Bi hocꞌa nꞌda ran ꞌyohʉ him mi sä di juąn rá ꞌyɛ
3
Nɛ nu ra Jesús bʉya bi yʉrpʉ ja ra niją mahønꞌa. Nɛ mí ꞌbʉpʉ nꞌda ran ꞌyohʉ him mi sä di juąn rá ꞌyɛ. 2 Nɛ mi ꞌbʉpʉ ꞌda di ąxtho ra Jesús ꞌbʉ di hocpa rá ꞌyɛ ran ꞌyohʉ. Nɛ nuꞌbʉ da nu di hocpi di yąp pʉya nguetho ra pa ran tsꞌäya a. 3 Pɛ nu ra Jesús bi ꞌyɛ̨mpꞌa ran ꞌyohʉ:―Ndantsꞌi, gam ꞌbähnʉ made i ꞌbʉh yʉ jąꞌi, bi ꞌyɛ̨mbi.
4 Nɛ nubʉya, bi ꞌyänꞌdʉ ꞌbʉpʉ nɛ bi ꞌyɛ̨mpꞌʉ:
―Dami xijʉ ya ꞌbɛꞌa xʉn ho da tꞌøtꞌ ꞌbʉ ra pa ran tsꞌäya. Ha da tꞌøtꞌa nꞌda ran ho uague da tꞌøtꞌa nꞌda ran tsꞌo. Ha xʉn ho ꞌbʉ da yąnba rá te rá mijąꞌiui nꞌda, uague xʉn ho ꞌbʉ da hyącpa rá te rá mijąꞌiui nꞌda.
Pɛ nuꞌʉ hinꞌyʉ ꞌbɛꞌa sä dí dąti. 5 Nu ra Jesús bi hyanmanꞌʉ yʉ jąꞌi bʉya nɛ bi zøt rá mbʉi nguetho hinꞌyʉ ran hocjąꞌi ʉ. Nubʉya bi ꞌyɛ̨mpꞌa mi ʉ rá ꞌyɛ:
―Dami juąn ni ꞌyɛ.
Nɛ ꞌbex bi juąn rá ꞌyɛ bʉya, bi gomanho. 6 Bi bøn yʉ fariseo bʉya nɛ in cuɛ. Bin yąhʉ mahønꞌa ʉ yʉ́n sʉihʉ ngue mi tɛn ra Herodes, nɛ mí hon ʉ ꞌbɛpʉ dí hyo a ra Jesús.
Xʉn ngu yʉ jąꞌi bim pɛti bʉ ja ra dądehe mahønꞌa
7 Nu ra Jesús bi ꞌuegue bi mbähä yʉ́ xädi bʉ ja ra dądehe nɛ xʉn ngu yʉ jąꞌi mi ꞌbʉpʉ ra häi Galilea bi dɛnthoho. 8 Nɛ ʉ yʉ mɛngu bʉ ja ra häi Judea, nɛpʉ ra hnini Jerusalén, nɛpʉ ra häi Idumea, nɛpʉ ꞌdanguadi ra Jordán, nɛpʉ ra xɛqui Tiro nɛ Sidón, bi ꞌyø ʉ ꞌbɛꞌa gätho bi ꞌyøtꞌa ra Jesús. Janangue a gätho bi zøm bʉ mi ꞌbʉ a. 9 Nɛ nu ra Jesús bi ꞌyɛ̨mpꞌʉ yʉ́ xädi:
―Damin sähʉ, gui jomhbʉ nꞌda ra tꞌʉmbosa nʉ ja ra dehe, bi ꞌyɛ̨mpꞌʉ.
Ngubʉ bi xifi nguetho i nu manꞌda manꞌda ní zøntho yʉ jąꞌi nɛ nuꞌbʉ bin dʉ bʉ yʉ jąꞌi da hyuxpʉ ja ra mbosa ra Jesús bʉya. 10 Nguetho ya xí hoqui xʉn ngu yʉ hyɛ̨nni, janangue a din tønthoho ʉ yʉn zämanꞌʉ in nde da bɛnba rá pahni ra Jesús ngue mi pą ʉ, høntho ga thärpa thoho rá pahni ꞌbex gue da yąngui, mi ɛ̨nꞌʉ. 11 Nɛ nuꞌʉ min ꞌyohʉ ra zįthu bin dąnyahmu bʉ ꞌbʉh ra Jesús nɛ mbafi, ɛ̨n ʉ:
―Nuꞌi gueꞌe rá Tsꞌʉntꞌʉ i Oją, bi ꞌyɛ̨n ʉ.
12 Pɛ nu ra Jesús ntsꞌɛdi bi hɛcpa ʉ nguetho hingui ndepe gueꞌʉ yʉ zįthu dí bą ʉ yʉ jąꞌi gue gueꞌa rá Tsꞌʉntꞌʉ Oją a.
Ra Jesús bi huahni ꞌdɛꞌmayoho yʉ́ xädi
13 Mꞌbɛjua bʉya bi guam bʉ ja ra nyuni a ra Jesús. Nubʉya bi zohnꞌdʉ ꞌda yʉ́ xädi nɛ nuꞌʉ bi mba bʉ ꞌbʉh ra Jesús ʉ bʉya. 14 Nɛ nubʉya bi huahnꞌdʉ ꞌdɛꞌmayoho, bi zänni din ꞌyohʉ ngue da zä da mbɛhni da xih yʉ jąꞌi rám hman Oją. 15 Nɛ bi un yʉ́ tsꞌɛdi di hoc yʉ hyɛ̨nni nɛ da hyøn a thi yʉ zįthu nꞌyohʉ ꞌda yʉ jąꞌi. 16 Bi zänna ra Simón, nɛ bi zänbi dí huti ra Pedro a. 17 Nɛ ra Jacobo nɛꞌa ra Xuua rán ꞌyohʉ na ra Jacobo. Gätho yoho yʉ́ tsꞌʉntꞌʉ ra Zebedeo ya. Nɛ bi zänba yʉ́n sospathuhu Boanerges, i nde da ma tengu nꞌda ra ngäni. 18 Nɛꞌa ra Andrés bi zänni, nɛ ra Felipe, nɛ ra Bartolomé, nɛ ra Mateo, nɛ ra Tomás, nɛ manꞌda ra Jacobo ngue rá tsꞌʉntꞌʉ ra Alfeo, nɛ ra Tadeo, nɛ manꞌda ra Simón, tꞌɛ̨mbi ra cananista. 19 Nɛ ra Judas Iscariote gueꞌa di dä a ra Jesús. Nɛ nuꞌbʉ mí guaꞌa bi un yʉ́ tsꞌɛdi ʉ, bá ɛ̨h yʉ́ ngu.
Bi tꞌɛ̨mbi in ꞌyoui rá tsꞌɛdi ra zįthu a ra Jesús
20 Nɛ xø bi zøm bʉ xʉn ngu yʉ jąꞌi mahønꞌa xø him mi pongui din sihmɛ tsꞌʉ ra Jesús nɛ yʉ́ xädi. 21 Nuꞌbʉ mí ꞌyø ʉ yʉ́ mɛni ra Jesús ꞌbɛꞌa gätho i øtꞌa, ɛ̨mbi in gątꞌi, nɛ bá ɛ̨ ʉ bi zøm bʉ ꞌbʉh ra Jesús i nde da zitsꞌi.
22 Nɛ nu yʉ xänbate niją xpí ꞌyɛ̨ a Jerusalén, sä ɛ̨n ʉ nꞌyoui ra zįthu ra Jesús, nɛ ɛ̨n ʉ nangue rá tsꞌɛdi yʉ́ hmu ra zįthu gueꞌa ní zä i høn a thi yʉ zįthu ra Jesús, sä bi ꞌyɛ̨n ʉ yʉ xänbate niją.
23 Nuꞌbʉ mí bąh ra Jesús ꞌbɛꞌa bi man ʉ, bi zonꞌdʉ bʉya nɛ bi xih yʉn tꞌuti da bądi hinga gueꞌa man ʉ. Bi ꞌyɛ̨mpꞌʉ:
―Hin da zä a ra zįthu din sʉsɛhʉ yʉ́ minzįthuhʉ, nɛ xtí ꞌbɛtho rá tsꞌɛdi. 24 Tengu nꞌda ra tsꞌʉtꞌabi bʉ ja ra hnini hingui sä da hyą rá tsꞌɛdi ꞌbʉ din sʉsɛhʉ ʉ yʉ́ jąꞌi. 25 Nɛ ngutho nꞌda ra ngu ꞌdarpʉ ꞌbʉhmbʉ yʉ́ tsꞌʉntꞌʉ nꞌda ran ꞌyohʉ da guasɛ ʉ ꞌbʉ hinga ꞌdatꞌa im bɛ̨ni. 26 Ngutho ʉ yʉ zįthu ꞌbʉ xtín sʉsɛhʉ yʉ́ hmu, xtan guasɛ ʉ ꞌbʉ hinga ꞌdatꞌa im bɛ̨nꞌʉ, bi ꞌyɛ̨nꞌa ra Jesús.
27 Nɛ xø bi xih manꞌda ran tꞌuti nangue ꞌbɛꞌa bi ꞌyørpa ra zįthu, bi ꞌyɛ̨mbi:
―Njon da zä da yʉrpʉ ja rá ngu nꞌda ran ꞌyohʉ i ja rá tsꞌɛdi gueꞌbʉ hinga mꞌbɛtꞌo da thuꞌtꞌi. Pɛ nuꞌbʉ ya bi thuꞌtꞌi, hingui hɛ̨i da thąspi ꞌbɛꞌa gätho i pɛsꞌ pʉya, bi ꞌyɛ̨n a ra Jesús.
28 Pɛ majuąni dí xi ahʉ høntꞌa go ma tsꞌoqui bi ꞌyøtꞌ yʉ jąꞌi da mba ma punbi ꞌbʉ da hyon ra punbi, nɛ høntꞌa go ma tsꞌore bi ma. 29 Pɛ nuꞌʉ toꞌo im man ra tsꞌore nangue rá Hogandąhi Oją njąmꞌbʉ da zä da mba ma punbi ʉ, da nu ran ʉnbi gätho yʉ pa maząi, bi ꞌyɛ̨n a ra Jesús.
30 Ngubʉ bi xih yʉ xänbate niją ra Jesús nguetho bi ꞌyɛ̨nꞌʉ hinga gueꞌa rá tsꞌɛdi rá Hogandąhi Oją in ꞌyoui ra Jesús, ngue mi høn a thi yʉ zįthu.
Ra Jesús i ɛ̨mbi rá mbe nɛ yʉ́n ꞌyohʉ ʉ i øtꞌ rá pähä Oją
31 Nɛ nubʉya bá ɛ̨sɛ rá mbe ra Jesús nɛ yʉ́n ꞌyohʉ. Pɛ mí ꞌbätho bʉ thi nguetho him bi zä bi yʉtꞌa mbo. Nɛ bi xi ʉ ꞌbäpʉ mbo:
―Xihmi tsꞌʉ ra Jesús ngue dín zohndähe ua thi, bi ꞌyɛ̨mpꞌʉ.
32 Nɛ nuꞌʉ ꞌdarpʉ mí huhmbʉ ra Jesús bi ꞌyɛ̨mpꞌʉ bʉya:
―ꞌBäpʉ thi ni mbe nɛ nin ꞌyohʉ, i hon a i ꞌna.
33 Nu ra Jesús bʉya bi dątꞌʉ:
―Ga xi ahʉ teꞌo a ma mbe nɛ man ꞌyohʉ.
34-35 Nɛ bi hyantꞌʉ ꞌdarpʉ huhmbʉ bʉya, nɛ bi ꞌyɛ̨na:
―ꞌBʉcua ya ma mbe, nɛ man ꞌyohʉ, nguetho høntꞌa go teꞌo da ꞌyørpa rá pähä Oją, gueꞌa man ꞌyohʉ a, nɛ gueꞌa man ju a, nɛ gue a ma mbe a, bi ꞌyɛ̨mp ꞌbʉ mi dądi.