Wahyu 14

Anak Domba khavun dolang ulun jok konolahpas-Ah

Mbot erih luvang ponohtok kuk, kihtan noh Anak Domba tombok nuk isung puruk Sion, Iyok hicok mbak solahtus ohpat puluk ohpat kujan ulun. Nuk liko paring ulun erih tonulih ngaran Anak Domba khavun ngaran Amai-Ah. 2 Khavun ahkuk nyonih auh jok mohing tahkan surga kolo ohtuh nohkan jok punak hajok khavun kolo auh duhung jok punak mohing nuk langit. Auh erih tamam kolo auh dolang ulun ngonyahpik. 3 Nuk husuk ponuot Hotalak jok kongolehkak, nuk husuk koohpat mahluk khavun nuk husuk dolang okon jok ngoniling ponuot jok konolehkak erih, solahtus ohpat puluk ohpat kujan ulun erih monyanyi lagu jok bohuak. Iyam arok jok touk nyanyi lagu erih salak mbak solahtus ohpat puluk ohpat kujan ulun jok was sonyolamat Hotalak. 4 Idoh tulin borasih kolo bahkas jok iyam alik tiruh mbak bavik. Idoh arok noh ulun-ulun jok ngohasuk Anak Domba erih noku amoh kiyak Iyok tulak. Idoh tonovus tahkan holang paring kolunon, yok erih sobagai surung jok topahtuk ah ahkan Hotalak khavun ahkan Anak Domba. 5 Idoh iyam pujik bobalik khavun iyam arok kosolaꞌan doh.

Dolang tanjik tahkan toluk molekat

6 Ulik erih ahkuk nohtok molekat bohkon jok naꞌang nuk langit. Molekat erih ngomin Tarung Pios jok yarok tihkas nyamah ah ahkan pomarak ah noku paring kolunon nuk duniak, noku paring bangsak, suku, auh khavun nogarak. 7 Molekat erih bokesah mbak auh jok mohing, hiyoi ah: “Ihkam alah ngolehkak khavun ngehtek Hotalak! Kotului was ohkot ah noh Hotalak ngohakim kolunon. Nyembah ah noh Iyok jok naoi langit, duniak, laut khavun paring mahtan danum.”

8 Ulik erih marah molekat jok bohkon, molekat koduok. Hiyoi molekat erih: “Babel uwas lohpung! Uwas lohpung kota jok hajok erih! Jok uwas nguan dolang bangsak bodosa umbak tobiat jok tiruh mbak ulun jok iyam avui humai ah. Tobiat erih kolo iyok nongak danum anggur jok moharik nguan dolang bangsak buso.”

9 Khavun marah noh molekat jok kotoluk, tahtup bokesah mbak auh jok mohing: “Ulun jok nyembah binahtang erih mbak topahtung ah, khavun arok tandak binahtang erih nuk liko khavun longoi ah, 10 idoh ahkan norimak hukuman Hotalak jok punak muhtus, erih kolo ulun ngorih danum anggur jok tulin yam ponolouk inon pun. Idoh ahkan ponoyorak mbak ahpui khavun bolerang nuk husuk dolang molekat jok kudus khavun Anak Domba. 11 Ahpui erih nulo ngohosun khavun monyorak idoh nyiring yarok tihkas nyamah ah. Khavun hondo ngolomik idoh nulo pononyorak, yok erih idoh jok nyembah binahtang erih, topahtung ah, khavun idoh jok tepun tandak ngaran binahtang erih.”

12 Kotului erih dolang ulun jok suci jok Iyok tepui tehtap alah tuhit, yok erih idoh tehtap pahtuh mbak dolang poletah Hotalak khavun sotia ngohasuk Kristus.

13 Khavun ahkuk nyonih auh tahkan surga jok marak ah: “Nulih ah noh ihtuh: Tahkan huntuh, ngandah noh ulun jok pocayak mbak Yesus nyiring mahtoi!” Hiyon Roh Hotalak mutah ah: “Punak tuꞌuk noh erih rih! Idoh ahkan tondok korejak mahto-mahtoi, kotului idoh ahkan norimak uhpah polayanan doh.”

Ponohtok mongenai Hotalak ngohakim kolunon

14 Nuk luvang ponohtok kuk kihtan noh havun jok puhtik. Nuk diang havun erih arok ulun jok tuot, iyok kolo Anak Kolunon. Nuk kuhung-Ah arok mahkota bulo, khavun nuk longoi-Ah arok arit jok monyoot. 15 Ulik erih icok behtik molekat jok bohkon boluak tahkan Lovun Hotalak jok nuk surga. Mbak auh jok mohing, molekat erih marak noku Iyok jok tuot nuk isung havun erih: “Morivih ah noh arit-Muk erih, khavun ngohtom noh huntuh, tului uwas ohkot ah kongohtom, kohtom nuk duniak was mosak!” 16 Khavun Iyok, jok tuot nuk isung havun erih, morivih arit-Ah noku isung duniak, mahkak kohtom nuk duniak kongohtom.

17 Ulik erih icok behtik molekat jok bohkon boluak tahkan Lovun Hotalak jok nuk surga, iyok halik namit arit jok monyoot.

18 Khavun arok hinok molekat bohkon, iyok lombut tahkan mesbah khavun bokuasak ngahtur ahpui nuk mesbah erih. Mbak auh jok mohing iyok marak ahkan molekat jok namit arit monyoot erih, hiyoi ah: “Morivih ah noh arit muk jok monyoot erih, khavun ngohtom ah noh dolang anggur nuk duniak kotului buai ah was mosak.” 19 Mahkak molekat erih morivih arit ah noku duniak, iyok nohtok tungun anggur. Umbot erih nosahkah buak anggur erih noku bak jok hajok nuk morahtit ah, aꞌang erih motohtok kobirat Hotalak jok punak Hajok. 20 Dolang buak anggur erih pomorahtit nuk luar kota, tahkan bak nuk morahtit anggur erih boluak dahak nyalut kolo sungoi, kotimbon salut dahak erih manyo duok mehter, kohombui ah toluk lahtus kilomehter.