Ngajar ajar barak jok hinut
2
Totahpik ihkok, Titus, ihkok alah ngajar ajar barak jok hinut. 2 Ngajar marak ah noh ulun-ulun bahkas jok okok, supayak idoh touk nguasak arop ah, horahtik khavun bolum kolo ulun jok pahtut konolehkak. Idoh alah tuꞌuk-tuꞌuk pocayak mbak ajar barak jok hinut tahkan Hotalak, idoh mongasihi ulun bohkon, khavun idoh alah sabar beteng noharep kojorak. 3 Koderih kak ulun bavik jok okok, idoh alah bolum ngolehkak Hotalak khavun pahtuh mbak Iyok, idoh arak nuhtui ngonjaek ngaran ulun bohkon, khavun arak jadik ulun jok baas buso, tahpik idoh alah ngajar dolang aꞌang jok pios. 4 Mbak tobiat jok pios erih idoh touk ngajar marak bavik-bavik jok honong bio, supayak bavik-bavik erih mongasihi bosai khavun anak ah. 5 Idoh alah bolum horahtik, bolum suci khavun tuhkoi ngahtur avun humai ah, iyok pios ahtoi ah khavun pahtuh mbak bosai ah. Sohinggak yarok ulun jok touk ngohinak Auh Hotalak.6 Koderih kak ulun bahkas jok honong bio; ngajar marak ah noh idoh supayak idoh horahtik nuk luvang paring aꞌang. 7 Khavun ihkok Titus bolum pios noh supayak ulun numui ah. Ngajar ah noh idoh mbak ahtoi pihkir jok morong khavun pahtut konolehkak. 8 Bokesah mbak auh jok horahtik, supayak ulun iyam nyombang kosalak muk, supayak ulun-ulun jok ngolavan ihkok miak kotului iyam arok aꞌang jok jaek jok touk doh ngesah ah mongenai ihtok.
9 Dolang jihpon alah pahtuh khavun nyenang ahtoi tuan ah nuk luvang paring aꞌang. Khavun idoh iyam taꞌai ngolavan auh tuan ah, 10 arak nahko totahpik alah tuꞌuk-tuꞌuk pios khavun pahtuh, supayak mbak koderih nuk luvang paring aꞌang idoh nguan ulun bohkon momuji ajar barak Hotalak, Ponyolamat tok.
Kopion ahtoi Hotalak nyolamat paring kolunon
11 Kopion ahtoi Hotalak jok nyolamat paring kolunon was nyahtak. 12 Kopion ahtoi Hotalak ngajar ihtok iyam nai bolum hokolavan mbak kokanin Hotalak khavun ihtok iyam nai bolum numun komolum nuk duniak. Ihtok kongajar bolum nuk duniak ihtuh supayak horahtik, hinut khavun pahtuh mbak Hotalak. 13 Huntuh ihtok tuꞌuk-tuꞌuk ngindoi ondo jok nguan ihtok ngandah, yok erih polombut Yesus Kristus. Beteng hun erih duniak ahkan nohtok komuliaan Yesus Kristus: Iyok noh Hotalak jok punak hajok khavun Ponyolamat tok. 14 Iyok was nyerah arop-Ah mahtoi supayak molahpas tok tahkan paring kojaek khavun morasih tok. Iyok kanik ihtok jadik ulun-ulun jok Iyok tepui khavun nulo nguan aꞌang jok pios. a
15 Ngesah ah noh paring erih, ngajar marak khavun marak ah noh kosalak doh. Ihkok tepun kuasak ahkan nguan aꞌang erih. Arak sapai arok ulun jok nohtok kok mbak silak mahtak kiyak.