Molekat kolimok ngomusik sangkakala
9
Khavun molekat jok kolimok ngomusik sangkakala ah, khavun ahkuk nohtok icok potion jok was nohkah tahkan langit noku duniak. Potion erih kolo molekat, ahkai ah tonongak kucik nuk nguap atop luvang jok punak timbon noku lovuk lio. 2 Mahkak konguap ah noh atop tomoruang jok punak timbon erih, boluak noh osun jok kahpan tahkan anai kolo osun tukuh jok hajok. Osun erih nguan langit khavun mahtan ondo jadik pindong. a 3 Tahkan osun erih boluak yamios karoi ah mokalap sohinggak nuhtup duniak. Dolang mokalap erih tonongak kuasak ahkan monyorak kolunon kolo kahtipkalak motik kolunon mbak hariu ah. b 4 Dolang mokalap erih konomajak ngorusak dolang uruk, puun kajuk khavun tonjom komulan jok bohkon ah nuk duniak. Idoh cumak pomosuah moros ulun-ulun jok iyam arok tandak segel tahkan Hotalak nuk liko doh. c 5 Dolang mokalap erih konomajak munuk kolunon totahpik pomosuah monyorak kolunon limok bulan kotahiu ah. Kojorak jok moros idoh kolo buah potik kahtipkalak. 6 Kotahin limok bulan erih, idoh ngotiak supayak touk mahtoi totahpik idoh iyam kak mahtoi. Idoh punak jolik mahtoi, mohtos pomalus mahi-mahik macuk tahkan idoh. d7 Behtin dolang mokalap erih kolo kuda jok sonyodiak ahkan hobunuk. Nuk isung kuhung doh arok aꞌang jok kolo mahkota bulo. Tapak dolang mokalap erih kolo tapak kolunon. e 8 Balo doh hombuk kolo balo ulun bavik khavun nyihpon doh monyoot havoi mbak nyihpon horomaung.f 9 Arok aꞌang jok nuhtup husuk doh kolo kolambik umat. Auh ilat dolang mokalap erih naing auh dolang kreta jok konguhut dolang kuda beteng hobunuk. g 10 Dolang mokalap erih tepun ihkuh jok arok potik ah kolo kahtipkalak. Nuk ihkuh doh erih arok kuasak ahkan monyorak kolunon limok bulan kotahiu ah. 11 Jok momoretah jadik lacak ahkan doh arok noh molekat jok jagak atop luvang jok punak timbon noku lovuk lio. Nuk luvang auh Ibrani ngaran lacak erih Abadon, khavun luvang auh Yunani Apolion. Koduok ngarak erih rehti ah patah ngolohpung.
12 Potahkak jok topahtuk ah was umbot, totahpik honong arok duok potahkak hinok jok ahkan torjadik.
Molekat jok koonom ngomusik Sangkakala
13 Ulik erih molekat jok koonom ah ngomusik sangkakala. Mahkak ahkuk nyonih auh boluak tahkan dolang tonduk jok arok nuk ohpat sihkun mesbah bulo nuk husuk Hotalak. h 14 Auh erih marak ahkan molekat koonom jok namit sangkakala: “Molahpas ah noh ohpat molekat jok kongahut Hotalak donik sungoi Eprat jok hajok erih!” 15 Sosuai mbak ohkot jok tonetu Hotalak jam, ondo, bulan khavun toun ah, molekat koonom molahpas ohpat molekat erih. Aꞌang jok ahkan konguan ohpat molekat erih iyok noh munuk bagik toluk kolunon nuk duniak. 16 Ahkuk nyonih ngindoi idoh tepun porajurit jok hatin kuda, karoi ah duok lahtus juta. 17 Nuk luvang ponohtok kuk, ahkuk nohtok dolang kuda khavun dolang ulun jok nupang ah, ulun jok nupang ah erih idoh hatin kolambik umat nuk ngolindung husuk doh, warna ah mangan kolo jelak ahpui, biru khavun bohendak kolo bolerang. Kuhung dolang kuda erih kolo kuhung horomaung, khavun tahkan baui ah boluak ahpui, osun khavun bolerang. 18 Bagik toluk kolunon mahtoi kotului toluk potahkak yok erih, ahpui, osun khavun bolerang jok boluak tahkan baun dolang kuda erih. 19 Kuasak kuda erih arok nuk baui khavun ihkuh ah. Ihkuh ah kolo lohik, arok kuhung ah khavun mbak kuhung ah erih touk nunduk khavun moros kolunon. 20 Totahpik kolunon jok bohkon, jok iyam mahtoi kotului potahkak erih, iyam kak botobat tahkan inon jok konguan doh. Idoh iyam tondok nyembah dolang roh jaek khavun dolang topahtung jok tonapak tahkan bulo, perak, tahkan tembaga, bahtuk kajuk. Paring topahtung erih iyam taꞌai nohtok, nyonih khavun iyam taꞌai nyalan. i 21 Idoh iyam botobat khavun tondok tahkan tobiat jaek doh jok bohkon, yok erih munuk, nahko, penam penom, khavun tiruh mbak ulun jok iyam bosai khavun iyam oruh doh.