SURAT PAULUS JOK KODUOK
AHKAN
TIMOTIUS
Salam
1
1-2 Timotius, anak kuk jok kongasih kuk, ahkuk Paulus nulih surat ihtuh ahkam muk, nihak ngindoi Hotalak Amai khavun Tuhan tok Kristus Yesus nongak berkat, bolum linuh, khavun masik mbak ihkok.Mbak kokanin Hotalak, ahkuk kongahtang jadik rasul Yesus Kristus khavun konguhtus ahkan ngesah mongenai komolum jok yarok tihkas nyamah ah jok was kononjanjik Hotalak. Komolum erih tonorimak tok kotului ihtok hicok mbak Yesus Kristus. a
Bosukur nuk luvang doa
3 Ahkuk bosukur noku Hotalak jok ponolayan kuk mbak ahtoi pihkir jok borasih kolo jok konguan dolang tahtuk ajuh kuk holuk. Ahkuk nulo botorimakasih noku Hotalak nyinong ahkuk nohouk ihkok Timotius nuk luvang doa kuk hondo ngolomik. 4 Ahkuk nohouk tangih muk kotihkak ahkuk tulak. Kotului erih noh ahkuk punak jolik bohavung hinok mbak ihkok supayak beteng bohavung erih noh ahkuk touk tuꞌuk-tuꞌuk ngandah. 5 Ahkuk nohouk ah ngindoi ihkok tuꞌuk-tuꞌuk pocayak mbak Kristus, havoi kolo kopocayak inik muk Lois khavun inai muk Eunike. Ahkuk punak yakin ihkok tepun kopocayak kolo erih kak. b 6 Kotului erih noh ahkuk nyuhuk kok nohouk ah supayak ihkok tuhkoi nguan korejak sosuai karunia, jok tonorimak muk beteng kuk bodoa nihkas longok kuk noku isung ihkok. 7 Kotului Roh jok ongak Hotalak ahkan tok, iyam Roh jok nguan tok jadik pomihkoh. Totahpik Roh Hotalak erih nguan ihtok mahik somangat, tuvik mbak kasih khavun touk nahan arop tok.
8 Kotului erih arak noh miak nongak kosaksian mongenai Tuhan tok, khavun arak noh kak miak mongenai ahkuk, jok pononyara kotului Iyok. Totahpik ihkok mbak komuhat jok tahkan Hotalak, umbak noh ngomok kojorak tului Tarung Pios erih. 9 Hotalak nyolamat ihtok khavun naꞌah ihtok supayak jadik ulun-ulun jok Iyok tepui. Iyok nguan paring aꞌang erih iyam kotului inon jok was konguan tok, totahpik kotului evak-Ah bongoi khavun kopion ahtoi-Ah. Sojaham duniak tonaoi Iyok ngevak ahkan nongak kopion ahtoi Ah jok punak hajok ahkan tok nyihing Yesus Kristus. 10 Khavun huntuh, Hotalak was motohtok evak kosolamatan erih, nyihing polombut Lacak Ponyolamat tok yok erih Yesus Kristus. Iyok ngolohpung kuasak jok touk munuk ulun, khavun nyihing Tarung Pios Iyok mokarah jalan komolum jok yarok tihkas nyamah ah ahkan tok.
11 Supayak Tarung Pios erih kongesah ahkan paring ulun, mahkak Hotalak ngahtang ahkuk jadik rasul khavun jadik guruk. c 12 Kotului erih noh ahkuk jorak nyiring huntuh, totahpik ahkuk tehtap yakin, kotului ahkuk taꞌai iyai jok sonyembah kuk. Ahkuk halik yakin kak nyiring Ondo Kiamat iyok touk jagak inon jok was Yok pocayak ah ahkak kuk. 13 Ahkuk uwas ngajar ajar barak jok hinut ahkam muk, ngohasuk ah noh ajar barak erih. Tehtap noh pocayak umbak Kristus khavun bolum noh nuk luvang kasih jok uwas tonorimak tului ihtok icok humbak mbak Kristus. 14 Ihkok umbot norimak ajar barak jok punak bolehkak erih. Mahkak mbak kavat tahkan Roh Hotalak jok bolum nuk luvang arop muk jagak ah noh ajar barak erih.
15 Ihkok taꞌai ngindoi paring ulun jok arok nuk Asia was nohtah ahkuk, koderih kak Figelus khavun Hermogenes. 16 Totahpik koluarga Onesiforus noh jok nulo nguan ahtoi kuk senang. Nihak ngindoi Tuhan kanik motohtok kopion ahtoi-Ah ahkan doh. Oluk poh ahkuk nuk luvang ponjara Onesiforus iyam miak nyarik ahkuk. 17 Beteng iyok docok nuk Roma, iyok tuꞌuk-tuꞌuk ngotiak ngurah ahkuk nyiring iyok tobarung mbak ahkuk. 18 Khavun ihkok taꞌai ngindoi nuk Epesus iyok punak tumbuk ngavat ahkuk. Nihak ngindoi Tuhan motohtok kopion ahtoi-Ah ahkan Onesiforus beteng ondo Yesus lombut ahkan mongadili paring kolunon.