Wahyu 13

Duok binahtang jok ngohanyik

Khavun ahkuk nohtok icok kungan binahtang jok ngohanyik boluak tahkan luvang laut. Binahtang erih kuhung ah pihtuk tonduk ah sopuluh. Nuk paring tonduk ah arok mahkota khavun nuk paring kuhung ah tonulih auh tuhtui jok nguhtuk Hotalak. 2 Binahtang jok tonohtok kuk erih kolo kulih, paai ah kolo paan bohuang khavun baui ah kolo baun horomaung. Khavun binahtang erih tonongak nahkak komuhat khavun kuasak sobagai lacak. 3 Tahkan kopihtuk kuhung binahtang erih arok icok kuhung ah jok tuneng ah kolo havan nih khavun touk nguan iyok manyo mahtoi, totahpik avan erih was pios. Kotului erih ulun nuk duniak pusong, khavun idoh ngohasuk iyok. 4 Idoh nyembah nahkak erih kotului iyok was nongak komuhat khavun kuasak ah ahkan binahtang erih. Idoh halik nyembah binahtang erih kak, hiyon doh: “Iyam arok jok bokuasak kolo binahtang ihtuh khavun yarok jok duoi hobunuk ngolavan iyok!”

5 Hotalak mosuah binahtang erih bokesah tahtup kosahkah ah iyok halik nguhtuk Hotalak, iyok tonongak kuasak nguan paring ah erih ohpat puluk duok bulan kotahiu ah. 6 Binahtang erih nguhtuk Hotalak, nguhtuk ngaran Hotalak, nguhtuk nuk Hotalak mocon, khavun nguhtuk dolang paring ulun jok mocon nuk surga. 7 Iyok pomosuah hobunuk ngolavan dolang ulun suci jok Hotalak tepui khavun ngalah idoh. Khavun ahkan binahtang erih ongak kuasak supayak bokuasak nuk diang paring suku, nogarak, auh khavun bangsak. 8 Paring ulun nuk duniak ahkan nyembah binahtang erih, yok erih dolang ulun jok ngarai ah tahkan topahtuk duniak tonaoi iyam tonulih luvang buhkuk komolum ain Anak Domba jok uwas sonyomolih.

9 Nyonih ah noh pio-pios: 10 “Ngindoi ulun was tonetu Hotalak ahkan tonahan, mahkak idoh mihtik ahkan tonahan. Khavun ngindoi ulun was tonetu ahkan pomunuk mbak pedang, mahkak idoh mihtik ahkan pomunuk mbak pedang. Kotului erih noh dolang ulun jok suci jok Hotalak tepui idoh alah sabar khavun sotia.”

11 Umbot erih ahkuk nohtok binahtang jok ngohanyik jok bohkon ah hinok, binahtang erih boluak tahkan tanak, tonduk ah duok kolo tonduk domba mohanoi, binahtang erih bokesah mbak auh jok mohing khavun birat kolo nahkak erih. 12 Nuk husuk binahtang jok boluak tahkan laut, iyok hatin paring kuasak jok was ongak ahkai ah. Iyok mahpak paring kolunon nuk duniak nyembah binahtang jok boluak tahkan laut jok was pios tahkan havan ah jok nguan iyok manyo mahtoi erih. 13 Binahtang jok boluak tahkan tanak nguan tumbuk aꞌang jok motaher nuk husuk paring ulun. Holovik hinok iyok nguan ahpui mosuluh tahkan langit noku duniak. 14 Iyok ngolanyat ulun jok arok nuk duniak mbak dolang aꞌang jok motaher jok konguai ah nuk husuk binahtang jok boluak tahkan laut. Iyok nyuhuk ulun napak topahtung unuk ngolehkak binahtang erih, jok uwas havan konguan pedang, totahpik tehtap bolum. 15 Khavun iyok tonongak kuasak unuk ngomolum topahtung erih. Topahtung erih pun touk nuhtui khavun nongak poletah supayak munuk paring ulun jok iyam nyembah iyok. 16 Binahtang jok boluak tahkan tanak erih nyuhuk paring ulun, jok peting khavun jok iyam peting, ulun jok tahto khavun jok malak, jihpon khavun jok iyam jihpon, idoh pomahpak supayak tonongak tandak nuk longon kotoun doh ngindoi iyam nuk liko doh. 17 Iyam arok icok behtik pun jok touk molik khavun borahkang, ngindoi idoh iyam arok tandak. Tandak erih iyok noh ngaran binahtang erih atau ngarai ah jok tonulih hatin akak.

18 Tului akak erih arok noh ngaran icok behtik kolunon, jok tonulih hatin akak onom lahtus onom puluk onom, supayak ngorehti mongenai akak erih mahkak ulun alah horahtik.