Molekat mbak dolang potahkak jok pongohpah ah
15
Ulik erih ahkuk nohtok aꞌang jok motaher nuk langit. Arok pihtuk molekat jok ngonin pihtuk potahkak jok pongohpah ah, umbot potahkak erih torjadik mahkak Hotalak iyam ahkan birat nai.2 Mbot erih ahkuk nuneng aꞌang jok kolo laut kaca bolouk mbak ahpui. Ahkuk halik nuneng ulun-ulun jok was ngalah binahtang erih, khavun topahtung ah, khavun akak jok rehti ah ngaran binahtang erih. Idoh tombok nuk saran laut kaca erih tahtup namit konyahpik jok tonongak Hotalak. 3 Idoh nyanyi lagu Musa, jihpon Hotalak, khavun lagu Anak Domba, hiyon lagu erih:
“Hajok khavun motaher paring aꞌang jok konguam-Muk,
Tuhan Hotalak jok punak bokuasak!
Lacak paring bangsak,
paring aꞌang jok konguam-Muk punak adil khavun hinut.a
4 Paring ulun ahkan ngolehkak Ihkok, Tuhan.
Paring ulun ahkan ngehtek ngaram-Muk.
Kotului Ihkok kiyak jok kudus.
Paring bangsak ahkan lombut khavun nyembah Ihkok
tului paring tobiat-Muk jok adil
was tonohtok paring ulun.” b
5 Umbot erih ahkuk nohtok Lovun Hotalak, yok erih Balai Suci, nuk surga tokuhkoi. c 6 Kopihtuk molekat jok ngonin kopihtuk potahkak erih, idoh boluak tahkan Lovun Hotalak jok nuk surga. Hatin pokajan doh tonapak tahkan kain puhtik jok borasih khavun ngolinyap. Khavun nuk husuk doh tonokuling kain jok tonapak tahkan bulo. 7 Tahkan ohpat mahluk arok icok kungan jok nongak pihtuk sakir bulo ahkan kopihtuk molekat erih. Dolang sakir erih tuvik mbak kobirat Hotalak, yok erih Hotalak jok bolum nyiring nyarok tihkas nyamah ah. 8 Khavun Lovun Hotalak erih tuvik konguan osun tahkan komuliaan khavun kuasak Hotalak. Ngindoi kopihtuk potahkak jok onin kopihtuk molekat erih jaham umbot uras, mahkak iyam arok icok behtik pun jok touk nyolong noku luvang Lovun Hotalak erih. d