Masik mbak paring ulun
2
Dolang bari-basak! Ihkam arok noh ulun jok pocayak mbak Tuhan tok jok mulia, Yesus Kristus. Kotului erih, arak noh ihkam ngopilik-ngopilik ulun khavun nguan doh holovik peting mbak ulun jok bohkon. 2 Ngindoi arok icok behtik ulun tahto hatin tisim bulo khavun hatik jok tamam lombut noku rahpat, khavun lombut kak icok behtik ulun jok malak hatin hatik jok tonupang ohtoi anai tupang ah, 3 mahkak ihkam ahkan holovik ngolehkak ulun jok hatin hatik jok tamam erih. Ihkam ahkan marak ahkai ah: “Tuan, tuot noh nuk kurusik jok punak tamam tuh.” Totahpik ahkan ulun malak erih ihkam ahkan marak ahkai ah: “Tombok noh nuk anai,” ngindoi iyam “Tuot noh nuk saoh tuh, donik paak kuk!” 4 Umbak tobiat jok koderih, ihkam was motohtok ah ngindoi kam nguan icok behtik ulun holovik bolehkah tahkan ulun jok bohkon. Ihkam uwas ngomok arop muk sobagai hakim khavun uwas ngadil mbak ahtoi pihkir jok jaek.5 Nohouk ah dolang bari-basak jok kongasih kuk! Ulun malak nuk duniak ihtuh, konopilik Hotalak ahkan jadik ulun jok tahto socara rohani nuk luvang kopocayak doh. Hotalak ahkan moretah ulun-ulun erih khavun dolang ahkan norimak berkat tahkan Hotalak kolo jok konojanjik Ah noku ulun jok mongasihi Iyok. 6 Totahpik ngombai ihkam ngohinak ulun malak erih? Podahal ulun-ulun tahto erih noh jok monyorak khavun nguhut kam noku pongadilan! 7 Idoh noh jok ngohinak ngaran Yesus Kristus jok konolehkak tok, jok ngopilik ihtok jadik ulun jok Iyok tepui.
8 Ngindoi ihkam pahtuh nguan hukum jok punak peting jok arok luvang Alkitab: “Masik ah noh ulun bohkon kolo ihkok masik arop muk”, mahkak Ihkam was nguan aꞌang jok hinut. a 9 Totahpik ngindoi ihkam milik-milik ulun tului inon jok arok nuk ulun erih, mahkak ihkam nguan dosa mik. Mbak koderih botatuk, ngindoi ihkam iyam pahtuh mbak hukum Hotalak jok punak peting erih. 10 Ngindoi ulun iyam pahtuh mbak icok tahkan paring hukum Hotalak, mbak koderih iyok iyam pahtuh mbak paring hukum erih. 11 Kotului Hotalak jok marak ah: “Arak tiruh mbak bavik atau bahkas jok iyam avui humai ah,” Hotalak halik marak ah kak: “Arak munuk.” Jadik, ngindoi ihkam iyam tiruh mbak bahkas ngindoi iyam bavik jok iyam avun human mik, tahpik ihkam munuk ulun, mahkak ihkam halik iyam pahtuh mbak paring hukum Hotalak. b
12 Kotului erih inon jok pomarak khavun konguan mik, alah kolo ulun jok taꞌai ngindoi iyok ahkan kongadil mbak hukum Hotalak jok molahpas kolunon tahkan dosa. 13 Beteng ondo jok pongopah ah Hotalak muhtus inon leh ulun salak. Iyok iyam ahkan masik mbak ulun jok iyam mongasihi ulun bohkon, totahpik Iyok iyam ahkan ngohukum ulun jok mongasihi ulun bohkon.
Iman khavun dolang aꞌang jok pios jok konguan ulun
14 Dolang bari-basak! Inon gunai ah ulun marak ah: “Ahkuk ulun jok pocayak mbak Tuhan”, totahpik ngindoi iyok iyam motohtok ah mbak dolang inon jok konguai ah, inon leh kopocayak jok kolo erih touk nyolamat yok? 15 Ngindoi arok bahkas bavik jok pocayak, idoh poduluk mbak hatik khavun dolang ukun ponguman kotului idoh tahpas nyinong ondo, 16 yarok gunai ah ihkam marak ahkai ah: “Tulak nai! Ahkuk bodoa ahkan Hotalak nongak kok ukun ponguman khavun hatik kahpan supayak bolasut behtim muk!” Totahpik ihkam iyam nongak ahkai ah inon jok kopoduluk ah supayak iyok bolum. 17 Koderih kak kopocayak mik mbak Hotalak, ngindoi ihkam pocayak totahpik iyam nguai tobiat jok pios, mahkak kopocayak mik erih iyam arok gunai ah.
18 Anggar ah arok jok iyam hicok pahkat mbak ahkuk khavun iyok marak ah: “Ahkuk iyam kolo ihkok! Ahkuk pocayak mbak Hotalak khavun ahkuk iyam alah nguan dolang tobiat jok pios.” Mahkak ahkuk ahkan mutah ah: “Motohtok ah noh ahkak kuk bohkolo ulun jok mokarah arop ah pocayak mbak Hotalak tahpik iyok iyam nguan dolang tobiat jok pios. Totahpik ahkuk ahkan motohtok ngindoi ahkuk pocayak mbak Kristus nyihing paring tobiat pios jok konguak kuk.” 19 Ihkam pocayak ngindoi Hotalak erih icok kiyak. Aꞌang erih punak hinut, totahpik dolang roh jaek halik pocayak ngindoi Hotalak icok kak khavun idoh nocot mihkoh! 20 Ihkam punak baleh! Ngombai ihkam iyam kanik ngahkuk ngindoi yarok gunai ah pocayak mbak Hotalak tahpik iyam nguan tobiat jok pios. 21 Nohtok ah kiyak Abraham tahtuk ajuh tok. Iyok konganggap Hotalak hinut kotului inon jok konguai ah, kotihkak iyok nongak anak ah Ishak noku Hotalak nuk isung mesbah. c 22 Punak botatuk, Abraham motohtok ah ngindoi kopocayak alah ponokarah mbak dolang tobiat jok pios supayak kopocayak erih yarok tahpas kokurang ah. 23 Aꞌang erih sosuai mbak inon jok tonulih nuk Alkitab: “Abraham pocayak mbak Hotalak, kotului erih Hotalak norimak iyok sobagai ulun jok nguan kokaniu-Ah.” Kotului erih noh Abraham pomarak “Jolahan Hotalak”. d 24 Huntuh kam was taꞌai, ngindoi ulun tonorimak Hotalak mbak pios kotului tobiat ulun erih, iyam kotului kopocayak ah kiyak.
25 Nohtok ah kak Rahab, bavik polacur erih. Iyok tonorimak Hotalak mbak pios kotului inon jok konguai ah. Yok erih kotihkak iyok norimak nuk luvang lohpo ah ulun-ulun Israel jok lombut mocuhuk-mocuhuk unuk noliti tanak erih khavun ngavat idoh buho nyihing jalan bohkon. e
26 Kotului kolo behtik ngindoi iyam arok hasong mahkak behtiu erih mahtoi, koderih kak kopocayak ngindoi iyam ponokarah nyihing tobiat jok pios mahkak kopocayak erih mahtoi.