Pihtuk potahkak
16
Ulik erih ahkuk nyonih auh jok mohing tahkan luvang Lovun Hotalak jok bokesah mbak kopihtuk molekat, hiyon auh erih: “Tulak nusuh ah nai kopihtuk sakir kobirat Hotalak noku duniak!”2 Beteng molekat jok topahtuk nusuh suang sakir erih noku duniak, mahkak lopung noh dolang bahak jok ngorik khavun moros paring ulun jok hatin tandak binahtang erih khavun jok nyembah topahtung ah. a
3 Molekat koduok nusuh suang sakir noku laut. Khavun danum laut jadik dahak kolo dahak ulun palus, mahkak paring jok bolum nuk luvang laut mahtoi.
4 Molekat kotoluk ah nusuh suang sakir noku paring sungoi khavun paring mahtan danum. Mahkak paring sungoi khavun paring mahtan danum erih jadik dahak. b 5 Ulik erih ahkuk nyonih molekat jok bokuasak ngahtur danum erih bokesah, hiyoi ah: “Hukuman jok konguam Muk erih adil, oo Hotalak jok kudus, jok arok khavun jok was arok nyiring huntuh. 6 Idoh uwas munuk ulun-ulun suci jok Ihkok tepui khavun dolang nabik Muk. Huntuh Ihkok nongak idoh ngorih danum jok was jadik dahak erih, kotului erih noh jok pahtut doh norimak ah.” 7 Khavun ahkuk nyonih auh tahkan mesbah, hiyoi ah: “Tuhan, Hotalak jok punak bokuasak, paring hukuman Muk adil khavun hinut!”
8 Molekat koohpat nusuh suang sakir noku mahtan ondo. Mahkak mahtan ondo tonongak kuasak ahkan mahpui kolunon. 9 Kolunon bopahpui konguan lasut ah jok punak nyangit. Idoh punak sangit khavun nguhtuk Hotalak jok bokuasak nguan paring potahkak erih. Idoh halik iyam botobat khavun iyam kanik ngehtek Hotalak.
10 Khavun molekat kolimok nusuh suang sakir ah noku unuk binahtang erih bokuasak jadik lacak, mahkak paring unuk jok konguasak binahtang erih jadik pindong. Khavun kolunon ngahtat jolak doh kotului nyangit poros. c 11 Idoh nguhtuk Hotalak jok bokuasak nuk surga tului dolang bahak khavun oros jok kongomok doh. Totahpik idoh iyam kanik botobat tahkan paring tobiat doh jok jaek.
12 Ulik erih molekat koonom nusuh suang sakir noku sungoi Eprat jok hajok erih. Mahkak sungoi erih tojah sohinggak dolang lacak tahkan timur touk mihtah ah. d 13 Khavun ahkuk nohtok toluk roh jaek jok model ah kolo bokuk. Havoi aiu, dolang bokuk erih boluak tahkan baun nahkak, tahkan binahtang jok boluak tahkan laut, khavun binahtang jok boluak tahkan tanak. Khavun binahtang jok boluak tahkan tanak iyok pomarak nabik palsu. 14 Idoh arok noh dolang roh jaek jok touk nguan malik macam aꞌang jok motaher. Roh-roh erih tulak noku dolang lacak nuk paring duniak ngupur idoh supayak doh hicok beteng perang kotihkak Ondo Pongohpah, yok erih beteng Hotalak ngohakim duniak. 15 Tuhan marak ah: “Nyonih ah noh pios-pios! Ahkuk ahkan lombut kolo ulun nahko iyam icok behtik ulun pun taꞌai. Ngandah noh ulun jok nulo bojaga-jagak, jok was umbot nyodiak hatik jok ahkan hatiu ah. Sohinggak iyok iyam nyalan toburang nuk husuk ulun arok khavun miak.” e
16 Khavun dolang roh jaek erih ngupur lacak-lacak nuk duniak noku unuk jok ngarai ah luvang auh Ibrani Harmagedon. f
17 Khavun molekat kopihtuk nusuh suang sakir ah noku langit. Khavun konihan noh auh jok mohing tahkan ponuot jok konolehkak nuk luvang Lovun Hotalak, auh erih marak ah: “Uwas umbot noh.” 18 Khavun torjadik noh kilap, auh duhung khavun punak yamios tanak tokuruk. Tahkan topahtuk kolunon bolum nuk duniak, jaham pujik torjadik tanak tokuruk punak nyangit kolo erih. Ihtuh noh tanak tokuruk jok punak nyangit. g 19 Mahkak kota jok hajok erih bobolah jadik toluk, koderih kak kota-kota dolang bangsak jok iyam pocayak mbak Hotalak bodorop. Khavun Hotalak nohouk Babel kota hajok erih, jok ahkan pomahpak-Ah ngorih anggur tahkan luvang sakir, yok erih kobirat Hotalak jok punak ngorik. h 20 Paring pulo ahkan niho khavun iyam arok hinok dolang puruk. i 21 Ulik erih ucan es jok hajok, icok kopotih bahat ah liman puluk kilo jok botahas tahkan langit nopahas kolunon. Mahkak dolang kolunon nguhtuk Hotalak kotului dolang potahkak erih punak nyangit. j