Tobiat ulun jok pocayak
3
Nyuhuk ah noh ulun-ulun pocayak supayak idoh ngolehkak pomoretah khavun ulun-ulun jok bokuasak, idoh alah pahtuh khavun siap nulo nguan aꞌang jok pios. 2 Arak idoh ngonjaek ulun bohkon, arak idoh hirat, alah noh idoh sopan khavun nulo pios tuhtui auh ah mbak paring ulun. 3 Kotului holuk ihtok halik bolum nuk luvang kuong tok; ihtok iyam pahtuh, ihtok lajat, ihtok jadik jihpon ahkan paring konganin tok jok jaek, ihtok bolum nuk luvang kojaek tok, khavun ihtok ngomeluk, ihtok becik icok mbak jok bohkon. 4 Totahpik kotihkak nyahtak kopion Hotalak, Ponyolamat tok khavun kasih-Ah ahkan kolunon, 5 beteng hun erih Iyok was nyolamat ihtok, iyam tului tok nguan aꞌang jok pios totahpik kotului Iyok masik mbak ihtok. Iyok nyolamat ihtok nyihing Roh-Ah jok morasih ihtok tahkan dosa, sohinggak ihtok konganak hinok khavun ihtok ngonduon bolum jok bohuak. 6 Hotalak nongak Roh-Ah ahkan tok nyihing Yesus Kristus, Ponyolamat tok. 7 Kotului kopion ahtoi Hotalak kiyak ihtok hinut nuk mahtai-Ah! Paring aꞌang erih nguan ihtok supayak ihtok jadik anak-anak Hotalak jok ngonduon hak komolum yarok tihkas nyamah ah, jok tuꞌuk-tuꞌuk tok ngindoi ah. 8 Kesah tuh punak tuꞌuk.Ahkuk kanik nyuhuk kok tuꞌuk-tuꞌuk ngajar ajar barak tuh, supayak paring ulun jok was pocayak mbak Hotalak tuꞌuk-tuꞌuk ngotiak nguan aꞌang jok pios khavun bogunak ahkan ulun bohkon. 9 Totahpik ngoliu ah noh hutah-hutah auh jok yarok gunai ah, mongenai koturun khavun mongenai poletah agamak. Paring ah erih yarok gunai ah khavun iyam taꞌai ngavat ulun bohkon. 10 Ihkok alah ngajar marak idoh jok kanik nguan kokalut sohinggak jomaat hobomilang, supayak idoh tondok. Ngajar marak doh paling iyam duok kali. Ngindoi idoh honong koderih, ihkok arak ngoronik idoh. 11 Ihkok taꞌai ngindoi ulun-ulun kolo erih idoh lajat. Mbak dosa-dosa erih, idoh mokarah ah ngindoi idoh salak nuk husuk Hotalak.
Tanjik jok pongohpah ah
12 Ahkuk ahkan nguhtus Artemas ngindoi iyam Tikhikus noku ihkok. Ngindoi iyok was lombut ngimos ah bohavung mbak ahkuk nuk Nikopolis. Kotului ahkuk was ngopuhtus ah ahkan tulak noku kota erih khavun mocon nuk anai kotahin musim sorongin. a 13 Ngotiak ah noh ngavat Apolos khavun ulun jok pitar mongenai hukum, yok erih Zenas, supayak dorok touk tulak tahkan anai iyam tahpas icok inon pun nuk luvang ponyalan dorok. b 14 Ulun-ulun pocayak kolo ihtok nuk pulou Kreta, idoh alah bolajar nguan aꞌang jok pios, supayak touk nongak inon jok punak poduluk ahkan ulun bohkon. Paring ah erih ahkan nguan komolum ulun erih bogunak.
15 Paring ulun jok arok mbak ahkuk nuk ohtoi ihkai nongak salam ahkam muk, Titus. Marak ah noh salam kai ahkan dolang jolahan tok jok pocayak.
Nihak ngindoi Hotalak ngomerkat kam paring ah.
Tahkan ahkuk
Paulus