SURAT YAKOBUS
Salam
1
Salam tahkan ahkuk Yakobus, jihpon Hotalak khavun jihpon Tuhan Yesus Kristus. Surat ihtuh tonulih ahkan dolang paring bari-basak jok pocayak mbak Hotalak jok toravuh toriak nuk amo-amoh. aKopocayak khavun kohorahtik
2 Dolang bari-basak! Ngindoi ihkam tonikos mbak malik macam aꞌang, ihkam alah norimak ah mbak ahtoi jok ngandah. 3 Kotului ihkam was taꞌai, kotihkak tehtap pocayak mbak Hotalak beteng kam tonikos, aꞌang erih nguan ihkam jadik ulun jok sabar nuk luvang kojorak mik. 4 Jadik ihkam alah tehtap sabar luvang paring aꞌang tului erih ahkan jadik pios ahkak mik. Supayak kopocayak kam tuꞌuk-tuꞌuk borohon khavun yarok tahpas kokurang ah. 5 Khavun ngindoi arok ulun nuk holang ihkam jok tahpas kohorahtik ah, beteng iyok tonikos iyam taꞌai bokolo noharep ah, iyok alah nyavot kohorahtik mbak Hotalak. Mahkak Hotalak ahkan nguan ulun erih horahtik, tului Hotalak nongak mbak ahtoi jok pios khavun mbak ahtoi jok mongasihi paring ulun. 6 Tahpik ulun jok nyavot mbak Hotalak, alah pocayak mbak Iyok khavun iyam taꞌai deroh. Tului ulun jok deroh idoh kolo lujak nuk laut jok tonohpik bahiu kohtoi kanai. 7-8 Ulun jok kolo erih iyam tehtap ahtoi pihkir ah. Iyok iyam taꞌai muhtus dolang paring aꞌang jok konguai ah. Kotului erih, arak ngoharap iyok ahkan duon inon-inon tahkan Hotalak.
Ngajar marak ahkan ulun jok malak khavun ulun tahto
9 Paring ulun Kristen, ihkam alah ngandah ngindoi kam malak khavun konganggap pindak mbak ulun bohkon, kotului Hotalak nohtok ihkam isung khavun bolehkak. 10 Ngindoi arok ulun pocayak jok tahto kongopindak Hotalak khavun konguai Ah jadik malak, mahkak idoh pun alah ngomok ngandah. Kotului koponahto ah ahkan pohos ohpah khavun ulun tahto kolo dolak uruk jok ahkan niho. b 11 Kotihkak mahtan ondo marah nuk tohun ondo jok punak bolasut mahkak dolak uruk erih molanyuk, sohinggak nohkah noh dolak ah khavun niho kotamam ah. Koderih kak mbak ulun tahto, iyok ahkan mahtoi beteng yok nyangit korejak ngurah koponahto.
Tihkos erih iyam lombut tahkan Hotalak
12 Utung noh ulun jok tehtap sabar beteng iyok tonikos. Kotului ngindoi yok was duoi botahan, iyok ahkan norimak uhpah ah. Yok erih komolum jok yarok tihkas nyamah ah jok was konojanjik Hotalak ahkan ulun jok mongasihi Iyok. 13 Ngindoi ulun kanik ngohasuk inon jok nikos iyok, arak noh iyok marak ah: “Paring aꞌang jok nikos ihtuh lombut tahkan Hotalak,” kotului aꞌang jok jaek iyam taꞌai nikos Hotalak, khavun Iyok pun iyam pujik nikos ulun ahkan nguan dosa. 14 Totahpik nuk luvang arop tok kojolik jok jaek nikos tok nguan dosa. Kojolik jaek erih nguhut khavun nguan tok tokurung nuk luvang ah. 15 Umbot erih ngindoi ulun ngohasuk kojolik erih, mahkak iyok bodosa. Khavun ngindoi iyok nulo nguan dosa, mahkak dosa erih ahkan nguan ulun erih mahtoi khavun hobomilang tahkan Hotalak nyiring yarok tihkas nyamah ah.
16 Dolang bari-basak basak jok kongasih kuk! Arak ihkam totihpuk mbak paring aꞌang kolo ihtuh: 17 Paring tongak tarui jok pios khavun yarok tahpas kokurang ah lombut tahkan surga, ongak Hotalak. Hotalak noh jok napak dolang aꞌang jok touk ngolondang nuk langit. Iyok Hotalak jok iyam pujik borubah, Iyok iyam kolo bulan jok totang ah iyam tehtap khavun nulo borubah. 18 Hotalak nguan ihtok norimak komolum jok bohuak nyihing auh-Ah jok hinut. Erih noh kokaniu Ah supayak ihtok jadik punak konolehkak tahkan holang paring aꞌang jok tonaoi-Ah.
Nyonih khavun pahtuh mbak Auh Hotalak
19 Dolang bari-basak jok kongasih kuk, nyonih ah noh inon jok pomarak kuk tuh! Paring ulun alah pohos nyonih, totahpik arak pohos bokesah khavun arak pohos birat. 20 Kotului ulun jok birat iyok iyam taꞌai nguan aꞌang jok pios, jok ngosenang ahtoi Hotalak. 21 Kotului erih, ngindo ah noh paring aꞌang jok kohtor khavun aꞌang jok jaek jok bojoin kam nguai. Mbak ahtoi jok iyam sahkah norimak ah noh tuhtui auh jok inak Hotalak luvang ahtoi mik, jok bokuasak nyolamat ihkam.
22 Ihkam alah nguai ah Auh jok pomarak Hotalak erih, arak kam nyonih ah kiyak. Ngindoi ihkam iyam nguai ah mahkak ihkam nihpuk arop mik. 23 Ulun jok nyonih Auh Hotalak totahpik iyam nguai inon jok sonyonih ah, iyok kolo ulun jok nohtok tapak ah bongoi nuk soramin. 24 Umbot yok nohtok ah pios-pios tapak ah, iyok pun turus tulak khavun pohos nolingau ah bohkolo tapak ah erih. 25 Totahpik ajar barak Hotalak yarok tahpas kokurang ah khavun bokuasak ahkan nguan kolunon lahpas tahkan dosa. Ulun jok nulo nohtok khavun noliti ajar barak erih mbak pios khavun tuꞌuk-tuꞌuk numui ah inon jok kongajar erih, iyok konomerkat Hotalak nuk luvang paring aꞌang jok konguai ah tului iyok iyam nyonih ah kiyak khavun turus nolingau ah.
26 Ngindoi arok icok behtik ulun ngomok arop ah ulun jok pahtuh mbak poletah Hotalak, tahpik iyok iyam jagak tuhtui auh ah, iyok arok noh ulun jok nihpuk arop ah bongoi. Mahpah noh iyok sombayang mbak Hotalak. 27 Sombayang jok tuꞌuk-tuꞌuk yarok tahpas kokurang ah arok noh: ngavat dolang anak kinyam jok yarok amai inai ah khavun dolang baluk jok jorak. Koderih kak kotihkak tok jagak arop tok iyam ngohasuk paring kojolik duniak tuh jok ngolohpung komolum tok. Erih noh sombayang jok tuꞌuk-tuꞌuk khavun pios, jok tonorimak Hotalak.