Wahyu 1

WAHYU

AHKAN YOHANES

Kitab ihtuh ngesah inon jok pomokarah Yesus Kristus mongenai paring aꞌang jok ahkan pohos torjadik. Hotalak marak ahkan Kristus supayak ngesah paring ah erih ahkan dolang jihpoi-Ah. Khavun Kristus nguhtus molekat-Ah noku jihpon-Ah Yohanes supayak motohtok inon jok ahkan torjadik erih. 2 Yohanes ngesah paring aꞌang jok tonohtok ah, iyok nulih mongenai tanjik Hotalak khavun inon jok pomarak Yesus Kristus ahkai ah. 3 Ngandah noh ulun jok ngomasak ah nuk husuk jomaat, ulun jok nyonih khavun pahtuh mbak tanjik tahkan Hotalak erih. Kotului paring jok tonulih erih was manyo noh torjadik.

Salam ahkan kopihtuk jomaat nuk provinsi Asia Koik

4 Salam tahkan ahkuk Yohanes, ahkan kopihtuk jomaat nuk Provinsi Asia Koik. Ahkuk bodoa nihak ndoi kopion ahtoi Hotalak jok punak hajok khavun damai sojahtera tahkan Hotalak. Hotalak jok arok huntuh, jok uwas arok, jok ahkan lombut. Khavun nihak ndoi kopion ahtoi jok punak hajok khavun damai sojahtera tahkan kopihtuk roh jok arok nuk husuk ponuot Hotalak jok konolehkak hicok mbak ihkam. 5 Khavun ahkuk bodoa kak nihak ndoi kopion ahtoi jok punak hajok khavun damai sojahtera tahkan Yesus Kristus saksi jok sotia, jok topahtuk ah hulik bolum tahkan pomalus-Ah, khavun Iyok kopalak tahkan paring lacak jok arok nuk duniak.

Yesus mongasihi ihtok, Iyok molahpas ihtok tahkan dolang dosa tok nyihing pomalus-Ah nuk salib. 6 Yesus jok was nguan ihtok jadik icok korajaan, yok erih pomipin-pomipin agamak jok korejak ah molayan Hotalak, Amai-Ah. Yesus noh jok kongolehkak khavun bokuasak nyiring yarok tihkas nyamah ah. Amin.

7 Nuneng ah noh, Iyok lombut nahtup havun! Paring ulun ahkan nuneng Iyok, koderih kak ulun-ulun jok was umbot mongoh bolihkat Ah. Paring bangsak nuk duniak ahkan nangih noloung kotului Iyok. Aꞌang erih mihtik ahkan torjadik! Amin.

8 Hiyon Tuhan Hotalak: “Ahkuk noh Alpa khavun Omega, jok Topahtuk khavun jok Pongohpah ah, jok arok huntuh, jok was arok khavun jok ahkan lombut. Ahkuk noh jok punak bokuasak.”

Yohanes nuneng komulian Yesus

9 Ahkuk, Yohanes bari-basak mik nuk luvang Kristus, jok havo-havoi jorak kotului ngohasuk Iyok. Ahkuk halik sobagai ulun jok Iyok tepui, ihtok havo-havoi sabar nuk luvang kojorak tahtup ngindoi ohkot ah Hotalak momoretah jadik Lacak nuk luvang duniak. Ahkuk kongindo noku pulo Patmos kotului ahkuk ngesah mongenai Auh Hotalak khavun aꞌang jok hinut mongenai Yesus. 10 Ondo minggu beteng ondo sombayang, ahkuk konguasak Roh Kudus. Khavun ahkuk nyonih auh jok mohing naing auh sangkakala tahkan lihkut kuk. 11 Tahkan anai konihan auh jok marak ah: “Nulih ah noh paring aꞌang jok tonohtok muk noku luvang kitab khavun motiang ah noh buhkuk erih noku pihtuk jomaat nuk kota: Epesus, Smirna, Pergamus, Tiatira, Sardis, Piladelpia, khavun Laodikia.”

12 Mahkak ahkuk molio noku lihkut nohtok ah iyai jok bokesah mbak ahkuk, nuk anai ahkuk nohtok arok pihtuk johik unuk nginak sumbuk jok tonapak tahkan bulo. 13 Nuk tohun dolang johik sumbuk erih, kihtan noh icok behtik kolo Anak Kolunon jok tombok. Iyok hatin jubah jok ombuk nyiring dahpot paai, khavun nuk husuk-Ah tonokuling kain bulo. 14 Balo-Ah puhtik kolo bulun domba. Mahtai-Ah ngonyelak kolo jelak ahpui. 15 Khavun paai-Ah ngolondang kolo tombaga kongisak. Auh-Ah naing ohtuh nohkan jok hajok. 16 Longoi kotoui-Ah nambit pihtuk potion, khavun tahkan baui-Ah boluak lading jok monyoot hokosilak. Tapak-Ah tarang kolo mahtan ondo beteng tohun ondo. 17 Khavun beteng kuk nohtok Iyok, ahkuk tosuhkuk nuk donik paai-Ah kolo ulun jok uwas mahtoi. Totahpik Iyok nihkas longoi kotoui-Ah nuk isung ahkuk khavun hiyoi-Ah: “Arak mihkoh! Ahkuk noh Jok Topahtuk khavun Jok Pongopah-Ah. 18 Ahkuk noh jok bolum. Lomoi Ahkuk uwas mahtoi, tahpik nohtok ah noh, huntuh Ahkuk bolum nyiring yam arok tihkas nyamah ah. Ahkuk bokuasak ngopolum ulun mahtoi khavun bokuasak nuk lovuk lio. 19 Kotului erih nulih ah noh dolang aꞌang jok tonohtok muk, yok erih jok tonohtok muk huntuh khavun aꞌang jok ahkan torjadik nain. 20 Sojaham ah ihkok iyam taꞌai rehti tahkan pihtuk potion jok was tonohtok muk nuk longok kotouk Kuk khavun pihtuk johik bulo nuk nginak sumbuk erih. Ihtuh noh rehti ah: kopihtuk potion iyok noh dolang molekat kopihtuk jomaat, khavun kopihtuk johik bulo arok noh kopihtuk jomaat.”