Wahyu 6

Anak Domba ngolahpas onom segel

Mahkak ahkuk nohtok Anak Domba molahpas segel jok topahtuk ah tahkan kopihtuk segel erih khavun ahkuk nyonih mahluk jok topahtuk tahkan koohpat mahluk erih bokesah mohing naing auh duhung, hiyoi ah: “Has kohtoi!” 2 Khavun ahkuk nohtok icok kungan kuda puhtik jok nupang ah kolo kolunon namit busur panah. Khavun iyok jok nupang kuda erih tonongak mahkota. Iyok maju sobagai ulun jok manang khavun tulak nyombaan komanang ah.

3 Khavun Anak Domba erih molahpas segel jok koduok ah, khavun ahkuk nyonih hiyon mahluk jok koduok erih: “Has kohtoi!” 4 Icok kungan kuda jok bohkon boluak hinok. Kuda erih warna mangan kolo jelak ahpui. Jok nupang kuda erih tonongak kuasak ahkan ngomin damai sojahtera tahkan duniak tuh, supayak paring kolunon havoi hobunuk. Mahkak iyok tonongak icok iso jok hajok.

5 Khavun Anak Domba erih molahpas segel jok kotoluk, khavun ahkuk ngonih hiyon mahluk jok kotoluk: “Has kohtoi!” Khavun ahkuk nohtok, mahkak kihtan icok kungan kuda mitom. Ulun jok nupang kuda erih namit timbang nuk longoi ah. 6 Khavun ahkuk nyonih arok auh tahkan tohu-tohun koohpat mahluk erih, hiyon auh erih: “Uhpah icok ondo korejak cumak touk molik icok kilo gandum jok tamam, ngindoi iyam toluk kilo gandum jok iyam tamam. Khavun arak ngorusak dolang puun jaitun khavun kabun anggur!”

7 Khavun kotihkak Anak Domba erih molahpas segel jok koohpat, ahkuk nyonih mahluk jok koohpat erih marak ah: “Has kohtoi!” 8 Khavun ahkuk nohtok icok kungan kuda jok warna ah ngolak kolo ulun poros: Jok nupang kuda erih ngarai ah Pahtoi. Khavun Lovuk Lio ngohasuk nuk lihkut ah, ahkan doh tonongak kuasak munuk bagi ohpat kolunon nuk duniak nyihing kolunon hobunuk hatin iso, nyihing louk, nyihing dolang ponyahkit, khavun nyihing binahtang bohanyik.

9 Khavun umbot erih Anak Domba molahpas segel jok kolimok. Mahkak ahkuk nohtok nuk pindak mesbah, nuk anai arok dolang moruan ulun jok was mahtoi pomunuk kotului idoh ngesah Auh Hotalak mbak sotia. 10 Idoh ngoriak mbak auh jok mohing: “O Tuhan jok punak bokuasak, jok kudus khavun jok hinut! Bohkotahiu hinok ihkai alah ngindoi nyiring Ihkok ngohakim kolunon nuk duniak, khavun ngohukum idoh jok was munuk ihkai?” 11 Ico-icok behtik doh ongak icok kolambar jubah puhtik. Khavun idoh sonyuhuk tondok nyohuluk, nyiring was arok uras noh dolang jolahan doh jok hicok molayan mbak idoh, jok ahkan pomunuk havoi mbak idoh kak.

12 Mahkak beteng kuk nohtok Anak Domba erih molahpas segel jok koonom, torjadik noh tanak tokuruk nyangit khavun mahtan ondo jadik mitom kolo kain mitom jok hokoras khavun bulan jadik mangan kolo dahak. 13 Khavun dolang potion jok nuk langit pun nohkah noku duniak kolo buak harak jok motak nohkah tahkan puui ah kotului bahiu bolovut. 14 Langit bobolah khavun duok topahkai ah togulung kolo gulung korahtas, dolang puruk khavun pulo tosurut tahkan unuk ah. 15 Dolang lacak jok luvang duniak, dolang pomipin, dolang komandan, dolang ulun-ulun tahto ulun jok bokuasak nuk duniak, dolang jihpon khavun ulun jok ponolahpas, idoh paring ah nyuhuk arop doh nuk gua-gua khavun nuk holang bahtuk nuk puruk. 16 Hiyon doh ngoriak ahkan puruk khavun dolang bahtuk erih: “Botahas noh noku isung ihkai. Nyuhuk ah noh ihkai supayak Iyok jok tuot unuk ponuot jok konolehkak erih iyam nuneng kai, khavun nyuhuk ihkai tahkan kobirat Anak Domba! 17 Was ohkot ah noh Hotalak khavun Anak Domba ahkan ngohukum paring ulun tahtup kobirat jok punak nyangit. Khavun beteng erih yarok icok behtik ulun pun jok touk solamat tahkan hukuman erih.”