Segel jok kopihtuk ponolahpas
8
Kotihkak Anak Domba erih molahpas segel jok kopihtuk, surga jadik bungun sokitar sotengah jam. 2 Khavun ahkuk nohtok kopihtuk molekat jok tombok nuk husuk Hotalak, idoh tonongak pihtuk sangkakala.3 Arok icok behtik molekat jok bohkon lombut, iyok tombok nuk donik mesbah khavun namit totai sopuk jok tonapak tahkan bulo. Ahkai ah tonongak tumbuk manyan jok ahkan sonyurung hombo-homboh mbak doa ulun-ulun suci jok Hotalak tepui nuk mesbah bulo nuk husuk ponuot Hotalak jok konolehkak. a 4 Hicok mbak doa dolang ulun jok suci jok Hotalak tepui, osun sopuk jok pomahpui erih ngohosun noku diang tahkan longon molekat erih nuk husuk Hotalak. 5 Umbot erih molekat ngonin totai sopuk erih, khavun nyuang ah mbak bahon ahpui jok ngonyelak tahkan mesbah erih, khavun nosahkah noku duniak. Mahkak torjadik noh tokorang khavun kilap hotutung, khavun tanak pun tokuruk. b
Ohpat sangkakala konomusik
6 Umbot erih, pihtuk molekat jok namit sangkakala idoh sia-siap ahkan ngomusik ah.
7 Molekat jok topahtuk pun ngomusik sangkakala ah, mahkak ucan es khavun ahpui, hobolouk mbak dahak botusuh noku duniak. Mahkak duniak bagik toluk ohpah pahpui, koderih kak bagik toluk dolang puun-puun kajuk pahpui, khavun paring uruk jok bohijau ohpah pahpui. c
8 Khavun molekat jok koduok ngomusik sangkakala ah, mahkak torjadik noh aꞌang jok kolo puruk jok punak hajok ngonyelak ngonyehau tosahkah noku luvang laut. Bagik toluk laut borubah jadik dahak. 9 Mahkak bagik toluk kak dolang ocin jok nuk laut erih mahtoi, koderih kak dolang kahpal lohpung bagik toluk.
10 Khavun molekat jok kotoluk ngomusik sangkakala ah, mahkak potion jok hajok ngolondang kolo obor, botahak tahkan langit, khavun nopahas bagik toluk dolang sungoi khavun dolang mahtan danum. d 11 Ngaran potion erih Apsintus, rehti ah poit, mahkak bagik toluk tahkan danum erih jadik poit, khavun tumbuk ulun palus kotului ngorih danum jok poit erih. e
12 Umbot erih molekat jok koohpat ngomusik sangkakala. Mahkak arok kuasak jok hajok nahup bagik toluk mahtan ondo, bulan khavun dolang potion, sohinggak niho noh bagik toluk tahkan loang ah. Bagik toluk kak hondo iyam tarang koderih kak beteng ngolomik. f
13 Ahkuk nohtok icok kungan atang naꞌang nuk langit, khavun ahkuk halik nyonih atang erih bokesah mbak auh jok mohing, hiyoi ah: “Colahkak! Colahkak! Colahkak ahkan paring ulun jok nuk duniak ngindoi konihan kotoluk molekat jok bohkon ngomusik sangkakala ah!”