Wahyu 18

Babel konolohpung

Ulik erih ahkuk nohtok molekat bohkon mosuluh tahkan surga. Molekat erih tepun kuasak jok hajok khavun tarang ah narang duniak. 2 Molekat erih bokesah mbak auh jok mohing: “Babel was lohpung! Kota Babel jok hajok erih was lohpung! Huntuh nuk anai unuk pocon dolang otuk khavun roh-roh jaek. Khavun nuk pocon dolang ocinaꞌang jok kohtor jok konomecik ulun.

3 Iyok ngonin dolang paring bangsak bodosa, yok erih tiruh mbak ulun jok iyam avui humai, kolo anggur jok nguan idoh buso. Dolang lacak nuk duniak nguan dosa jok kolo erih kak mbak polacur erih, dolang ulun jok borahkang idoh jadik tahto kotului ulun-ulun nuk kota erih nguan arop doh puas mbak barang bandak jok bolehkak.”

4 Khavun ahkuk nyonih auh jok bohkon hinok tahkan surga, hiyon auh erih:

“Boluak nai tahkan kota Babel erih, oo dolang ulun jok suci jok Ahkuk tepui!

Arak ihkam ngohasuk aꞌang jok nguan ihkam bodosa kolo jok konguan doh,

supayak ihkam iyam konohukum mbak malik macam potahkak ah.

5 Kotului dosa ah was kongupur kisui ah nyiring noku langit, khavun Hotalak nohouk dolang kojaek ah.

6 Nguai ah noh iyok kolo iyok nguan ihkam,

malos ah noh lihpet duok kojaek jok konuai ah ahkan mik.

Nyuang ah noh sakir ah mbak korih jok hariu ah lihpet duok,

holovik mbak jok konuai ahkan dolang ulun.

7 Nguan yok jorak khavun liduk

sosuai mbak komuliaan khavun koponahto jok was kongomok ah.

Kotului iyok bokesah nuk luvang ahtoi ah:

‘Ahkuk puhtir jok bokuasak!

Ahkuk iyam baluk,

ahkuk iyam ahkan ngomok liduk kolo baluk.’

8 Kotului kosahkah ah mahkak Hotalak ahkan ngohukum iyok mbak paring potahkak icok ondo kotahiu ah,

yok erih ponyahkit, liduk, louk,

khavun iyok ahkan konolohpung mbak ahpui,

kotului Hotalak jok ngohakim iyok, arok noh Hotalak jok punak bokuasak.”

9 Dolang lacak nuk duniak, jok baas nguan dosa tiruh mbak iyok khavun ngandah ngomok koponahto ah, idoh ahkan nangih punak liduk kotului nuneng osun ahpui jok ngolohpung yok. 10 Idoh ahkan tombok nohtok tahkan macuk kotului idoh mihkoh buah kojorak erih. Hiyon doh marak ah: “Ahkai, iyam mios kojorak ah Kota Babel jok hajok khavun muhat erih, icok jam kiyak turus lohpung tului konohukum Hotalak!”

11 Beteng iyok konolohpung, dolang ulun jok borahkang nuk duniak idoh nangih tahtup koliduk doh, kotului iyam arok nai ulun jok molik dolang barang bandak doh. 12 Mahkak iyam arok jok molik bulo, perak, hitan, mutiara, kain ungu khavun dolang kain bohkon jok bolehkak, malik macam kajuk jok kobuai ah tamam, dolang aꞌang jok tonapak tahkan kaing, tahkan kajuk jok bolehkak, tembaga, umat khavun marmer. 13 Uhpak kajuk momih, dolang rempah, sopuk jok tamam kobuai ah, mur khavun manyan, anggur, binyak, tehpung, gandum, lombuk sahpik, domba, kuda khavun kreta, jihpon khavun kolunon. 14 Hiyon dolang ulun jok borahkang erih: “Paring aꞌang jok pios jok kononyolik muk iyam arok nai, khavun dolang koponahto kosenang muk was niho. Ihkok iyam ahkan nyombang paring ah hinok!” 15 Dolang ulun jok borahkang was tahto kotului doh borahkang nuk kota erih. Idoh ahkan nopajah ah tahkan macuk, kotului idoh mihkoh kojorak ah, idoh ahkan nangih khavun liduk. 16 Khavun hiyon doh: “Ahkai, iyam mios kojorak ah kota jok hajok atuh konguan potahkak erih! Puun dih iyok hatin dolang hatik jok bolehkak, puun ah iyok hatin pokajan jok bolehkak kolo bulo, perak, khavun mutiara. Totahpik nyohuluk kiyak koponahto ah erih was niho!”

17 Koderih kak juragan kahpal, paring ulun jok nupang, ulun jok korejak nuk kahpal khavun paring ulun jok ngurah ukun ponguman doh nuk laut, idoh halik ahkan nopajah kota erih. 18 Khavun idoh ngoriak beteng doh nohtok osun ahpui jok nyahak kota erih. Khavun hiyon doh: “Yam pujik arok kota jok hajok salak mbak kota erih kak!” 19 Idoh noravuh koravuk nuk kuhung doh sobagai tandak koliduk doh, idoh nangih khavun ngoriak ngoraik, hiyon doh: “Ahkai, iyam mios kojorak ah kota jok hajok atuh! Iyok nguan ulun jok tepun kahpal jadik tahto kotului dolang barang bandak ah jok bolehkak! Totahpik nyohuluk kiyak iyok turus lohpung.”

20 Khavun ahkuk nyonih auh tahkan surga, hiyoi ah: “Huntuh ihkam jok nuk surga, ngandah noh kotului kota erih was konolohpung! Paring ulun suci jok Hotalak tepui, rasul-rasul, nabi-nabik, ngandah noh! Hotalak was ngohukum kota erih kotului inon jok konguai ah ahkan mik.”

21 Umbot erih, icok behtik molekat jok muhat iyok ngahtang bahtuk, bahtuk erih yamios kohajoi ah, molekat erih nosahkah ah noku laut khavun hiyoi ah: “Kolihtuh noh kota Babel jok hajok erih ahkan tonosahkah yamios kodaras ah sohinggak iyam ahkan arok nai. 22 Dolang auh konyahpik, suling, terompet khavun jok bohkon ah yarok ahkan konihan tahkan anai, khavun yarok nai ulun jok maher luvang korejak ah, bahtuk nuk ngolinas gandum pun yam ahkan hatin nai. 23 Loang sumbuk muk halik yarok nai nuk anai, auh ulun rami-ramik sahkik koruh pun yam arok kak nuk anai. Kotului dolang ulun jok borahkang nuk kota muk, idoh arok noh ulun peting nuk duniak, mbak ponam-ponoum muk paring bangsak nuk duniak tuh konolanyat. 24 Babel konohukum tului was munuk dolang nabik, ulun-ulun suci jok Hotalak tepui khavun dolang ulun jok nuk duniak tuh.”