Yohanes nuneng Hotalak sonyembah nuk surga
4
Ulik erih ahkuk ngonduon ponohtok hinok. Ahkuk nuneng arok icok atop tokuap nuk surga khavun konihan auh jok pujik kuk nyonih ah, yok erih naing auh sangkakala, hiyon auh erih ahkak kuk: “Nuhkat nai noku ohtoi khavun Ahkuk ahkan motohtok ah ahkam muk inon jok alah torjadik umbot ihtuh.” 2 Solengak ahkuk konguasak Roh Kudus. Khavun ulik erih ahkuk nohtok nuk surga arok ponuot jok konolehkak, nuk anai arok icok behtik Ulun jok tuot. 3 Iyok jok tuot unuk ponuot jok kongolehkak erih ngololinyap yamios kotamam ah kolo bahtuk permata yaspis jok bohijau khavun kolo bahtuk permata sardis jok ngolinyap mangan. Khavun arok liuk jok ngolinyap kolo bahtuk permata Jamrud ngoniling ponuot jok konolehkak erih. a 4 Nuk kodiling ponuot erih arok kak jok bohkon duan puluk ohpat ponuot jok konolehkak. Unuk anai tuot noh duan puluk ohpat okon-okon jok hatin kolambik puhtik idoh hatin mahkota bulo. 5 Tahkan ponuot jok kongolehkak erih boluak kolondang kilap khavun auh duhung jok mohing. Khavun nuk husuk ponuot jok konolehkak erih arok pihtuk obor jok ngonyelak, erih arok noh kopihtuk roh jok molayan Hotalak. b 6 Nuk husuk ponuot jok konolehkak erih, kihtan noh aꞌang jok ngololinyap khavun nyoronih kolo laut kaca.Nuk kodiling ponuot jok konolehkak erih arok ohpat mahluk, lihkut khavun husuk ah tuvik konguan mahtai. c 7 Mahluk jok topahtuk ah kolo horomaung, jok koduok ah kolo sahpik mohanoi. Jok kotoluk tapak ah kolo tapak kolunon, khavun jok koohpat ah kolo atang jok honong naꞌang. d 8 Koohpat mahluk erih havoi arok onom ilat ah, jok tuvik konguan mahtai nuk luar khavun nuk luvang ilat ah. Hondo ngolomik dolang mahluk erih iyam tondo-tondok monyanyi,
“Kudus, kudus, kudus noh Tuhan, Hotalak jok punak bokuasak,
Hotalak jok was arok, jok arok huntuh, khavun jok ahkan lombut.” e
9 Koohpat mahluk erih monyanyi lagu-lagu pujian, ngolehkak khavun botorimakasih noku Iyok jok tuot nuk ponuot jok konolehkak erih, iyok erih Iyok jok bolum nyiring yarok tihkas nyamah ah. Khavun beteng dolang mahluk erih monyanyi, 10 mahkak duan puluk ohpat okon-okon erih idoh tosuhkuk tahtup nunop nuk husuk Iyok jok tuot nuk ponuot jok konolehkak erih, khavun idoh nyembah Iyok jok bolum nyiring yarok tihkas nyamah ah erih. Idoh nihkas mahkota jok hatin doh noku husuk ponuot jok konolehkak erih. Khavun hiyon doh:
11 “Oo Tuhan, Hotalak ihkai!
Ihkok pahtut kongehtek, kongolehkak khavun norimak kuasak.
Kotului Ihkok noh jok naoi paring aꞌang,
khavun tului kokanim-Muk kak paring aꞌang erih torjadik khavun arok.”