Wahyu 21

Langit jok bohuak khavun duniak jok bohuak

Khavun ahkuk nohtok langit jok bohuak khavun duniak jok bohuak, tului langit jok topahtuk khavun duniak jok topahtuk was iyam arok, khavun laut halik iyam arok nai. 2 Ahkuk nohtok kota jok kudus, Yerusalem jok bohuak, tohkak tahkan husuk Hotalak jok nuk surga, kolo pongantin bavik jok mokajan ahkan bosai ah. 3 Khavun ahkuk nyonih auh jok mohing tahkan ponuot Hotalak jok konolehkak erih: “Tahkan huntuh Hotalak ahkan mocon hicok mbak kolunon! Iyok ahkan bolum hicok mbak idoh, ahkan jadik Hotalak doh khavun idoh ahkan jadik ulun suci jok Iyok tepui. 4 Iyok ahkan ngapit danum mahtan doh, khavun pahtoi iyam ahkan arok nai; iyam arok kak koliduk khavun tangih kotului pomalus, kotului paring aꞌang jok tahik erih was nokalo.”

5 Hiyon Iyok jok tuot nuk ponuot jok konolehkak erih: “Nohtok ah noh! Huntuh Ahkuk nguan paring ah bohuak.” Khavun hiyoi hinok: “Nulih ah noh paring jok pomarak Kuk ahkam muk, tului auh Kuk tuh hinut khavun touk kam pocayak ah.” 6 Hiyoi ah: “Was umbot! Ahkuk noh Alpa khavun Omega, jok Topahtuk khavun jok Pongohpah ah. Ulun jok haus ahkan tonongak Kuk ngorih tahkan mahtan danum jok nongak bolum nyiring yarok tihkas nyamah ah, khavun idoh iyam poduluk ngomayar ah. 7 Iyai jok manang ahkan norimak paring ah erih tahkan Ahkuk. Ahkuk ahkan jadik Hotalak ah, khavun iyok ahkan jadik anak-Kuk. 8 Totahpik ulun jok mihkoh ngohasuk Yesus, ulun jok iyam pocayak, ulun jok punak jaek, ulun jok baas munuk, ulun jok baas nyembah topahtung, jok baas tiruh mbak ulun jok iyam avui, ulun jok arok ponai-ponoui khavun ulun jok bobalik, idoh ahkan konohukum nuk luvang laut ahpui khavun bolerang jok ngonyelak-ngonyehau. Erih noh pomalus jok koduok.”

Yerusalem jok bohuak

9 Khavun lombut noh icok behtik tahkan kopihtuk molekat jok namit kopihtuk sakir, jok tuvik mbak kopihtuk potahkak jok pongohpah ah erih, hiyoi ahkak kuk: “Noku ohtoi luk, ahkuk ahkan motohtok ahkam muk pongantin bavik, jok ahkan jadik oruh Anak Domba.” 10 Nuk luvang roh iyok ngomin ahkuk noku icok puruk jok hajok khavun isung khavun iyok motohtok ahkak kuk kota jok kudus Yerusalem, tohkak tahkan husuk Hotalak jok nuk surga. 11 Kota erih tuvik mbak kotarang ngolondang Hotalak khavun ngolinyap kolo permata jok punak tamam, permata yaspis, nyoronih kolo kaca. 12 Pahkot ah hajok khavun isung, atop gerbang ah duok balas. Nuk nyinong atop gerbang arok icok behtik molekat jok tombok nuk anai khavun nuk nyinong atop gerbang tonulih mico-micok ngaran koduok balas suku Israel. 13 Nuk komuloi arok toluk atop gerbang, nuk kotouk arok toluk atop gerbang, nuk husuk arok toluk atop gerbang khavun lihkut arok toluk atop gerbang. 14 Pahkot kota erih tonapak nuk isung duok balas bahtuk pondasi. Nuk nyinong bahtuk pondasi erih tonulih mico-micok ngaran duok balas rasul Anak Domba.

15 Molekat jok bokesah mbak ahkuk erih iyok tepun sokuhut bulo nuk nguhkur kota, dolang atop gerbang, khavun pahkot kota erih. 16 Kota erih tapai segi ohpat, kombui ah havoi mbak kolambah ah. Kavui iyok nguhkur kota erih mbak tongkat erih: Duok kujan ohpat lahtus kilomehter; kombui, kolambah, khavun kisui ah havoi. 17 Iyok kak nguhkur pahkot ah: Onom puluk mehter, monurut uhkuran kolunon, jok kak uhkuran molekat. 18 Pahkot erih tonapak tahkan permata yaspis. Kota erih tahkan bulo tulin, kolo kaca jok nyoronih. 19 Bahtuk-bahtuk pondasi kota erih ponohias mbak paring jenis permata. Dasar jok topahtuk bahtuk yaspis, jok koduok bahtuk nilam, jok kotoluk bahtuk mirah, jok koohpat bahtuk sambrud, 20 jok kolimok bahtuk unam, jok koonom bahtuk sardis, jok kopihtuk bahtuk ratna cempaka, jok kojaluk bahtuk beril, jok kosioi bahtuk krisolit, jok kosopuluh bahtuk krisopras, jok kosobalas bahtuk lasuardi, khavun koduok balas bahtuk kocubung. 21 Koduok balas atop gerbang erih tonapak tahkan koduok balas mutiara, nyinong atop tonapak tahkan icok mutiara. Khavun jalan-jalan kota erih tonapak tahkan bulo jok tulin kolo kaca konyoronih ah.

22 Ahkuk iyam nohtok Lovun Hotalak nuk luvang kota erih, kotului Tuhan Hotalak jok punak bokuasak khavun Anak Domba, Idoh noh Lovun Hotalak erih. 23 Kota erih iyam poduluk loang mahtan ondo ngindoi iyam bulan, tului tarang tahkan Hotalak jok ngoloang ah, khavun loang Anak Domba erih noh sumbuk ah. 24 Paring bangsak ahkan bolum nuk luvang loang tahkan kota erih, khavun dolang lacak nuk duniak halik ahkan ngonin koponahto doh noku kota erih. 25 Nyinong ondo dolang atop gerbang kota erih iyam pujik tonuhtup, kotului nuk anai iyam arok ngolomik. 26 Paring bangsak ahkan ngonin barang bandak jok tamam khavun koponahto doh noku anai, nuk ngolehkak Hotalak khavun Anak Domba erih. 27 Totahpik iyam ahkan nyolong noku anai aꞌang jok najis, paring aꞌang jok jaek, khavun jok bobalik. Idoh jok ngarai ah tonulih nuk buhkuk komolum Anak Domba kiyak jok ahkan nyolong noku anai.