Ponohtok Yohanes mongenai molekat khavun gulung kitab jok koik
10
Khavun ahkuk nohtok icok behtik molekat jok bohkon, jok muhat, iyok mosuluh tahkan surga, iyok hatin jubah havun, nuk isung kuhung ah arok liuk, tapak ah havoi kolo mahtan ondo, khavun paai ah kolo johik ahpui nih. 2 Iyok namit icok gulung kitab jok kenek jok tokuhkoi. Paai silak kotouk nicak laut, khavun paai jok silak uloi ah nicak tanak diang. 3 Iyok ngoriak mbak auh jok mohing kolo horomaung jok nyokuhkung. Umbot iyok ngoriak erih, kopihtuk duhung mutah yok mbak auh jok mohing. 4 Punak kak ahkan nulih auh jok uwas sonyonih kuk tahkan kopihtuk duhung erih, arok auh tahkan surga jok marak ah: “Arak nulih inon jok pomarak kopihtuk duhung erih. Nyuhuk ah noh inon jok sonyonih muk.”5 Khavun molekat jok tonohtok kuk tombok nuk isung laut khavun nuk isung tanak diang, iyok ngahtang longoi kotoui ah noku langit nahtup hotulut. a 6 Molekat erih hotulut nuk luvang ngaran Hotalak jok bolum nyiring yarok tihkas nyamah ah, jok naoi langit khavun dolang paring suang ah, duniak khavun dolang paring suang ah, laut khavun dolang paring suang ah. Hiyon molekat erih: “Hotalak iyam ahkan ngomalang nguan dolang paring evak Ah. 7 Totahpik ngindoi molekat kopihtuk ngomusik sangkakala ah, Hotalak ahkan nguan paring evak jok sonyuhuk-Ah. Paring ah erih ahkan torjadik kolo jok uwas pomarak Ah ahkan dolang jihpoi-Ah, yok erih dolang Nabik.”
8 Ulik erih ahkuk nyonih ah hinok auh tahkan langit jok pujik bokesah mbak ahkuk, hiyoi-Ah: “Tulak nai ngomin gulungan kitab jok tokuvat nuk longon molekat jok nicak laut khavun tanak diang erih.” b
9 Mahkak ahkuk tulak noku molekat erih khavun hiyok kuk ahkai ah: “Ngavat kuk, nongak pokuang kitab kenek atuh.” Hiyon molekat erih mutah kuk: “Ngomiu noh khavun kumai pokuang kitab ihtuh, nanyam ah nuk luvang butui muk poit, tahpik nuk luvang baum muk momih havoi mbak oling.” 10 Ahkuk ngomin pokuang kitab kenek erih khavun turus kumai. Nuk luvang bauk kuk momih nanyam oling, totahpik ulik kuk noloi ah poit nuk luvang butui kuk. 11 Mahkak iyok moletah ahkuk, hiyoi ah: “Ihkok alah ngesah tanjik jok tahkan Hotalak noku dolang bangsak, nogarak, auh khavun dolang lacak.”