Duok saksi jok konguhtus Hotalak
11
Ulik erih arok jok nongak ahkuk icok kajuk nuk nguhkur, kajuk erih kolo sokuhut, khavun Iyok moletah ahkuk, hiyoi-Ah: “Tulak nai nguhkur ah Lovun Hotalak khavun mesbah. Niap ah kak dolang ulun jok sombayang nuk anai. a 2 Tahpik arak noh nguhkur tohopan Lovun Hotalak jok nuk bagian luar, kotului tohopan erih was ongak ahkan dolang ulun jok iyam nyokonok Hotalak. Idoh ahkan nicak-ngihik khavun nguasak kota Suci Yerusalem erih ohpat puluk duok bulan kotahiu ah. b 3 Ahkuk ahkan nguhtus duok behtik saksi-Kuk icok kujan duok lahtus onom puluk ondo kotahiu ah idoh ahkan marak tanjik Kuk. Tahtup idoh hatin hatik jok baas hatin beteng ulun mahtoi.”
4 Koduok saksi erih kolo duok bahtang jaitun khavun kolo duok johik nuk nginak sumbuk jok tombok nuk husuk Tuhan jok bokuasak nuk paring duniak. c 5 Ngindoi arok ulun jok ahkan moros koduok saksi erih, tahkan baun dorok boluak ahpui khavun mahpui dolang musuh dorok. Koderih noh cara Hotalak ngohukum mahtoi ulun jok kanik moros dorok. 6 Dorok tepun kuasak nuhtup langit, supayak iyam ucan beteng dorok marak tanjik Hotalak. Dorok halik tepun kuasak nguan danum nyoriak dahak, khavun nguan dolang potahkak moros paring aꞌang jok bolum nuk duniak, sosuhkak ahtoi dorok. d
7 Kotihkak dorok was umbot marak tanjik doh, mahkak binahtang bohanyik jok boluak tahkan luvang jok punak timbon noku lovuk lio. Dorok ahkan hobunuk mbak binahtang erih khavun dorok ahkan kongalah khavun pomunuk binahtang erih. e 8 Otun dorok tuhang tahuk nuk jalan hajok yok erih nuk kota jok hajok, nuk amoh Tuhan doh sonyalib. Kojaek ulun nuk kota erih kolo kota Sodom khavun Mesir. f 9 Dolang ulun tahkan paring bangsak, suku, auh khavun nogarak, idoh ahkan nohtok otun dorok toluk ondo sotengah, dolang ulun erih majak otun dorok tonanom. 10 Paring ulun nuk duniak ahkan ngandah tului pomalus dorok, idoh ahkan bogavik khavun hotongak hadiah, kotului koduok behtik nabik erih uwas nguan tumbuk kojorak ahkan ulun-ulun nuk duniak. 11 Tohtapik toluk ondo sotengah ulik erih, Hotalak nongak hasong komolum ahkan dorok, sohinggak dorok pun hulik bolum turus tombok. Paring ulun jok nohtok dorok idoh nyangit mihkoh. g 12 Khavun koduok nabik erih nyonih auh jok mohing tahkan surga, hiyon auh erih: “Nuhkat nai noku ohtoi!” Dorok pun tonokuling havun khavun tokahtang noku surga. Beteng erih dolang ulun jok becik mbak dorok idoh nohtok ah inon jok torjadik erih. h
13 Mahkak torjadik noh tanak tokuruk punak nyangit, mahkak bagik sopuluh kota erih lohpung khavun pihtuk kujan ulun mahtoi kotului tanak tokuruk erih. Dolang ulun jok solamat idoh nyangit mihkoh, kotului paring ah erih idoh pun ngehtek Hotalak jok nuk surga. i
14 Potahkak jok koduok was tonokalo. Totahpik potahkak jok kotoluk ah ahkan pohos lombut.
Molekat jok kopihtuk ngomusik sangkakala
15 Khavun molekat kopihtuk ngomusik sangkakala ah mahkak konihan noh dolang auh jok mohing tahkan surga, hiyon auh erih: “Huntuh jok bokuasak nuk duniak iyok noh Tuhan Hotalak tok khavun Lacak Ponyolamat jok konojanjik-Ah. Iyok momoretah jadik Lacak nyiring yarok tihkas nyamah ah.” j 16 Mahkak koduan puluk ohpat okon-okon jok arok nuk husuk Hotalak, jok tuot nuk ponuot doh jok konolehkak erih, idoh nyuhkuk khavun nyembah Hotalak. 17 Hiyon doh:
“Tuhan Hotalak jok punak bokuasak,
Tuhan jok arok huntuh, jok was arok, khavun jok ahkan lombut!
Ihkai bosukur noku Ihkok kotului was mokarah kuasak-Muk jok hajok,
khavun nopahtuk momoretah sobagai Lacak nuk paring duniak.
18 Dolang ulun jok iyam pocayak mbak Ihkok idoh birat nyangit,
totahpik was ohkot ah noh Ihkok ngohukum idoh,
khavun was ohkot ah kak Ihkok ngohakim paring ulun jok was mahtoi.
Ihtuh noh ohkot ah Ihkok nongak uhpah ahkan dolang jihpon-Muk, yok erih dolang nabik,
dolang ulun suci jok Ihkok tepui, yok erih ulun jok pahtuh mbak Ihkok,
idoh jok peting khavun idoh jok iyam peting.
Khavun was ohkot ah noh kak Ihkok ngolohpung dolang ulun jok nguan duniak lohpung!” k
19 Mahkak tokuvat noh Lovun Hotalak jok nuk surga, khavun kihtan noh pahtik perjanjian Hotalakl nuk luvang anai. Beteng erih kak torjadik noh kilap, auh duhung, tanak tokuruk khavun ucan es jok punak nyangit. m