Wahyu 7

Dolang ulun tahkan bangsak Israel jok was tonongak tandak segel

Umbot erih, ahkuk nuneng ohpat behtik molekat tombok nuk koohpat tambong duniak. Idoh nahan koohpat polombut bahiu nuk duniak supayak iyam arok bahiu nuk laut, nuk tanak diang khavun nuk puun kajuk. 2 Khavun ahkuk nuneng icok molekat jok bohkon, iyok lombut tahkan unuk mahtan ondo marah. Iyok ngonin segel tahkan Hotalak jok bolum. Mbak auh jok mohing molekat erih naꞌah koohpat molekat jok was tonongak Hotalak kuasak unuk ngorusak laut khavun tanak diang. 3 Hiyon molekat erih marak ah: “Arak holuk ngorusak laut, tanak diang khavun dolang puun kajuk, ngindoi ihkai jaham nongak tandak segel nuk liko dolang ulun jok molayan Hotalak tok.” 4 Khavun ahkuk nyonih ngindoi arok solahtus ohpat puluk ohpat kujan ulun jok was tonongak tandak segel nuk liko doh. Paring doh erih tahkan koduok balas suku Israel. 5 Tahkan suku Yehuda arok duok balas kujan jok was tonongak tandak segel, suku Ruben duok balas kujan, tahkan suku Gad duok balas kujan kak, 6 suku Asyer duok balas kujan, suku Naptali duok balas kujan, suku Manase duok balas kujan, 7 suku Simeon duok balas kujan, suku Lewi duok balas kujan, suku Isakar duok balas kujan, 8 suku Sebulon duok balas kujan, suku Yusup duok balas kujan, khavun suku Benyamin duok balas kujan.

Ulun arok jok iyam duon toniap karoi ah

9 Umbot erih ahkuk nohtok ah hinok, khavun kihtan yamios karon kolunon jok yarok icok behtik pun duoi niap karon doh. Idoh arok noh ulun-ulun tahkan sotiap bangsak, sotiap suku, sotiap nogarak, khavun sotiap auh. Idoh hatin jubah jok puhtik khavun namit daan palem tandak idoh senang. Dolang ulun erih tombok noharep noku ponuot jok konolehkak khavun noharep Anak Domba. 10 Khavun mbak auh jok mohing idoh bokesah: “Kosolamatan tok lombut tahkan Hotalak tok, jok tuot nuk ponuot jok konolehkak, khavun tahkan Anak Domba atuh!” 11 Paring molekat tombok ngoniling ponuot jok konolehkak, okon-okon, khavun koohpat mahluk erih. Paring molekat erih nyuhkuk nuk husuk ponuot jok konolehkak erih khavun nyembah Hotalak. 12 Hiyon doh: “Amin! Paring sukur ahkan Hotalak tok jok kongolehkak, horahtik, jok kongisung, kongehtek, jok bokuasak, khavun komuhat-Ah nyiring yarok tihkas nyamah ah. Amin!”

13 Arok icok behtik tahkan holang okon-okon erih bokisok mbak ahkuk, hiyoi ah: “Ulun-ulun jok hatin jubah puhtik ihtuh, iyai idoh khavun tahkan amoh idoh lombut?”

14 Hiyok kuk mutah yok: “Iyam kuk taꞌai, Tuan noh jok taꞌai” Mahkak hiyoi ahkak kuk: “Ihtuh dolang ulun jok was nokalo kojorak jok punak nyangit. Idoh was muhik jubah doh mbak dahak Anak Domba sohinggak jadik puhtik. 15 Kotului erih noh idoh tombok nuk husuk ponuot Hotalak jok konolehkak, khavun molayan Iyok hondo ngolomik nuk Lovun Hotalak. Khavun Iyok jok tuot nuk ponuot jok konolehkak erih ahkan nulo ngolindung idoh. 16 Idoh iyam nai ngomok haus khavun bolouk hinok, lasut mahtan ondo iyam nai ahkan moros idoh. 17 Kotului Anak Domba jok tuot nuk tohu-tohun ponuot jok konolehkak erih, Iyok ahkan ngorimbit idoh kolo ponjagak domba jok jagak domba ah. Iyok ahkan ngonin doh noku mahtan danum jok nongak komolum. Khavun Hotalak ahkan ngahpus paring danum mahtan doh.”