Arak hojolahan mbak duniak
4
Ihkam baas hirat khavun hobatah icok mbak jok bohkon, kotului arok kojolik jaek nuk luvang ihkam jok ngotiak nguasak arop mik. 2 Ihkam munuk kotului inon jok kojolik mik iyam kam ngonduoi ah. Ihkam hirat khavun hobatah Kotului erih, iyam pios ngindoi ihkam ngohakim ulun bohkon. Paring kojolik mik iyam taꞌai kam ngonduoi kotului ihkam iyam nyavot ah mbak Hotalak. 3 Khavun ngindoi ihkam bodoa, ihkam iyam ngonduon inon-inon kotului savot mik salak salai ah, yok erih ahkan kosenang arop mik kiyak. 4 Ihkam arok noh ulun jok iyam sotia mbak Hotalak! Ihkam was taꞌai ngindoi ihkam ngandah mbak aꞌang jok jaek tahkan duniak tuh, mahkak ihkam ahkan hokolavan mbak Hotalak. Jadik ngindoi ihkam kanik hojolahan mbak duniak mahkak ihkam ahkan jadik musuh Hotalak. 5 Nuk luvang Alkitab, ihtok uwas umbot ngomasak: “Roh Kudus jok konguhtus Hotalak mocon nuk luvang komolum tok, Iyok punak bolinguk supayak tok sotia mbak Iyok.” Auh ihtuh tuꞌuk khavun ihkam alah pocayak. 6 Ahkan totahpik, kopion ahtoi Hotalak jok uwas tonongak ahkan tok holovik baas tahkan kojolik roh tok. Kotului erih nuk luvang Alkitab tonulih kak: “Hotalak ngolavan ulun jok sahkah totahpik Iyok nongak berkat ahkan ulun jok iyam ngisung arop ah.” a7 Kotului erih, pahtuh noh mbak Hotalak khavun ngolavai ah noh Lacak paring otuk. Mahkak Lacak paring otuk erih ahkan buho tahkan husuk mik. 8 Ngoronik ah noh arop mik mbak Hotalak, mahkak Hotalak ahkan ngoronik arop Ah kak mbak ihkam. O Ihkam ulun bodosa morasih ah noh logom mik tahkan dosa! Morasih ah ahtoi mik jok iyam sotia, khavun ahtoi mik alah tehtap pocayak mbak Hotalak kiyak! 9 Ihkam alah monasar ngindoi komolum mik colahkak tuꞌuk, ihkam alah liduk pahuk kotului paring dosa mik khavun alah nangih ngoriak noloung! Ngatik ah noh kosenang mik mbak tangih, ngatik ah kak kandah mik mbak koliduk pahuk. 10 Alah noh ihkam ngopindak arop mik nuk husuk Hotalak, mahkak Iyok ahkan ngolehkak ihkam.
Poletah supayak arak motenah ulun
11 Barih basak kuk, arak noh hopotenah ngindoi iyam ngohakim ahkan ulun jok havo-havoi pocayak. Ngindoi koderih mahkak monurut ihkam hukum Hotalak erih salak. Khavun ihkam iyam pahtuh hinok mbak hukum erih, jadik ihkam uwas jadik hakim ahkan hukum Hotalak erih. 12 Hotalak kiyak ico-icok ah jok ahkan ngadil kolunon khavun jok pahtut netu ah hukum erih ahkan tok, iyam ihkam! Iyok noh jok bokuasak nyolamat ngindoi iyam ngolohpung tok. Kotului erih, iyam pios ngindoi ihkam ngohakim ulun bohkon.
Arak nolingau Hotalak nuk luvang paring evak muk
13 Dolang bari-basak nohouk ah noh ngindoi ihkam marak ah: “Hondo ihtuh ngindoi iyam hondo havun ihkai ahkan tulak noku icok kota, ihkai ahkan borahkang icok toun kotahiu ah, nuk anai ihkai ahkan duon tumbuk duit.” b 14 Jok kotuui ah ihkam iyam taꞌai inon jok ahkan torjadik mbak komolum mik havun. Komolum mik erih kolo osun ahpui jok kihtan nyohuluk kiyak turus niho. 15 Jadik ihkam alah marak ah: “Ngindoi nohoon Hotalak, mahkak ihkai ahkan bolum khavun nguan aꞌang ihtuh ngindoi iyam aꞌang erih.” 16 Totahpik luvang kosahkah ihkam ngandar arop mik. Paring kosahkah mik erih punak salak.
17 Jadik ngindoi ihkam taꞌai inon jok pios touk kam nguai totahpik iyam kam nguai ah, mahkak ihkam uwas bodosa.