SURAT YAKOBUS
Nopahtuk kesah
Yakobus bahkas iyok arok noh jolahan Yesus harik. Yakobus jadik murit Yesus uwas umbot Yesus hulik bolum tahkan pahtoi-Ah. Khavun Yakobus jadik pomipin gereja nuk Yerusalem, iyok molayan ulun Yahudi jok uwas pocayak mbak Yesus. Jadik cara Yakobus ngajar mongenai Tarung Pios iyam havoi mbak cara jok konguan Paulus. Paulus ngesah ahkan ulun-ulun jok iyam ulun Yahudi, Yakobus ngesah Tarung Pios noku ulun Yahudi. Aꞌang erih noh jok nguan Yakobus khavun Paulus monyalih ah iyam cucuk pahkat (Galatia 2:11) tahpik nuk kitab Kisah Para Rasul Paulus marak ah ngindoi Paulus, Yakobus khavun Petrus idoh sopahkat mbak ajar barak jok peting mongenai kosolamatan nyihing Yesus. Yok erih ajar barak mongenai Hotalak motiang Anak-Ah, Yesus, sobagai Lacak Ponyolamat supayak nyolamat kolunon tahkan dosa-dosa doh. Gereja-gereja jok topahtuk ah lomoi ngolehkak idoh paring ah, khavun idoh mosolong buhkuk jok tonulih Yakobus, buhkuk-buhkuk jok tonulih Paulus khavun buhkuk-buhkuk Petrus sobagai dolang buhkuk nuk Alkitab.
Yakobus nulih surat ihtuh ahkan “Bari-basak jok pocayak mbak Hotalak jok toravuh toriak nuk amo-amoh”, jok nuk luvang Alkitab hatin Auh Yunani idoh kongohavot “duok balas suku tahkan Bangsak Yahudi”. Anggar ah Yakobus ngohavot koderih ahkan ulun Yahudi jok pocayak mbak Yesus.
Kitab Yakobus kolo kotbah. Kitab ihtuh ngesah noku dolang ulun pocayak supayak bolum horahtik noharep bolum jorak. Nuk toun 36 nyiring 70 arok noh beteng jok punak jorak ahkan ulun-ulun Yahudi khavun idoh pononyorak. Dolang ulun Yahudi jok was pocayak mbak Yesus, idoh pononyorak kak. Khavun nuk holang dolang ulun pocayak arok jok yam sopahkat, sohingga nguan idoh iyam hokocucuk icok mbak jok bohkon. Yakobus taꞌai ngindoi mosalah erih touk nguan koduok balas suku erih lohpung ngindoi idoh iyam nyerah komolum doh noku Hotalak. (4:16)
Luvang surat ah ihtuh, inon jok tonulih Yakobus pohos pindah tahkan tema jok bohkon noku tema jok bohkon, tahpik kongahtur luvang sonyusun jok pios. Khavun Yakobus nongak tumbuk ajar barak jok punak bogunak ahkan ulun Kristen, holovik hinok mongenai bohkolo tuꞌuk-tuꞌuk pocayak mbak Hotalak kotihkak nuk luvang kojorak. Yakobus marak ah ngindoi iman iyam cumak pocayak ahkan aꞌang jok hinut kiyak. Totahpik iman jok hinut arok noh kopocayak ulun mbak Hotalak nguan ulun erih pahtuh mbak poletah Hotalak, khavun komolum ah sosuai mbak inon jok ulun erih pocayak ah.