Tehtap noh sotia holuk poh nuk luvang kojorak
2
Timotius, anak kuk! Ihkok alah muhat kotului kopion ahtoi Hotalak jok punak hajok tonongak ahkan tok, tului ihtok hicok humbak mbak Kristus Yesus. 2 Inon jok uwas sonyonih muk tahkan ahkuk kotihkak ahkuk ngajar nuk husuk ulun arok, ihkok alah ngajar ah hinok ahkan ulun-ulun jok touk kok pocayak ah khavun jok pitar ngajar, supayak idoh touk kak ngajar ulun bohkon.3 Ihkok alah siap jorak mbak ihkai sobagai porajurit Kristus Yesus jok pios. 4 Porajurit jok honong korejak, iyam ahkan ngalut arop ah umbak urus ah bongoi, kotului iyok kanik ngosenang ahtoi komandan ah. 5 Ulun jok ahkan umbak lomba, iyok iyam taꞌai jadik juara ngindoi iyok yam pahtuh mbak porahturan lomba jok was tonetu. 6 Ulun pongumok jok was korejak mahtoi-mahtoi, iyok noh jok topahtuk ah kuman buak paroi tahkan umoi ah. 7 Mihkir ah noh pios-pios inon jok pomarak kuk erih. Tului Tuhan ahkan nongak ahkam muk rehti tahkan paring ah erih.
8 Nohouk ah noh Timotius: Tarung Pios jok pomarak kuk erih arok noh tarung mongenai Yesus Kristus. Iyok arok noh koturun Daud jok uwas hulik bolum tahkan pomalus-Ah. 9 Kotului ngesah Tarung Pios erih noh, huntuh ahkuk jorak. Holovik hinok ahkuk kongahut mbak ratai kolo ponjahat. Totahpik auh Hotalak iyam duon konahut mbak rantai. 10 Kotului erih noh ahkuk tehtap borohon nuk luvang kojorak ihtuh, ahkan ulun-ulun jok konopilik Hotalak. Ahkuk kanik supayak idoh ngonduon kosolamatan khavun komulian jok yarok tihkas nyamah ah sobagai ulun jok Kristus tepui. 11 Auh tuh punak hinut:
“Ngindoi ihtok nohtah komolum tok jok bodosa, mahkak ihtok uwas mahtoi umbak Yesus
Mbak koderih nain ihtok ahkan bolum hicok mbak Iyok.
12 Ngindoi ihtok tehtap sabar nuk luvang kojorak,
ihtok ahkan umbak momorintah kak hicok mbak Iyok.
Ngindoi ihtok ngilang Iyok,
Iyok halik ahkan ngilang ihtok. a
13 Ngindoi ihtok iyam sotia,
Iyok ahkan tehtap sotia,
kotului Iyok iyam taꞌai ngilang arop Ah bongoi.”
Ulun jok korejak supayak nyenang ahtoi Hotalak
14 Punak pios ngindoi ihkok nyuhuk dolang ulun ngingat ah mongenai kesah jok hinut tuh. Nuk husuk Hotalak, ngajar marak ah noh idoh supayak arak hirat mongenai tuhtui auh jok yarok gunai ah. Tului erih iyam peting, tahpik touk ngalut dolang ulun jok nyonih ah. 15 Ihkok alah tuꞌuk-tuꞌuk ngotiak supayak kongahkuk Hotalak sobagai ulun jok pahtut korejak ahkai Ah. Khavun ihkok arak miak mongenai korejak muk, totahpik ngajar noh mbak toliti ajar barak jok hinut tahkan Hotalak. 16 Arak ngoronik arop muk mbak ulun-ulun jok tuhtui auh ah jok yarok gunai ah khavun ngohinak Hotalak. Kotului tuhtui auh jok kolo erih nguan ulun mahi-mahik macuk mbak Hotalak. 17 Ajar barak doh erih ngorusak kopocayak ulun kolo ponyahkit kangker jok ganas. Nuk holang idoh arok noh Himeneus khavun Filetus. 18 Idoh uwas iyam nai pocayak mbak ajar barak jok hinut. Idoh marak ah ngindoi ajar barak mongenai ulun mahtoi ahkan konomolum hinok aꞌang erih was torjadik noh, mbak ajar barak doh erih idoh ngalut kopocayak ulun arok. 19 Totahpik Hotalak uwas motombok jomaat Ah mbak ajar barak jok hinut jok borohon khavun iyam taꞌai tokuruk. Nuk anai tonulih: “Tuhan nyokonok dolang ulun jok Iyok tepui” khavun “Ulun jok ngahkuk arop ah pocayak mbak Tuhan, iyok alah tondok nguan tobiat ah jok jaek.” b
20 Nuk luvang lohpo jok segah arok malik macam barang bandak. Barang bandak erih arok jok tonapak tahkan bulo khavun perak, arok kak jok tonapak tahkan kajuk khavun tanak. Barang bandak jok tonapak tahkan bulo khavun perak ahkan hatin nuk nguan aꞌang jok punak poduluk. Barang bandak jok tonapak tahkan kajuk khavun tanak ahkan hatin nuk nguan aꞌang jok iyam dalo poduluk. 21 Koderih kak mbak ihkok ulun jok pocayak, ngindoi ihkok morasih arop muk tahkan aꞌang jok jaek mahkak ihkok ahkan hatin nuk nguan aꞌang jok punak poduluk. Ihkok ahkan jadik kudus khavun pahtut nguan korejak jok pios, jok was sonyodiak Tuhan ahkan muk. 22 Kotului erih nokacuk ah noh arop muk tahkan kojolik jok jaek tahkan ulun bio. Ngotiak ah noh bolum hinut, sotia, mongasihi ulun bohkon, khavun bolum linuh mbak ulun bohkon jok pocayak Tuhan, mbak ahtoi jok borasih. 23 Arak noh ihkok hobatah hojeleh mongenai ajar barak jok siak-siak umbak dolang ulun. Ihkok taꞌai ngindoi paring erih ngolopung pongirat kiyak. 24 Sobagai polayan Tuhan arak noh hirat, ihkok alah pios mbak paring ulun, pitar ngajar, khavun sabar. 25 Polayan Tuhan alah ngajar ah noh ulun-ulun jok ngolavan, ngajar idoh mbak tuhtui auh jok pios. Nihak ngindoi Hotalak ngubah ahtoi pihkir doh sohinggak touk hulik noku Hotalak khavun norimak ajar barak jok hinut. 26 Mbak koderih idoh sadar hinok khavun tolahpas tahkan kuasak Lacak paring otuk jok uwas ngurung idoh khavun jok uwas jua-juan nyuhuk idoh ngohasuk kokaniu ah.