Kristus momoretah icok kujan toun kotahiu ah
20
Umbot erih ahkuk nohtok icok behtik molekat mosuluh tahkan surga namit kucik atop luvang jok punak timbon noku lovuk lio khavun namit ratai jok hajok nuk longoi ah. 2 Iyok navan nahkak, nahkak erih noh lohik okok, iyok noh Lacak paring otuk, khavun ngahut ah mbak ratai icok kujan toun kotahiu ah. a 3 Iyok nosahkah ah noku luvang jok punak timbon noku lovuk lio, umbot erih atop luvang erih kongucik khavun sonyegel ah. Supayak nahkak erih iyam nai ngolanyat bangsak-bangsak, icok kujan toun kotahiu ah. Umbot erih iyok ahkan ponolahpas nyohuluk kak.4 Khavun ahkuk nuneng ponuot Hotalak jok konolehkak khavun ulun-ulun jok tuot nuk anai, idoh tonongak kuasak ahkan ngohakim. Ahkuk pun nuneng dolang moruan ulun jok was tonohtok ujat ah kotului kosaksian mongenai Yesus khavun Auh Hotalak. Idoh iyam nyembah binahtang erih khavun topahtung ah, idoh iyam norimak tandak unuk liko khavun longon doh. Idoh ahkan hulik bolum khavun momoretah sobagai lacak, hicok mbak Kristus icok kujan toun kotahiu ah. b 5 Ihtuh noh jok topahtuk ah dolang ulun jok was palus hulik bolum konguan Hotalak. Jok bohkon ah iyam ahkan hulik bolum konguan Hotalak sojaham icok kujan toun erih ohpah. 6 Dolang ulun jok hulik bolum nuk topahtuk ah erih ahkan norimak berkat khavun idoh pahtut jadik ulun-ulun suci jok Hotalak tepui. Idoh iyam ahkan palus jok koduok, totahpik idoh ahkan jadik pomipin-pomipin agamak jok molayan Hotalak khavun Kristus. Idoh ahkan momoretah jadik lacak hicok humbak mbak Iyok icok kujan toun kotahiu ah.
Lacak paring otuk konohukum
7 Ulik icok kujan toun erih ohpah, Lacak paring otuk ponolahpas tahkan kurung ah. 8 Khavun iyok ahkan tulak ngolanyat bangsak-bangsak unuk paring duniak, iyok erih Gog khavun Magog, khavun ngupur idoh ahkan hobunuk. Yamios karon doh, kolo karon baras nuk laut. c 9 Umbot erih idoh hobomilang noku paring duniak khavun ngohukung kota nuk pocon dolang ulun suci jok Hotalak tepui, khavun kota jok kongasih Hotalak. Tahpik, tahkan langit mosuluh noh ahpui mahpui idoh. 10 Khavun Lacak paring otuk jok ngolanyat idoh erih, tonosahkah noku laut ahpui khavun bolerang, unuk binahtang jok boluak tahkan laut khavun binahtang jok boluak tahkan tanak, idoh ahkan pononyorak hondo ngolomik nyiring yarok tihkas nyamah ah.
Hukuman jok pongohpah ah
11 Umbot erih ahkuk nohtok ponuot Hotalak jok konolehkak yamios kohajoi ah warna ah puhtik khavun ahkuk halik nohtok Iyok jok tuot nuk anai. Beteng Hotalak mokarah arop-Ah, duniak khavun langit niho khavun yarok nai. d 12 Khavun ahkuk nohtok dolang ulun mahtoi jok hulik konopolum, jok peting khavun iyam peting, tombok nuk husuk ponuot Hotalak jok konolehkak erih. Paring kitab konguap khavun kitab jok bohkon ah kak, yok erih buhkuk pomolum. Ulun-ulun palus erih konohakim sosuai mbak inon jok konguan doh, kolo jok tonulih luvang kitab-kitab erih. 13 Dolang ulun jok mahtoi nuk luvang laut ahkan sonyerah noku Hotalak. Pahtoi khavun lovuk lio halik nyerah ulun jok was mahtoi noku Hotalak. Kotului paring ulun erih ahkan konohakim sosuai mbak inon jok konguan doh. 14 Kuasak jok nguan ulun mahtoi khavun lovuk lio tonosahkah noku luvang laut ahpui. Laut ahpui erih arok noh pahtoi jok koduok. 15 Khavun ulun jok ngarai ah iyam tonulih nuk luvang buhkuk pomolum ahkan tonosahkah noku luvang laut ahpui erih.