Kitab jok sonyegel khavun Anak Domba
5
Umbot erih ahkuk nuneng gulung kitab nuk longon kotoun Iyok jok tuot nuk ponuot jok konolehkak erih. Nuk luvang khavun luar kitab erih tuvik mbak tulih, totahpik kitab erih iyam taꞌai konguap kotului tonapen mbak pihtuk segel. a 2 Ahkuk Yohanes nuneng icok behtik molekat jok punak muhat iyok bokesah mbak auh jok mohing, hiyoi ah: “Iyai jok pahtut molahpas segel khavun nguap gulung kitab erih?” 3 Tahpik yarok icok behtik ulun pun nuk surga, nuk duniak khavun nuk lovuk lio, pahtut nguap gulung kitab erih khavun nohtok suang ah. 4 Mahkak ahkuk nangih punak piluk kotului yarok icok behtik pun jok pahtut nguap kitab erih, khavun nohtok suang ah. 5 Tahpik arok icok behtik nuk holang okon-okon erih jok marak ahkak kuk: “Arak nangih! Nohtok ah! Horomaung tahkan bangsak Yehuda, koturun lacak Daud, Iyok was manang. Iyok pahtut ngolahpas pihtuk segel khavun nguap gulung kitab erih.” b6 Khavun ahkuk nuneng icok kungan Anak Domba tombok nuk tohu-tohun ponuot jok konolehkak erih, Iyok konodiling ohpat mahluk khavun okon-okon erih. Anak Domba erih arok lohkun avai kolo jok pujik sonyomolih. Iyok tepun pihtuk tonduk khavun pihtuk mahtak. Kopihtuk mahtak erih arok noh kopihtuk roh jok molayan Hotalak khavun was konguhtus noku paring duniak. c 7 Khavun Anak Domba erih nyalan noku husuk khavun norimak gulung kitab erih tahkan longon kotoun Iyok jok tuot nuk ponuot jok konolehkak. 8 Beteng Iyok ngoniu ah botosuhkuk noh koohpat mahluk erih khavun duan puluk ohpat okon-okon erih nuk husuk Anak Domba erih. Mico-micok doh namit konyahpik khavun icok sakir bulo jok tuvik mbak manyan, erih noh doa ulun-ulun suci jok Hotalak tepui. d 9 Khavun doh monyanyi lagu jok bohuak ahkan Anak Domba erih, hiyon lagu erih:
“Ihkok pahtut norimak gulung kitab erih,
Khavun molahpas dolang segel ah.
Kotului Ihkok was sonyomolih khavun mbak dahak Muk.
Ihkok novus dolang ulun tahkan sotiap suku, sotiap auh, sotiap nogarak khavun sotiap bangsak nuk duniak supayak idoh jadik Hotalak tepui. e
10 Ihkok was nguan idoh jadik icok korajaan, yok erih pomipin-pomopin agamak jok korejak ah molayan Hotalak tok,
khavun idoh ahkan momoretah jadik lacak nuk duniak.” f
11 Ulik erih ahkuk nuneng khavun nyonih auh dolang molekat jok iyam duon toniap karoi ah. Idoh tombok ngoniling ponuot jok konolehkak, ngoniling koohpat mahluk khavun okon-okon erih. g 12 Hiyon doh monyanyi mbak auh jok mohing:
“Anak Domba jok was sonyomolih erih pahtut norimak kuasak,
ponahto, kohorahtik, komuhat,
Iyok pahtut kongolehkak, kongisung, khavun kongehtek!”
13 Khavun ahkuk nyonih dolang mahluk jok nuk surga, nuk duniak, nuk pindak duniak, nuk luvang laut khavun paring mahluk jok bolum nuk anai, idoh ngehtek Iyok, hiyon doh:
“Paring pujian, kolehkak khavun kuasak
nyiring yarok tihkas nyamah ah
Ahkan Iyok jok tuot unuk ponuot jok konolehkak khavun Anak Domba.”
14 Mahkak hiyon koohpat mahluk erih: “Amin!” Khavun okon-okon erih pun botosuhkuk monyembah Hotalak khavun Anak Domba.