛtꞌi nguetho pą a xí tꞌørpe. Nɛ bi mba bʉ ꞌbäh ra Jesús bin dąnyahmu bʉ ja rá hmi nɛ bi xifi gätho ꞌbɛꞌa xí ꞌyøtꞌe. 34 Nu ra Jesús bʉya bi ꞌyɛ̨mbi:
―Nuꞌi grá zi xisu, bi zä i nguetho gá ꞌyɛ̨cꞌyɛigui. Ni mba da hyu ni mbʉi, him man di ʉnꞌa a gmi hɛ̨mbi.
35 Gätho na yąui a ra xisu ꞌbex bi zøpʉ miꞌda yʉ jąꞌi bí ꞌyɛ̨pʉ ja rá ngu a ra Jairo, bi tꞌɛ̨mpꞌa ra Jairo:
―Nuꞌa ni tꞌįxu ya bi du. Säti thoho manꞌda gadi pah na ra xänbate.
36 Pɛ nu ra Jesús ꞌbʉ mí ꞌyø a bi manꞌʉ, bi ꞌyɛ̨mpꞌa ra Jairo bʉya:
―O di tu ni mbʉi, høntho gui ꞌyɛcꞌyɛi ngue majuąni i ja ma tsꞌɛdi, bi ꞌyɛ̨mpꞌa.
37 Guehma bi thoh pʉya nɛ njom bi japi da dɛnni. Høntꞌa ra Pedro, nɛ ra Jacobo nɛ ra Xuua rán ꞌyohʉ ra Jacobo, bi xifi da mbähä bʉ rá ngu ra Jairo. 38 Nuꞌbʉ mi zøm bʉ ja rá ngun a ra Jairo bʉya, bi nu ngue i zonꞌʉ yʉ jąꞌi ꞌbʉpʉ, nɛ ɛ̨mmɛ di mbahni na tsꞌoni. 39 Bi yʉrpʉ mbo ra Jesús bʉya, bi ꞌyɛ̨mpꞌʉ ꞌbʉpʉ:
―Hanja ɛ̨mmɛ gadi hįhʉ na tsꞌoni. Nuna ra hmute hingui tu pɛgue i ąha.
40 Nuꞌbʉ mi ꞌyøh yʉ jąꞌi ꞌbɛꞌa bi man a, bi den thoho bʉya. Nu ra Jesús bʉya, bi ꞌyɛ̨mpꞌʉ yʉ jąꞌi:
―Dami pømhbʉ thi, bi ꞌyɛ̨mbi.
Høntꞌa rá ta nɛꞌa rá mbe ra hmute xí du nɛ yʉ́ xädi, bi yʉthʉ ra Jesús bʉ ꞌbɛn a ra hmute. 41 Nuꞌa ra Jesús bʉya bi bɛnba rá ꞌyɛ a ra hmute nɛ bi ꞌyɛ̨mbi:
―Talita cumi, bi ꞌyɛ̨mbi. I nde da ma: “Nuꞌi grá hmute dí xi i, dami ndantsꞌi.”
42 Nuꞌa ra hmute bʉya ꞌbex bi ndantsꞌi nɛ bin ꞌyo. ꞌDɛꞌmayon jɛya mi pɛꞌtsꞌa. Nuꞌʉ bi yʉthʉ mbo bi hyonya thoho. 43 Nuꞌa ra Jesús bʉya ntsꞌɛdi bi ꞌyɛ̨mpꞌʉ:
―Njon gui xihmbʉ ꞌbɛꞌa dá øtꞌä, bi ꞌyɛ̨mpꞌʉ. Nɛ nubʉya bi ꞌyɛ̨mpꞌa ra Jairo:
―Dami ꞌuįn na ni tꞌįxu ya, bi ꞌyɛ̨mbi.