Yakobus 5

Ajar barak ahkan ulun tahto

Ihkam ulun-ulun jok tahto! Nyonih ah noh ajar barak kuk ihtuh. Ihkam alah nangih mbak auh jok mohing khavun liduk pahuk tului ihkam ahkan nyangit jorak konohukum Hotalak! 2 Koponahto muk was maram khavun paring hatim muk jok tamam was ukun somohtoi. 3 Bulo khavun dolang duit perak muk was tiron noh. Tiron erih noh tandak ngindoi ihkam salak, khavun jadik kolo ahpui jok ahkan mahpui behtin mik. Ihkam salak kotului was tumbuk ngivak koponahto beteng ondo-ondo pongohpah ihtuh. 4 Nohtok ah noh ulun-ulun jok korejak nuk umom muk, idoh ngoriak kotului ihkok beleu ngomayar uhpah doh. Khavun koriak doh erih was konihan Hotalak, Tuhan jok punak bokuasak. 5 Ihkam was puas bolum tahto khavun ngomok paring aꞌang jok nguan kam ngandah nuk duniak ihtuh, sohinggak ihkam ngomulat arop mik kolo ocin louk jok was siap sonyomolih. Tahpik ihkam ahkan konohukum. 6 Ihkam was ngohukum khavun munuk ulun jok yam arok kosalak ah khavun jok iyam duon ngolavan mik.

Sabar nuk luvang kojorak

7 Dolang bari-basak sabar noh ngindoi nyiring Yesus lombut. Nohtok ah noh bohkolo kosabar ah icok behtik ulun pongumok jok ngindoi bonyik nuk umoi ah nyuluh khavun arok jok bolehkak hasil ah. Umbot ngomulan bonyik, mbak sabar iyok ngindoi ondo ucan jok nguan komulan erih nyuluh. 8 Ihkam alah sabar kak khavun ngorohon ahtoi mik. Tului Yesus ahkan pohos lombut.

9 Khavun dolang bari-basak, arak ngomumut khavun arak ngosalak ulun bohkon, supayak ihkok iyam konohukum Kristus. Tului iyam tahik hinok Iyok ahkan lombut jadik Hakim paring kolunon. 10 Nohouk ah khavun numui komolum dolang nabik jok bokesah mongenai Hotalak. Idoh tumbuk jorak, totahpik idoh sabar. 11 Ngindoi huntuh ihtok ngolehkak idoh kotului idoh sabar nuk luvang kojorak doh erih. Ihkam was nyonih mongenai kosabar Ayub, khavun ihkam taꞌai ulik ah Hotalak ngomerkat yok. Kotului Hotalak, Iyok baas masik khavun pios ahtoi-Ah.

12 Dolang bari-basak, aꞌang jok punak peting iyok noh arak sapai ihkam hotulut ngohavot surga, duniak khavun paring aꞌang jok bohkon. Ihkam alah marak ah: “Iyok” ngindoi kokanin ahtoi muk marak iyok; khavun ihkam alah marak ah: “Iyam” ngindoi kokanin ahtoi muk marak iyam, supayak ihkam arak konohukum Hotalak.

13 Ngindoi arok ulun jok honong jorak nuk holang ihkam, iyok alah bodoa. Tahpik ngindoi arok jok senang, iyok alah monyanyi momuji Hotalak. 14 Khavun ngindoi arok ulun jok poros, iyok alah naꞌah dolang okon jomaat. Supayak dolang okon erih bodoa ahkai ah khavun luvang ngaran Tuhan Yesus idoh ahkan ngasak yok mbak binyak. 15 Ngindoi dolang okon erih tuꞌuk-tuꞌuk pocayak khavun bodoa, Tuhan Yesus ahkan ngopios ulun jok poros erih khavun ngapun dolang dosa ah. 16 Kotului erih noh ihkam icok mbak jok bohkon alah havo-havoi ngahkuk dosa khavun havo-havoi bodoa, supayak ihkam pios. Doa ulun jok komolum ah sosuai mbak kokanin Hotalak punak hajok kuasak ah. 17 Contoh ah Elia iyok halik kolunon havoi mbak ihtok kak. Iyok tuꞌuk-tuꞌuk bodoa supayak iyam ucan, mahkak ondo pun iyam ucan toluk toun holovik kotahiu ah. 18 Khavun iyok bodoa hinok nyavot ucan, ondo pun ucan, khavun dolang komulan pun nyuluh hinok sohinggak arok hasil ah.

19 Ngindoi nuk holang ihkam arok icok behtik jok iyam nai ngohasuk ajar barak Hotalak, khavun bari-basak jok bohkon nguan ulun erih hulik noku Hotalak, 20 mahkak nohouk ah noh auh ihtuh: Ulun jok ngomin ulun bodosa nohtah jalan jok salak, iyok nyolamat komolum ulun erih tahkan konohukum Hotalak jok yarok tihkas nyamah ah, khavun nguan tumbuk dosa ulun erih kongapun.