Touk-touk mbak tuhtui auh mik
3
Dolang bari-basak! Arak sapai tumbuk ulun nuk holang ihkam kanik jadik guruk jok ngajar auh Hotalak. Ihkam taꞌai ngindoi ihtok jadik guruk, Hotalak ahkan mongadil tok holovik bahat tahkan ulun bohkon. 2 Ihtok paring ah bojoin nguan kosalak. Totahpik ulun jok iyam arik nguan kosalak mbak tuhtui auh ah, iyok arok noh ulun jok yarok tahpas kokurang ah iyok touk nahan arop ah. 3 Contoh ah kuda. Supayak kuda erih ngohasuk inon jok kokanin tok, ihtok ahkan mahtuk kokang nuk baui ah, mahkak iyok touk tok ngahtur behtiu ah. 4 Koderih kak kahpal. Holuk poh kahpal erih punak hajok khavun onin bahiu jok daras, totahpik iyok konahtur komudi jok punak koik, khavun ngohasuk kokanin ulun jok ngomudi ah. 5 Koderih kak mbak jolak tok; holuk poh jolak tok erih koik, totahpik touk nguan kosahkah mongenai paring aꞌang jok hajok.Mihkir ah noh bohkolo hajoi himbak tahpik touk bosahak konguan ahpui jok koik! 6 Jolak kolo ahpui. Nuk behtin tok, iyok arok noh topahtuk dolang aꞌang jok jaek, sohinggak nguan arop tok jadik jaek uras. Mbak ahpui jok tahkan noraka, iyok ngolohpung paring komolum tok. 7 Kolunon pun was touk nguai bolinok dolang paring ocin louk jok ngohanyik, ocinaꞌang, ocin louk jok nyolik, khavun kolunon pun touk nguan ocin louk jok bolum nuk luvang danum jadik bolinok. 8 Totahpik jolak kolunon iyam icok behtik pun jok touk nguai bolinok. Jolak erih jaek khavun iyam dahpat tok ngahtur ah, tuvik mbak sovui jok touk nguan ulun mahtoi. 9 Ihtok hapan jolak tok marak ah bosukur noku Hotalak, Amai tok, tahpik hapan tok kak nuk nulut kolunon jok tonapak kolo Hotalak. a 10 Nyihing bauk jok havoi boluak auh jok marak ah bosukur khavun nulut ulun, soharus ah ihtok iyam taꞌai koderih! 11 Inon leh danum tavah khavun danum jok mohit touk boluak tahkan mahtan danum jok havoi? 12 Dolang bari-basak, inon leh puun harak touk muak tahpik buai ah zaitun, khavun puun anggur touk muak buai ah harak? Koderih kak mahtan danum jok mohit iyam taꞌai kak moluak danum jok tavah.
Kohorahtik jok hinut
13 Ngindoi arok nuk holang ihkam ulun jok horahtik khavun pitar, ihkam alah motohtok paring ah erih mbak komolum khavun tobiat jok pios, jok konguan mbak ahtoi jok iyam sahkak khavun kohorahtik. 14 Totahpik ngindoi ahtoi muk tuvik konguan bohum muk, khavun kanik nguan inon jok kopeting emik kiyak, arak toharuk mbak kohorahtik erih, kotului erih salak. 15 Kohorahtik jok kolo erih iyam tahkan surga tahpik tahkan duniak, iyam tahkan Roh Hotalak tahpik paring erih tahkan roh jaek! 16 Ngindoi ihkam nulo ngomeluk khavun nguan inon jok peting monurut arop mik, nuk anan arok kokalut khavun paring tobiat jok jaek. 17 Totahpik ngindoi ihkam tepun kohorahtik tahkan Hotalak, topahtuk ah nguan ulun bolum tulin, suhkak hokopios mbak ulun, bosemu mbak ulun, khavun pahtuh. Ahtoi kam tuvik mbak asin kam ahkan ulun bohkon khavun aꞌang erih ahkan moluak bua-buak tobiat jok pios, iyam ngopilik-ngopilik ulun khavun iyam purak-purak pios. 18 Ngindoi ihkam suhkak bolum pios mbak ulun bosemu, khavun kam nguan ulun bohkon hokopios mahkak ihkam ngonin koadilan ahkan doh!