Hotalak ahkan ngohakim Babel
17
Umbot erih icok tahkan kopihtuk molekat jok namit pihtuk sakir erih lombut noku ahkuk, hiyoi ah: “Has noku ohtoi, ahkuk ahkan motohtok ahkam muk inon kolo polacur jok hajok erih ahkan kongohukum, iyok erih kota hajok jok pomotombok nuk donik dolang sungoi. a 2 Dolang lacak nuk duniak nguan dosa, idoh tiruh mbak polacur erih. Dosa jok kolo erih tonumun dolang ulun jok nuk duniak sohinggak idoh halik buso anggur polacur erih.” b 3 Ulik erih Roh Hotalak nguasak ahkuk, nuk luvang ponohtok kuk molekat ngonin ahkuk noku lahpang baras. Nuk anai ahkuk nohtok icok behtik bavik tuot nuk isung binahtang jok warna ah mangan, behtiu ah tuvik konguan auh tuhtui jok nguhtuk ngaran Hotalak. Binahtang erih tepun pihtuk kuhung khavun sopuluh tonduk.c 4 Bavik erih hatin kolambik ungu khavun mangan, iyok hatin porhiasan bulo, hitan jok bolehkak khavun mutiara nuk paring behtiu ah. Nuk longoi ah arok sakir bulo jok tuvik mbak tobiat jok jaek jok najis, yok erih tobiat jok tiruh mbak bahkas jok iyam avui humai. d 5 Nuk liko ah tonulih ngaran jok iyam arok ulun taꞌai rehti ah. Ngaran erih iyok noh: Ahkuk noh Babel jok Hajok, inai paring polacur khavun paring aꞌang jok jaek nuk duniak. 6 Umbot erih ahkuk nohtok bavik erih buso kotului ngorih dahak ulun-ulun suci jok Hotalak tepui khavun dahak dolang saksi Yesus.Ahkuk punak pusong kotihkak ahkuk nohtok bavik erih. 7 Totahpik molekat erih marak ahkak kuk: “Ngombai ihkok pusong? Ahkuk ahkan marak ahkam muk aꞌang jok iyam ulun taꞌai mongenai polacur khavun binahtang jok kononyahkat ah erih, jok kuhung ah pihtuk, tonduk ah sopuluh. 8 Binahtang jok tonohtok muk erih pujik arok, totahpik huntuh yarok nai, iyok ahkan boluak tahkan luvang jok punak timbon noku lovuk lio khavun was tonetu ahkan konolohpung. Ulun-ulun nuk duniak, jok iyam tonulih ngarai ah nuk Buhkuk Komolum sojaham duniak tonaoi, idoh ahkan pusong kotului nohtok binahtang erih pujik arok, huntuh yarok nai, tahpik iyok ahkan boluak hinok. e
9 Ihtok poduluk horahtik supayak ngorehti aꞌang ihtuh. Pihtuk kuhung erih iyok noh pihtuk korong unuk bavik erih tuot. 10 Khavun kopihtuk kuhung erih halik kopihtuk lacak kak: Limok tahkan idoh was lohpung, jok icok honong momoretah, khavun jok icok ah hinok jaham lombut, ngindoi iyok lombut iyok ahkan momoretah nyohuluk kiyak. 11 Khavun binahtang jok pujik arok, totahpik huntuh yarok nai, iyok arok noh lacak jok kojaluk, icok tahkan kopihtuk lacak erih kak. Khavun iyok uwas tonetu ahkan konolohpung.
12 Sopuluh tonduk jok tonuneng muk erih iyok noh sopuluh lacak jok jaham momoretah. Totahpik icok jam kiyak kotahiu ah idoh ahkan norimak kuasak sobagai lacak, havo-havoi mbak binahtang erih. f 13 Idoh hopahkat nongak hak khavun kuasak doh ahkan binahtang erih. 14 Binahtang khavun paring lacak erih idoh ahkan hobunuk ngolavan Anak Domba, totahpik idoh ahkan kalah. Kotului Anak Domba erih arok noh Tuan jok isung tahkan paring tuan khavun Lacak jok isung tahkan paring lacak. Dolang ulun jok ngohasuk Iyok, jok sotia khavun jok was konopilik Hotalak, idoh ahkan manang.” 15 Hiyon molekat erih hinok: “Danum jok tonohtok muk erih, nuk polacur erih tuot, iyok noh dolang bangsak, dolang suku, dolang nogarak, khavun dolang auh. 16 Sopuluh tonduk khavun binahtang jok tonohtok muk erih idoh ahkan ngomecik polacur erih. Idoh ahkan nyombaan paring barang bandak ah khavun ahkan nomurang iyok. Idoh ahkan kuman usiu ah khavun ngolohpung yok mbak ahpui. 17 Hotalak nguasak idoh supayak nguan evak-Ah. Sohinggak idoh hopahkat nongak kuasak ahkan binahtang erih, supayak iyok momoretah nyiring paring aꞌang jok pomarak Hotalak torjadik. 18 Bavik jok tonohtok muk erih iyok noh kota hajok, jok lacak ah momoretah paring lacak nuk duniak.”