Ran tꞌuti ra mbomhmudä
4
Nɛ xø bi xänba yʉ jąꞌi mahønꞌa bʉ ja ra ndendądehe a ra Jesús. Nɛ ɛ̨mmɛ xʉn ngu yʉ jąꞌi bim pɛtihʉ bʉ. Janangueꞌa bi yʉrbʉ ja ra tꞌʉmbosa bi dąn i tsꞌʉ bʉ ja ra ndenthe. Nu yʉ jąꞌi bi gopʉ ndenthe bʉya. 2 Nu ra Jesús bʉya xʉn ngu yʉn tꞌuti bi xih yʉ jąꞌi ꞌbʉ mí xänbi, nɛ bi ꞌyɛ̨na:3 ―ꞌYøhmbʉ tsꞌʉ ran tꞌuti ga xi ahʉ ya. Nuꞌa nꞌda ra uąhi bi mba bá pon yʉ hmudä. 4 Nɛ bi zo ꞌda bʉ ꞌyu. Nubʉya bá ɛ̨h yʉ doja bi juaꞌa ntsꞌa yʉ hmudä xí zo bʉ. 5 Nuꞌʉ miꞌda yʉ hmudä bi zo bʉ ja yʉ ndaxnado nɛ tsꞌʉtho ra häi bʉ. Janangueꞌa ꞌbex bi bøxa nꞌdihi. 6 Pɛ nuꞌbʉ mam bá pøx ra hyadi ꞌbex bi ꞌyotꞌʉ nguetho hin hapʉ sä da mba yʉ́ ꞌyʉ. 7 Nuꞌʉ miꞌda bi zo bʉ ja yʉ dąpo, bi bøtsꞌe pɛgue bi gomꞌ yʉ dąpo, nɛ nte bi ndøꞌʉ. 8 Pɛ nuꞌʉ miꞌda bʉya bi zo bʉ ja ra häi xʉn ho. Bi bøtsꞌe nɛ bin te, nɛ bi ndøgue. Nuꞌʉ ꞌda ꞌdäte maꞌdɛtꞌa bi ndøgue, nuꞌʉ ꞌda hyąte, nuꞌʉ ꞌda nꞌda ciɛnto bi ndøgue ngue nꞌda ꞌbäi, bi ꞌyɛ̨n a ra Jesús.
9 Nɛ xø bi ꞌyɛ̨mpꞌʉ yʉ jąꞌi:
―Høntꞌa go toꞌo ja yʉ́ zagu bi ꞌyø a dá ma, bi ꞌyɛ̨mbi.
Hanja i xih yʉn tꞌuti yʉ jąꞌi a ra Jesús
10 Nuꞌbʉ mi ꞌbʉsɛhʉ ꞌdɛꞌma yoho yʉ́ xädi ra Jesús nɛꞌʉ miꞌda yʉ́ ꞌyɛ̨cꞌyɛi, bi xifi da xi ʉ ꞌbɛꞌa na mbøn a ran tꞌuti bi ma. 11 Nu ra Jesús bi ꞌyɛ̨mpꞌʉ bʉya:
―Gueꞌahʉ bi ja ahʉ gui pąhmbʉ a him mam fądi mam ꞌbɛtꞌo ngue ꞌbɛpʉ ní manda rá tsꞌɛdi Oją. Pɛ nuꞌʉ yʉ jąꞌi thoho gueꞌʉ da sänba yʉn tꞌuti, 12 madague da nu pɛ hin da ꞌyørpa masu ꞌbɛꞌa da nu, nɛ madague da ꞌyøde pɛ hin da bądi ꞌbɛꞌa ní mba a, nɛ hin da bɛ̨ni di päh yʉ́ mbʉi ngue da hyon ra punbi, bi ꞌyɛ̨nꞌa ra Jesús.
Rán thɛui a ran tꞌuti a ra mbomhmudä
13 Nɛ xø bi ꞌyɛ̨mpꞌʉ mahønꞌa:
―Nuꞌbʉ hin guí pąhmbʉ ꞌbɛꞌa na mbønꞌa ran tꞌuti dá mangä, ha da zä gui pąhmbʉ gätho miꞌda ga xi ahʉ ꞌbʉ. 14 Nuꞌa na mbønꞌa dá mangä, nuꞌa ra uąhi queꞌa bá man rám hman Oją hønbʉ go hapʉ. 15 Guehya bi zo bʉ ja ra ꞌyu na mbøni bi ꞌyømanho rám hman Oją ya. Pɛ nu ra zįthu ꞌbex bi japi bi pumbɛ̨ni a ram hma bi sifi. 16 Ximangutya bi zo bʉ ja yʉ ndaxnado na mbøni bi ꞌyøh ram hma nɛ bin johya. 17 Pɛgue hinga gätho rá mbʉi bi bɛ̨ni. Janangueꞌa nuꞌbʉ bi nu yʉn ʉcpi nɛ yʉn ʉnbi nangue rám hman Oją him bi hyätꞌi, ꞌbex gue bi zu nɛ bi ꞌuegue. 18 Nɛ nuya bi zo bʉ ja ra dąpo na mbøni bi ꞌyømanho ram hma 19 pɛ ɛ̨mmɛ di ho ra ximhäi nɛ ra mbɛti i hätꞌi, nɛ di ho da ꞌyøtꞌ yʉ́ pähä zɛhɛ. Tenguꞌbʉ bi gomba ram hma, nɛ hin di japi din te yʉ́ mbʉi. 20 Pɛ nuya bi zo bʉ ja ra häi xʉn ho, na mbøni bi ꞌyømanho rám hman Oją, bi hyąni, nɛ bin te yʉ́ mbʉi xʉn ho, nɛ bi xąntꞌa ram hma xʉn ho, tengutho yʉ hmudä, gue bi ndøꞌa ꞌdäte maꞌdɛtꞌa ʉ ꞌda, nɛ hyąte ʉ ꞌda, nɛ nꞌda ciɛnto ʉ ꞌda, bi ꞌyɛ̨mpꞌʉ yʉ́ xädi ꞌbʉ mi xifi ꞌbɛꞌa na mbønꞌa ran tꞌuti bi ma.
Gätho him mam fądi da zøni da fądi
21 Nɛ xø bi ꞌyɛ̨nꞌa ra Jesús:
―Nuꞌa mam hmangä ntsꞌänni gätho yʉ jąꞌi da ꞌyøde, tengu nꞌda ra nyotꞌi ntsꞌänni di yotꞌi gätho bʉ mbo ra ngu, hingan tsꞌänni da mba ma cʉꞌtꞌi bʉ ja ra ꞌbihuanza o ra ꞌbitꞌotsꞌi. 22 Nguetho gätho ꞌbɛꞌa him mam fądi da zøni da fądi, nɛ gätho ꞌbɛꞌa him midí nɛqui da zøni da hnu. 23 Høntꞌa go toꞌo ja yʉ́ zagu bi ꞌyø a dá ma. 24 Nɛ nuꞌa di jamansu a i øde da bądi xʉn ho nɛ Oją di japi manꞌda xʉn ngu da zøni da bądi. Pɛ nuꞌa hin ɛ di jamansu a i øde, pɛ nɛꞌa zi tsꞌʉ mi pądi dim ꞌbɛdi, nɛ tengu ni tꞌɛni gnán ɛmhbʉ gueꞌa dí tꞌɛnꞌnahʉ, nɛ manꞌda mbongui thoho din ꞌda ahʉ. 25 Din ja ahʉ tengu ram hma i ɛ̨na: “Nuꞌa xʉn ngu i ja manꞌda xʉn ngu din tꞌunni pɛ nuꞌa tsꞌʉtho i ja manꞌda da thąnba a.”
Rán tꞌuti ra hmudä i te
26-27 Nu ra Jesús bi ꞌyɛ̨mpꞌʉ mahønꞌa:
―Nuya di manda ua rá tsꞌɛdi Oją madagueꞌbʉ hin di nɛqui, tengu thoho nꞌda ra hmudä ꞌbʉ bi du a nꞌda ran ꞌyohʉ, madagueꞌbʉ hingui nu hague ám bøtsꞌe pɛgue i pądi da bøtsꞌe, nte im bɛ̨ntho. 28 Nguetho nuꞌa ra häi dí tesɛ yʉ thuhu a. Nuꞌbʉ bi mbʉdi bi bøtsꞌe, yʉ paxi thoho, mꞌbɛjua bʉya da ndøh yʉ́ dąxi, nɛ nubʉya din thą ʉ. 29 Nɛ nu ran ꞌyohʉ bʉya da xoqui nguetho bi zøn ra ora da ꞌbɛꞌtsꞌi, bi ꞌyɛ̨n a ra Jesús. In jabʉ rá tsꞌɛdi Oją ngue di manda ua nɛ njongui nu hague na te.
Ran tꞌuti rá hmudä ra mostaza
30 Nɛ manꞌda ran tꞌuti bi xih yʉ́ xädi ra Jesús mahønꞌa, nɛ bi ꞌyɛ̨mpꞌʉ:
―ꞌBɛpʉ dá bɛ̨mhbʉ hague di manda ua rá tsꞌɛdi Oją. Ga xi ahʉ nꞌda ran tꞌuti nangueꞌa. 31-32 In ja tengu nꞌda rá hmudä ra mostaza i pa mꞌboni, nɛ ɛ̨mmɛ zicuɛ tho, ɛ̨mmɛ manꞌda zicuɛ xinda gue miꞌda yʉ hmudä, pɛ manꞌda i te xʉn ngu yʉ́ ꞌyɛ, xinda gue gä miꞌda yʉ paxi nɛ xøgue sä da ꞌyøtꞌ yʉ́ ꞌbafi yʉ doja bʉ ja yʉ́ xaha. Njabʉ rá tsꞌɛdi Oją bʉ ni nɛqui ngue di manda ua, bi ꞌyɛ̨nꞌa ra Jesús.
Hanja bi xih yʉn tꞌuti ʉ yʉ jąꞌi
33 Nɛ xʉn ngu miꞌda yʉn tꞌuti bi xänba yʉ jąꞌi a ra Jesús ꞌbʉ mi xänbi tengu ya i hmangua, pɛ høntꞌʉ hingui hɛ̨i bʉ dá fądi bi xifi. 34 Nɛ nte bi xih miꞌda yʉm hma, høntꞌʉ yʉn tꞌuti bi xifi. Pɛ nuꞌbʉ mi ꞌbʉsɛhʉ yʉ́ xädi bi xih pʉya ꞌbɛꞌa na mbønꞌʉ yʉn tꞌuti bi mam bʉ ꞌbʉh yʉ jąꞌi.
Bi xifi din hɛ̨ ran dąhi ra Jesús
35 Nuꞌbʉ mín de bʉya nu ra Jesús bi ꞌyɛ̨mpꞌʉ yʉ́ xädi:
―Nuya ga thohmbʉ nʉ ꞌdanguadi ra dądehe, bi ꞌyɛ̨mpꞌʉ.
36 Nɛ nubʉya bi xih yʉ jąꞌi da mbeng bʉ yʉ́ ngu. Nu yʉ́ xädi bʉya bi ꞌyon a ra mbosa mi huhʉ ra Jesús, bi mbähä bʉya. Nɛ xʉn ngu miꞌda yʉ jąꞌi bi dɛnni ngue bi hyusɛ yʉ́ mbosa ʉ. 37 Nɛ nuꞌbʉ ya i ꞌyo bʉ ja ra dehe nɛ ntsꞌɛdi ran dąhi bin ja, nɛ bi dontsꞌ ra dehe ra mbosa nɛ mi tsꞌʉtho xtán yudi. 38 Pɛ nu ra Jesús mi hunh ra huhni, nɛ mi ąpʉ ja ra mbosa. Nu yʉ́ xädi bi ꞌyä ra Jesús nɛ bi ꞌyɛ̨mbi:
―Xänbate i, ha nte guím bɛ̨ni nɛ nde ga tuhʉ, bi ꞌyɛ̨mpꞌʉ.
39 Bi ndantsꞌa ra Jesús bʉya nɛ bi ꞌyɛ̨mpꞌa ran dąhi nɛ a ra dehe:
―Daman hɛ̨, bi ꞌyɛ̨mbi.
―Guín suhʉ nguetho tsꞌʉtho guí ɛ̨cꞌyɛigahʉ.
41 Nu yʉ́ xädi bʉya bi zu a ra hmu, nɛ bi hyonya thoho a bin ja. Bin ꞌyɛ̨mzɛhɛ nꞌda ngu nꞌda ʉ:
―ꞌBɛꞌa di ꞌyɛ̨tꞌui na ran ꞌyohʉ, nɛ ya ꞌbex gue in hɛ̨ a ran dąhi nɛ ra dehe di hɛcpi.