SURAT PAULUS
AHKAN
TITUS
Surat Paulus ahkan Titus
1
Salam ahkan Titus tahkan ahkuk Paulus, jihpon Hotalak khavun ahkuk rasul Yesus Kristus. Hotalak ngopilik khavun nguhtus ahkuk ahkan ngavat ulun-ulun jok konopilik-Ah, supayak idoh mahi-mahik pocayak mbak Hotalak khavun ngorehti ajar barak jok hinut mongenai Yesus. Ajar barak erih noh jok ahkan ngonin idoh bolum ngosenang ahtoi Hotalak. 2 Ajar barak erih noh jok nguan ihtok tuꞌuk-tuꞌuk pocayak ngindoi ihtok ahkan norimak bolum jok yarok tihkas nyamah ah. Hotalak was janjik komolum jok yarok tihkas nyamah ah sojaham duniak tonaoi, khavun janjik Hotalak erih touk tok pocayak ah. 3 Hotalak Ponyolamat ihtok marak Tarung Pios tumbas beteng hun jok was tonetu-Ah. Tarung Pios erih was tonongak ahkak kuk khavun Iyok pocayak mbak ahkuk supayak ahkuk ngesah ah numun jok ponoletah-Ah.4 Titus ihkok tuꞌuk-tuꞌuk anak kuk, kotului torok uwas havoi pocayak mbak Kristus.
Nihak ngindoi Hotalak Amai tok khavun Kristus Yesus Ponyolamat tok erih, mokarah kopion ahtoi jok punak hajok khavun nongak damai sojahtera ahkam muk. a
Korejak Titus nuk Kreta
5 Ahkuk nohtah ihkok nuk pulou Kreta supayak ihkok touk ngurus paring aꞌang jok honong poduluk kongahtur. Khavun supayak ihkok nehtap ah ulun-ulun jok ahkan jadik pomipin jomaat nuk paring kota. Kolo jok was umbot kuk marak ah ahkam muk: 6 Ulun jok momipin jomaat alah ulun jok iyam alik buah kouh tahkih, khavun iyok icok kiyak oruh ah. Dolang anak ah alah uwas pocayak mbak Kristus. Idoh iyam anak-anak jok tonondah ulun tobiat ah jaek khavun idoh alah anak-anak jok pahtuh mbak ulun okok doh. b 7 Pomipin jomaat idoh noh jok ngurus korejak Hotalak. Kotului erih idoh alah pios nuk mahtan ulun arok, iyam sahkah, iyam pohos sangit, iyam baas buso, iyam baas hotuhui mbak ulun bohkon, khavun iyam bokahuk. 8 Totahpik kanik nongak tupang ahkan ulun, iyok kanik ahkan aꞌang jok pios, horahtik, adil, pahtuh, khavun touk ngurus arop ah. 9 Iyok alah namit ah tuꞌuk-tuꞌuk ajar barak jok hinut, jok was kongajar ahkai ah. Supayak iyok touk ngajar marak ulun mbak ajar barak erih khavun iyok touk mokarah kosalak ajar barak ulun jok ngolavan iyok.
10 Tumbuk ulun iyam kanik kongajar mbak ajar barak jok hinut, jok topahtuk ah ulun jok marak ulun Kristen alah pomalax. Umbak tuhtui auh jok iyam bogunak idoh nihpuk ulun bohkon. 11 Ulun jok koderih alah tonuhtup baui ah, kotului idoh ngalut tumbuk avun human ulun mbak ajar barak doh jok yarok gunai ah erih, supayak idoh touk ngonduon utung jok iyam pahtut. 12 Icok behtik ulun tahkan pulou Kreta jok pomarak doh nabik, iyok lomoi pujik marak ah: “Paring ulun Kreta nulo bobalik, idoh bolum kolo ocinlouk, idoh bokorak khavun bokolas.” 13 Inon jok pomarak ulun erih punak tuꞌuk. Kotului erih noh ihkok alah marak doh ngindoi idoh punak salak, supayak idoh tehtap pocayak mbak ajar barak jok hinut. 14 Ngajar ah noh idoh supayak iyam nai podulik mbak kolimoi ulun Yahudi jok ponotapak. Khavun idoh iyam ngohasuk hinok poletah ulun-ulun jok uwas nohtah ajar barak jok hinut. 15 Paring aꞌang suci khavun yarok ukun ponguman jok kohtor bagin ulun jok ahtoi ah suci. Totahpik ulun jok kohtor khavun jok iyam pocayak idoh ngomok paring aꞌang kohtor, kotului pihkir doh was kohtor khavun iyam taan doh nai amoh jok hinut khavun jok salak. 16 Idoh ngahkuk idoh nyokonok Hotalak, totahpik mbak tobiat doh, idoh ngilang Iyok. Idoh nguan Hotalak bojelok, khavun idoh iyam kanik pahtuh; idoh arok noh ulun jok yarok taan doh nguan aꞌang jok pios.