22
Molekat erih halik motohtok ahkak kuk sungoi, jok danum ah nongak komolum. Sungoi erih punak soriau kolo kaca, khavun nyalut tahkan ponuot Hotalak jok konolehkak khavun ponuot Anak Domba jok konolehkak. a 2 Sungoi erih nyalut nuk tohu-tohun jalan kota. Nuk hokopohoi sungoi erih, arok puun kajuk jok nongak pomolum, kajuk erih muak nyinong bulan, icok toun duok balas kali muak. Dolang daui ah nuk nyahkang dolang bangsak. b 3 Nuk luvang kota erih iyam arok icok inon pun jok ahkan buah kuhtuk Hotalak.Ponuot Hotalak jok konolehkak khavun ponuot Anak Domba jok konolehkak ahkan arok nuk luvang kota erih. Dolang jihpoi-Ah ahkan nyembah Iyok, c 4 khavun nohtok tapak-Ah. Ngarai-Ah ahkan tonulih nuk liko doh. 5 Dolang ulun iyam ahkan poduluk nai mbak loang sumbuk khavun loang mahtan ondo, kotului ngolomik iyam arok, khavun Tuhan Hotalak bongoi noh jok ahkan ngoloang idoh. Mahkak idoh ahkan moletah sobagai lacak nyiring yarok tihkas nyamah ah. d
Polombut Yesus
6 Khavun hiyon molekat erih ahkak kuk: “Dolang auh kuk tuh hinut khavun touk kam pocayak ah. Tuhan Hotalak jok nongak Roh-Ah noku dolang nabik, khavun Iyok was nguhtus molekat-Ah noku dolang jihpoi-Ah supayak mokarah ah inon jok ahkan pohos torjadik.”
7 Hiyon Yesus: “Nyonih ah noh pios-pios! Ahkuk ahkan pohos lombut. Punak ngandah noh paring ulun jok pahtuh mbak dolang tanjik jok tonulih nuk luvang kitab ihtuh.”
8 Ahkuk Yohanes, ahkuk was nyonih khavun nohtok paring ah ihtuh. Umbot kuk nyonih khavun nohtok ah ahkuk tunop nuk husuk molekat jok motohtok paring ah erih ahkak kuk, khavun nyembah iyok. 9 Totahpik hiyoi ah ahkak kuk: “Arak! Arak nyembah ahkuk! Nyembah ah noh Hotalak! Kotului ahkuk halik jihpon havoi mbak ihkok khavun bari-basak muk jok havo-havoi pocayak, khavun dolang nabik, khavun paring ulun jok pahtuh mbak dolang tanjik jok arok nuk luvang kitab ihtuh!” 10 Khavun hiyoi ah hinok: “Arak noh nyuhuk dolang tanjik nuk luvang kitab ihtuh, kotului was manyo noh ohkot paring ah ihtuh ahkan torjadik. 11 Ulun jok jaek, pohiyoi noh iyok nulo nguan aꞌang jok jaek, ulun jok iyam sorunuh, pohiyoi ah noh iyok nulo nguan aꞌang jok iyam sorunuh, ulun jok hinut, pohiyoi noh iyok nulo nguan aꞌang jok hinut, khavun ulun jok suci, pohiyoi noh iyok jagak arop ah supayak tehtap suci!” e
12 Khavun Yesus noh jok marak tok, hiyoi-Ah: “Nyonih ah noh pio-pios! Ahkuk ahkan pohos lombut nongak uhpah ahkan nyinong ulun sosuai mbak inon jok konguai ah. f 13 Ahkuk noh Alpa khavun Omega, Jok Topahtuk khavun Jok Pongohpah ah, Ahkuk noh Tuhan tahkan Topahtuk nyiring Pongohpah ah.” g
14 Ngandah noh ulun jok muhik jubah ah nyiring borasih sohinggak arok bagin doh kuman buak tahkan puun kajuk jok nongak pomolum khavun nyolong noku kota erih nyihing atop gerbang. h 15 Totahpik ulun jok bolum kolo asuk, ulun jok arok gajik rapah ah, ulun jok tiruh mbak ulun jok iyam avui humai, ulun jok munuk, ulun jok nyembah dolang topahtung, ulun jok baas bobalik khavun nulo nguai alik ah, idoh mocon nuk luar gerbang kota erih.
16 “Ahkuk, Yesus was nguhtus molekat-Kuk supayak nongak kosaksian mongenai paring ah ihtuh noku dolang jomaat. Ahkuk noh suluh, yok erih koturun Daud, potion timur jok ngolondang ngolosah.” i
17 Roh Hotalak khavun pongantin bavik erih marak ah: “Has!” Paring ulun jok nyonih ihtuh idoh alah marak ah: “Has!” Iyai jok haus iyok alah lombut khavun ngonin danum jok nongak bolum jok iyam poduluk konomayar! j
Pongohpah ah
18 Ahkuk Yohanes marak ahkan paring ulun jok nyonih dolang tuhtui auh tahkan tanjik jok tonulih luvang kitab ihtuh, nohouk ah noh: Ngindoi ulun monahang auh tahkan jok was tonulih luvang kitab ihtuh, mahkak Hotalak ahkan monahang ahkai ah dolang potahkak kolo jok tonulih luvang kitab ihtuh kak. k 19 Khavun iyai pun ngurang auh jok tonulih luvang kitab ihtuh, mahkak Hotalak ahkan ngonin hak ah unuk ngonduon dolang berkat jok was tonulih nuk luvang kitab ihtuh, yok erih nyolong noku kota kudus Hotalak khavun kuman buak tahkan dolang puun kajuk jok nongak bolum.
20 Yesus noh jok marak paring ah erih, hiyoi-Ah: “Tuꞌuk, Ahkuk ahkan pohos lombut!” Amin!
Lombut nai Tuhan Yesus!
21 Ahkuk bodoa nihak ngindoi Tuhan Yesus nongak kopion ahtoi-Ah jok punak hajok ahkan mik! Amin.