Tanjik Yesus ahkan jomaat nuk kota Sardis
3
Khavun hiyoi-Ah ahkak kuk: “Nulih ah noh ahkan molekat jomaat nuk kota Sardis:Ihtuh noh Auh Iyok jok ngahtur kopihtuk roh jok molayan Hotalak khavun jok namit kopihtuk potion nuk longoi kotoui-Ah. Ahkuk taꞌak paring aꞌang jok konguan mik. Tuneng ah ihkam bolum, totahpik jok kotuui ah ihkam mahtoi! 2 Kotului erih sadar noh khavun ngorohon ah noh kopocayak mik jok manyo mahtoi! Tului Ahkuk taꞌai ngindoi nuk husuk Hotalak jok ponolayan kuk, paring korejak mik jaham arok jok umbot uras. 3 Jadik nohouk ah noh ajar barak jok tonorimak khavun sonyonih mik tahkan Ahkuk, pahtuh noh mbak paring ah erih khavun botobat noh tahkan dolang dosa mik. Ngindoi ihkam iyam bojaga-jagak, mahkak Ahkuk lombut kolo ulun ponahko. Ihkam iyam taꞌai mirak Ahkuk ahkan lombut ngohakim ihkam.a 4 Totahpik nuk Sardis arok pirak behtik ulun jok pomolum ah borasih khavun iyam nguan dosa, ulun jok kolo erih ahkan nyalan hicok mbak Ahkuk hatin kolambik puhtik, kotului idoh pahtut norimak ah. 5 Idoh jok manang ngolavan kuasak jok jaek idoh ahkan pomosoloh mbak kolambik puhtik erih. Ahkuk iyam ahkan ngahpus ngaran doh tahkan Buhkuk Komolum jok suang ah dolang ngaran ulun jok ngonduon komolum jok yarok tihkas nyamah ah tahkan Hotalak. Ahkuk ahkan ngahkuk iyok nuk husuk Amai Kuk khavun dolang molekat ngindoi idoh arok noh Ahkuk tepui. b
6 Nyonih ah noh pios-pios, inon jok pomarak Roh Kudus ahkan dolang jomaat.”
Tanjik Yesus ahkan jomaat nuk kota Piladelpia
7 Hiyon Yesus ahkan Yohanes: “Nulih ah noh ahkan molekat jomaat nuk kota Piladelpia:
Ihtuh noh Auh tahkan Iyok Jok Kudus, Jok Hinut, khavun jok namit kucik Daudc lacak Israel; ngindoi Iyok nguap atop iyam arok icok behtik ulun pun jok touk nuhtup ah. Ngindoi Iyok nuhtup ah, iyam arok icok behtik ulun pun jok touk nguap ah. d 8 Ahkuk taꞌak paring aꞌang jok konguan mik. Nuneng ah Ahkuk was nguhkoi atop ahkan mik, iyam arok icok behtik pun jok touk nuhtup ah. Ahkuk taꞌai ngindoi ihkam ulun-ulun jok iyam peting nuk holang ulun arok, totahpik ihkam tehtap pahtuh mbak Auh Kuk khavun ihkam iyam ngilang Ahkuk. 9 Nyonih ah noh pios-pios! Arok pirak behtik ulun, idoh Lacak paring otuk tepui, iyok erih dolang ulun jok ngohavot arop ah ulun Yahudi. Totahpik jok kotuui ah iyam, idoh bobalik. Ahkuk ahkan nyuhuk idoh lombut noku ihkam khavun nyuhkuk nuk husuk mik, idoh ahkan taꞌai ngindoi Ahkuk mongasihi ihkam.e 10 Ihkam was pahtuh mbak poletah-Kuk, yok erih tehtap sabar holuk poh ihkam pomonyorak kotului Ahkuk. Kotului erih Ahkuk ahkan jagak ihkam, ngindoi ondo kojorak erih lombut. Ondo erih ahkan torjadik nuk luvang duniak khavun ahkan nikos paring kolunon. 11 Ahkuk ahkan pohos lombut! Jagak ah noh kopocayak mik supayak tehtap borohon khavun iyam arok icok behtik ulun pun jok touk ngomin mahkota mik yok erih hadiah jok motohtok ah ihkam manang ngolavan kuasak jok jaek. 12 Idoh jok manang ngolavan kuasa jok jaek, idoh ahkan konguak Kuk kolo johik nuk Lovun Hotalak, idoh tehtap arok unuk anai nyiring yarok tihkas nyamah ah. Ahkuk ahkan nulih ngaran Hotalak-Kuk khavun ngaran kota Hotalak-Kuk nuk ulun erih. Kota erih iyok noh Yerusalem bohuak, jok ahkan mosuluh tahkan surga. Ahkuk halik ahkan nulih ngarak Kuk jok bohuak nuk idoh. f
13 Nyonih ah noh pios-pios, inon jok pomarak Roh Kudus ahkan dolang jomaat.”
Tanjik Yesus ahkan jomaat nuk kota Laodikia
14 Khavun hiyoi-Ah ahkak kuk: “Nulih ah noh ahkan molekat jomaat nuk kota Laodikia:
Ihtuh noh Auh tahkan Iyok jok pomarak Aming. Saksi jok sotia jok hinut khavun nyihing Iyok Hotalak naoi paring aꞌang. h 15 Ahkuk taꞌak paring aꞌang jok konguan mik: Ihkam iyam ngomelek Ahkuk, tahpik iyam kak tuꞌuk-tuꞌuk ngohasuk Ahkuk. Ihkam havoi kolo mbak danum jok lasu-lasut, iyam bolasut khavun iyam kak sorongin. Ahkuk kanik ihkam tuꞌuk-tuꞌuk bolasut ngindoi iyam sorongin. 16 Kotului ihkam kolo danum jok lasu-lasut, iyam bolasut khavun iyam kak sorongin, mahkak Ahkuk ahkan ngomelek ihkam, kolo ulun jok ngorih danum khavui nguhtak ah. 17 Hiyon mik: ‘Ihkai tahto khavun tepun yamios karoi barang bandak, ihkai iyam arok tahpas kokurang kai.’ Totahpik jok kotuui ah iyam kam taꞌai yamios kojorak ah arop mik khavun yamios kopiluk ah komolum mik! Ihkam malak, toburang khavun bobulen. 18 Tului erih Ahkuk ngajar marak ihkam supayak ihkam molik bulo jok tahkan Ahkuk, iyok erih bulo jok tulin tului pomahpui, supayak ihkam jadik tahto. Molik ah noh kak hatik jok puhtik tahkan Ahkuk supayak ihkam iyam toburang khavun miak. Khavun molik noh kak obat jok ahkan kongasak nuk mahtan mik supayak ihkam touk nohtok. 19 Ahkuk ngomirat khavun morihpit dolang ulun jok kongasih Ahkuk. Jadik mokarah ah noh ngindoi ihkam punak tuꞌuk-tuꞌuk pocayak khavun botobat noh tahkan dosa-dosa mik! i 20 Nuneng ah! Ahkuk tombok nuk depan atop khavun naꞌah. Ngindoi arok ulun jok nyonih auh-Kuk, khavun nguap atop, Ahkuk ahkan nyolong khavun tobarung mbak iyok. Ahkuk ahkan kuman hombo-homboh mbak iyok khavun iyok ahkan kuman hombo-homboh mbak Ahkuk. 21 Idoh jok manang ngolavan kuasak jok jaek ahkan pomosuah Kuk tuot hicok mbak Ahkuk nuk ponuot Kuk jok kongolehkak. Havoi mbak kolo Ahkuk kak was manang ngolavan kuasak jok jaek khavun huntuh tuot hicok mbak Amai-Kuk nuk ponuot-Ah jok kongolehkak.
22 Nyonih ah noh pios-pios, inon jok pomarak Roh Kudus ahkan dolang jomaat.”