Tanjik Yesus ahkan jomaat nuk kota Epesus
2
Khavun Iyok jok kolo Anak Kolunon erih marak ahkak kuk: “Nulih ah noh ahkan molekat jomaat nuk kota Epesus:Ihtuh noh auh tahkan Iyok jok namit kopihtuk potion nuk longoi-Ah jok hilak kotoui, khavun jok nyalan nuk holang kopihtuk johik bulo nuk nihkas sumbuk: 2 Ahkuk ta'ak inon jok konguan mik, ihkam tuꞌuk-tuꞌuk korejak mahtoi-mahtoi ahkak-Kuk khavun sabar noharep kojorak mik. Ihkam ngomelek dolang ulun jaek khavun ihkam noliti ulun-ulun jok ngahkuk arop ah rasul, sohinggak ihkam taꞌai ngindoi idoh iyam tuꞌuk-tuꞌuk rasul khavun idoh bobalik. 3 Ihkam tehtap sabar nuk luvang kojorak kotului pocayak mbak Ahkuk, khavun ihkam iyam puhtus asa. 4 Totahpik arok icok aꞌang jok nguan Ahkuk ngomirat ihkam, kotului ihkam iyam nai mongasih Ahkuk khavun iyam nai mongasihi havoi arop mik jok pocayak, kolo kasih ihkam kotihkak nopahtuk pocayak mbak Ahkuk. 5 Nohouk ah holuk ihkam punak mongasihi Ahkuk! Kotului erih botobat noh khavun nguai ah noh paring aꞌang kolo beteng topahtuk ihkam pocayak mbak Ahkuk. Ngindoi ihkam iyam botobat khavun iyam nguai ah, Ahkuk ahkan lombut noku ihkam khavun ngomin johik bulo nuk nihkas sumbuk erih tahkan unuk ah. 6 Totahpik arok aꞌang jok hinut konguan mik yok erih: ihkam becik mbak tobiat dolang murit Nikolaus, Ahkuk halik becik mbak dolang tobiat doh erih.
7 Nyonih ah noh pios-pios, inon jok pomarak Roh Kudus ahkan dolang jomaat.
Idoh jok manang ngolavan kuasak jok jaek ahkan pomosuah Kuk kuman buak tahkan puun kajuk jok nongak komolum, jok arok nuk Taman Pirdausa Hotalak.” b
Tanjik Yesus ahkan jomaat nuk kota Smirna
8 Khavun hiyoi-Ah ahkak kuk: “Nulih ah noh ahkan molekat jomaat nuk kota Smirna kolihtuh:
Ihtuh noh Auh tahkan Iyok jok Topahtuk khavun jok Pongohpah ah, jok lomoi mahtoi khavun jok hulik bolum tahkan pomalus-Ah: c 9 Ahkuk taꞌai ihkam pononyorak khavun malak, totahpik kotuui ah ihkam tahto luvang kopocayak mik. Ahkuk halik taꞌai ihkam pomotenah dolang ulun jok ngahkuk arop ah ulun Yahudi, totahpik jok kotuui ah iyam. Idoh arok noh Lacak paring otuk tepui. 10 Ihkam alah jorak, kotului erih arak mihkoh! Nuneng ah noh! Lacak paring otuk ahkan nyuhuk dolang musuh mik navan ihkam khavun ngipos ihkam noku luvang ponjara. Mbak koderih ihkam tonikos Lacak paring otuk. Khavun ihkam ahkan ngomok jorak sopuluh ondo kotahiu ah, tehtap noh sotia oluk poh ihkam alah mahtoi. Khavun Ahkuk ahkan nongak bolum jok yarok tihkas nyamah ah, sobagai hadiah kotului ihkam was manang.
11 Nyonih ah noh pios-pios inon jok pomarak Roh Kudus ahkan dolang jomaat.
Idoh jok manang ngolavan kuasak jok jaek, iyam ahkan jorak kotului pomalus jok koduok kali ahd.” e
Tanjik Yesus ahkan jomaat nuk kota Pergamus
12 Khavun hiyoi-Ah ahkak kuk: “Nulih ah noh ahkan molekat jomaat nuk kota Pergamus:
Ihtuh noh Auh tahkan Iyok jok tepun lading monyoot hokosilak ah: 13 Ahkuk taꞌai ihkam mocon nuk Pergamus, iyok erih kota nuk amoh Lacak paring otuk bokuasak, totahpik ihkam tehtap sotia khavun iyam ngilang Ahkuk. Holuk poh Antipas, saksi-Kuk jok sotia erih pomunuk nuk husuk mik nuk kota erih, ihkam tehtap iyam ngilang Ahkuk.
14 Totahpik Ahkuk ngomirat ihkam tului dolang aꞌang ihtuh: Arok pirak behtik ulun nuk holang ihkam jok ngohasuk ajar barak Bileam. Bileam halik ngajar Balak bohkolo cara ngolanyat ulun Israel, iyok erih mujuk supayak ulun Israel kuman ukun ponguman jok was sonyurung noku topahtung khavun tiruh mbak bavik bahkas jok iyam avui humai ah.f 15 Koderih kak arok pirak behtik nuk holang ihkam ulun-ulun jok ngohasuk ajar barak dolang murit Nikolaus. 16 Botobat noh tahkan dosa mik! Ngindoi iyam Ahkuk ahkan pohos lombut noku ihkam khavun Ahkuk ahkan hobunuk ngolavan idoh mbak lading jok boluak tahkan bauk Kuk.
17 Nyonih ah noh pios-pios, inon jok pomarak Roh Kudus ahkan dolang jomaat!
Idoh jok manang ngolavan kuasa jok jaek ahkan tonongak Kuk roti manna jok sonyuhuk khavun idoh ahkan norimak icok bahtuk puhtik tahkan Ahkuk. Nuk bahtuk erih tonulih ngarak jok bohuak jok iyam ulun taꞌai salak mbak ulun jok norimak ah kiak.” g
Tanjik Yesus ahkan jomaat nuk kota Tiatira
18 Khavun hiyoi-Ah ahkak kuk: “Nulih ah noh ahkan molekat Jomaat nuk kota Tiatira:
Ihtuh noh Auh Anak Hotalak, jok mahtai-Ah ngonyelak kolo jelak ahpui, khavun paai-Ah ngolondang kolo tombaga kongisak. 19 Ahkuk ta'ak paring aꞌang jok konguan mik: Ihkam mongasihi havoi arop mik, ihkam sotia khavun molayan Ahkuk, ihkam sabar nuk luvang kojorak mik. Polayanan mik jok huntuh holovik arok mbak polayanan mik jok lomoi topahtuk ihkam pocayak mbak Ahkuk. 20 Totahpik arok icok aꞌang jok nguan Ahkuk ngomirat ihkam: Kotului ihkam mosuah bavik jok ngarai Isebel ngolanyat dolang jihpon Kuk, iyok ngahkuk arop ah nabik totahpik iyok ngajar dolang jihpok Kuk supayak tiruh mbak bavik bahkas jok iyam avui humai ah khavun kuman ukun ponguman jok was sonyurung noku topahtung.h 21 Ahkuk was nongak waktu supayak iyok botobat tahkan dolang dosa ah, totahpik iyok iyam kanik tondok tahkan tobiat ah jok tiruh mbak bahkas jok iyam avui humai ah. 22 Nohtok ah noh! Ahkuk ahkan nguan bavik erih poros tehen sohinggak iyok iyam taꞌai kuat tahkan poniruh ah. Khavun ulun-ulun bahkas jok tiruh hicok mbak iyok, idoh ahkan nyangit jorak nuk anai. Ngindoi idoh iyam botobat tahkan dolang tobiat jok konguan doh hicok mbak bavik erih. 23 Dolang murit ah ahkan pomunuk Kuk kak, supayak dolang jomaat taꞌai ngindoi Ahkuk kiyak jok taꞌai dolang ahtoi pihkir kolunon. Khavun ngohukum paring ulun nuk holang ihkam sosuai mbak dolang dosa jok konguan mik.i
24 Totahpik ahkan mik ulun nuk Tiatira jok iyam ngohasuk ajar barak jok jaek tahkan bavik erih, iyok erih inon jok pomarak doh ajar barak tahkan Lacak paring otuk. Ahkuk marak ah ahkan mik: Ahkuk iyam ahkan nongak aꞌang jok bahat hinok ahkan mik. 25 Totahpik ihkam alah tehtap borohon pocayak mbak Ahkuk nyiring Ahkuk lombut hinok. 26 Iyai jok manang ngolavan kuasak jok jaek khavun nguai dolang poletah Kuk nyiring Ahkuk lombut hinok, Ahkuk ahkan nongak kuasak ahkan doh nuk isung paring bangsak, kolo kuasak jok tonongak Amai ahkak-Kuk. j 27 Idoh jok tonongak kuasak erih ahkan momoretah bangsak-bangsak mbak muhtus, sohinggak bangsa-bangsak erih pomorohpuh kolo keceng jok tonapak tahkan tanak liet. 28 Ahkuk ahkan nongak tandak komanang ahkan doh yok erih potion timur. 29 Nyonih ah noh pios-pios inon jok pomarak Roh Kudus ahkan dolang jomaat!”