Ulun-ulun nuk surga momuji Hotalak kotului Babel was lohpung
19
Umbot erih ahkuk nyonih naing auh ulun jok punak ramik khavun yamios komohing ah tahkan surga, hiyon doh: “Ngehtek ah noh Hotalak! Hotalak ponyolamat, jok konolehkak khavun jok bokuasak! 2 Hotalak noh Hakim jok adil khavun hinut, Iyok was ngohakim polacur erih kotului ngorusak duniak, tiruh mbak ulun jok iyam avui humai ah. Khavun Iyok was malos kojaek polacur erih tului was munuk dolang jihpoi-Ah.” a 3 Khavun ahkuk nyonih auh tahkan surga hinok, hiyon doh: “Ngehtek ah noh Hotalak! Osun ahpui jok nyahak kota erih ahkan nulo ngohosun nyiring yarok tihkas nyamah ah!” b 4 Mahkak duan puluk ohpat okon-okon khavun koohpat mahluk jok ngoniling ponuot Hotalak jok konolehkak erih idoh tosuhkuk tahtup doh nunop nyembah Hotalak jok tuot nuk anai. Hiyon doh: “Amin! Kongehtek noh Hotalak!”5 Khavun konihan auh tahkan ponuot Hotalak jok konolehkak erih, hiyoi ah: “Ngehtek ah noh Hotalak tok oo dolang jihpon-Ah, jok peting khavun jok iyam peting, jok pahtuh mbak Iyok!” c
Sahkik koruh Anak Domba
6 Umbot erih ahkuk nyonih naing auh ulun jok punak ramik khavun yamios komohing ah naing ohtuh nohkan khavun naing tokorang, hiyon doh: “Ngehtek ah noh Hotalak! Hotalak tok jok bokuasak jok was momoretah jadik lacak! d 7 Has tok ngandah khavun nginyah momuji Hotalak! Kotului was ohkot ah noh gavik sahkik koruh Anak Domba Hotalak, khavun pongantin bavik Ah was siap noh. 8 Kain puhtik jok ngolinyap khavun borasih was tonongak ahkan pongantin bavik supayak iyok hatiu ah.”
Kain puhtik erih arok noh dolang tobiat jok hinut tahkan ulun-ulun suci jok Hotalak tepui.
9 Khavun hiyon molekat ahkak kuk: “Nulih ah noh ihtuh: ‘Ngandah noh ulun jok kongihit lombut noku gavik sahkik koruh Anak Domba.’ ” Hiyon molekat erih hinok: “Inon jok pomarak Hotalak erih hinut.” e
10 Ahkuk tosuhkuk tahtup nunop nuk husuk molekat erih kanik nyembah yok, totahpik hiyoi ah ahkak kuk: “Nyembah ah noh Hotalak! Arak nyembah ahkuk! Kotului ahkuk halik jihpon havoi mbak ihkok khavun dolang bari-basak muk jok bosaksi mongenai Yesus! Kotului Roh Hotalak noh dolang ulun jok bosaksi mongenai Yesus duon doh narung tanjik-Ah.”
Auh Hotalak
11 Khavun ahkuk nohtok surga bokuap, khavun kihtan icok kungan kuda puhtik. Ulun jok nupang kuda erih ngarai ah Sotia khavun Hinut. Iyok adil beteng ngopuhtus ngohukum kolunon khavun adil kak beteng hobunuk. f 12 Mahtai Ah kolo jelak ahpui, khavun nuk kuhung Ah tumbuk mahkota. Nuk behtiu Ah tonulih ngarak, totahpik Iyok kiyak jok taꞌai ngarak erih. g 13 Jubah jok hatiu-Ah was kongucom nuk dahak. Khavun ngarai Ah iyok noh: “Auh Hotalak.” 14 Khavun dolang tentara surga ngohasuk Iyok, idoh hatin kuda puhtik, khavun jubah doh tahkan kain puhtik jok borasih. 15 Tahkan baui-Ah boluak pedang jok monyoot jok ahkan ngalah dolang paring bangsak, khavun ahkan moletah dolang bangsak tutang komuhtus-Ah. Iyok ahkan morahtit anggur nuk luvang bak jok hajok, kolo erih noh Hotalak jok bokuasak motohtok kobirat-Ah ahkan dolang ulun jok ngolavan Iyok. h 16 Nuk jubah Ah khavun nuk sahpak Ah tonulih ngarak kolo ihtuh “Lacak jok isung tahkan paring lacak, khavun Tuan jok isung tahkan paring tuan”.
Binahtang khavun dolang nabik palsu kongalah
17 Khavun ahkuk nohtok icok behtik molekat tombok nuk isung mahtan ondo. Mbak auh jok mohing iyok bokesah ahkan dolang ocinaꞌang jok naꞌang, hiyoi ah: “Has kupur lombut noku gavik jok hajok konguan Hotalak! i 18 Has kuman usin dolang lacak, usin dolang komandan, usin dolang porajurit, usin dolang ulun jok nupang kuda, usin dolang kuda doh, usin paring kolunon, usin dolang ulun jok peting khavun jok iyam peting, usin dolang jihpon khavun usin dolang jok iyam jihpon!”
19 Khavun ahkuk nohtok binahtang jok boluak tahkan laut erih, dolang lacak jok nuk duniak khavun dolang porajurit doh, idoh kupur kanik hobunuk ngolavan Iyok jok nupang kuda puhtik erih khavun dolang porajurit Ah. 20 Binahtang jok boluak tahkan laut erih tonavan khavun hicok mbak binahtang jok boluak tahkan tanak, jok was nguan dolang aꞌang jok motaher nuk husuk binahtang jok boluak tahkan laut erih sohinggak ngolanyat paring ulun jok was norimak tandak tahkan iyok khavun jok was nyembah topahtung ah. Khavun duok binahtang erih indo noku ahpui jok ngonyelak mbak bolerang. j 21 Khavun dolang porajurit doh pomunuk mbak pedang jok boluak tahkan baun Iyok jok nupang kuda puhtik erih. Mahkak dolang ocinaꞌang pun kuman nyiring bosuh dolang usin idoh jok pomunuk erih.