Bavik khavun Nahkak
12
Mahkak kihtan noh tandak jok motaher nuk langit. Tahkan anai kihtan noh icok behtik bavik jok hatiu ah iyok noh mahtan ondo, khavun paai ah nuk isung bulan, nuk kuhung ah arok duok balas potion jok jadik mahkota. 2 Bavik erih honong botohik. Kotului was ohkot ah noh iyok ahkan dimbit, mahkak iyok ngoriak ngomok oros ah.3 Mahkak kihtan hinok tandak jok motaher nuk langit, tahkan anai kihtan noh icok kungan nahkak jok punak hajok warna ah mangan kolo ahpui, nahkak erih kuhung ah pihtuk khavun tonduk ah sopuluh, nuk paring kuhung ah arok mahkota. a 4 Hatin ihkuh ah, nahkak erih nguhut bagik toluk potion nuk langit khavun nosahkah ah noku duniak.
Nahkak erih tombok nuk husuk bavik jok kanik dimbit erih, kotului ngindoi Anak ah was boluak mahkak nahkak erih ahkan turus nolon ah. b 5 Bavik erih nganak icok behtik Anak kinyam bahkas, Anak ah erih ahkan momoretah paring bangsak mbak muhtus. Totahpik kotihkak Anak iyam erih kongarok, solengak molekat nyombaan ah, khavun molekat ngonin yok noku Hotalak khavun noku ponuot Hotalak jok konolehkak. c 6 Bavik erih buho noku lahpang baras, noku unuk jok was sonyodiak Hotalak ahkai ah, nuk anai dolang molekat ahkan ngorimbit iyok toluk toun sotengah kotahiu ah.
Nahkak Kongalah
7 Mahkak nuk surga torjadik noh hobunuk. Icok behtik pomipin molekat ngarai ah Mikhael iyok khavun dolang molekat jok bohkon hobunuk ngolavan nahkak. Nahkak erih kongonohop dolang molekat jok ngohasuk iyok. d 8 Nahkak erih pun kalah, sohinggak iyok khavun dolang molekat jok ngohasuk iyok kongusir tahkan surga. 9 Nahkak jok hajok erih lohik okok, iyok noh Lacak paring otuk, jok ngolanyat paring kolunon nuk duniak. Hicok mbak dolang molekat-molekat jok ngohasuk iyok idoh kongindo noku duniak. e
10 Khavun ahkuk nyonih auh jok mohing tahkan surga, hiyon auh erih: “Huntuh noh ohkot ah Hotalak nyolamat ulun jok Iyok tepui! Huntuh kak Hotalak motohtok kuasak-Ah sobagai Lacak! Huntuh Lacak ponyolamat jok kononjanjik Hotalak erih was mokarah kuasak-Ah kak! Kotului Lacak paring otuk jok marak dolang kosalak bari-basak tok hondo khavun ngolomik nuk husuk Hotalak, iyok was kongusir tahkan surga. f 11 Bari-basak basak tok was ngalah Lacak paring otuk mbak dahak Anak Domba khavun nyihing tarung jok hinut tahkan Hotalak jok kongesah doh. Idoh bohanyik mahtoi kotului ngesah tarung erih. 12 Ngandah noh ihkam jok mocon nuk surga. Totahpik ulun jok bolum nuk duniak khavun nuk laut, idoh ahkan colahkak. Kotului Lacak paring otuk was mosuluh, iyok punak birat nyangit. Kotului iyok taꞌai was nyohiot kiyak nai hocok ah nguan dolang korejak jok jaek.”
Nahkak kanik munuk bavik erih
13 Kotihkak nahkak erih sadar ngindoi iyok uwas kongindo noku duniak, iyok pun ngasang khavun kanik moros bavik jok nganak Anak kinyam bahkas erih. 14 Totahpik duok ilat atang jok hajok ongak ahkan bavik erih, supayak iyok naꞌang noku lahpang baras, unuk anai iyok nokacuk arop ah mbak nahkak erih. Khavun iyok konorimbit dolang molekat toluk toun sotengah kotahiu ah. g 15 Umbot erih nahkak nyopuruh danum tahkan baui ah danum erih kohajoi ah kolo salut sungoi, nyalut noku tohorong bavik erih supayak iyok mohaman. 16 Tanak ngavat bavik erih, sohinggak marah noh luvang nuk tanak kolo bauk jok tokoak nolon paring danum jok boluak tahkan baun nahkak erih. 17 Nahkak erih punak birat mbak bavik erih. Iyok tulak nyarang dolang koturun bavik erih, yok erih idoh jok pahtuh mbak poletah Hotalak khavun jok ngesah aꞌang jok hinut mongenai Yesus. 18 Khavun nahkak erih mohorak nuk saran laut erih.