Aꞌang jok alah konguan ahkan ulun-ulun jok pocayak
5
Arak noh ihkok nyangit birat ahkan ulun jok okok mbak ihkok totahpik mangit noh iyok nyonih auh muk kolo iyok noh amai muk. Nguai ah noh ulun-ulun jok bio kolo jolaham muk harik. 2 Khavun nguai ah noh ulun okok bavik kolo kok ngolehkak inai muk. Khavun bavik-bavik jok honong bio ihkok alah nguan doh kolo kok pios mbak arik muk, mbak ahtoi jok borasih.3 Ngolehkak ah noh dolang baluk jok tuꞌuk-tuꞌuk bolum bongon doh. 4 Tahpik ngindoi dolang baluk tepun dolang anak khavun tumbuk osui ah, dolang anak khavun osui ah erih noh jok topahtuk ah alah kongajar supayak doh ngorehti ngindoi idoh noh jok alah ngurus dolang koluarga doh jok baluk. Mbak koderih idoh malos kopion ulun okok doh khavun dolang tahtuk ajuh doh. Kotului aꞌang erih noh jok ngosenang ahtoi Hotalak. 5 Baluk jok poduluk kongavat iyok noh baluk jok tuꞌuk-tuꞌuk bolum bongoi ah, khavun jok yarok dolang barih basak ah jok nyorunuh yok. Iyok ngindoi tonoh Hotalak kiyak ahkan paring kopoduluk ah. Hondo ngolomik iyok nulo bodoa noku Hotalak nyavot kavat mbak Hotalak. 6 Totahpik baluk jok bolum ahkan ngosenang arop ah kiyak, ahtoi ah was palus oluk poh behtiu ah honong bolum. 7 Marak ah noh paring aꞌang erih ahkan ulun-ulun jok uwas pocayak, supayak doh nyorunuh koluarga ah. Mbak koderih yarok ulun jok marak ngindoi doh salak. 8 Totahpik ngindoi ulun pocayak iyam nyorunuh dolang barih basak ah, holovik hinok arik okak ah bongoi, mahkak ulun erih iyam nai kanik pocayak. Tobiat ah erih punak jaek tahkan ulun jok iyam pocayak.
9 Jok touk ponondaftar sobagai baluk ahkan konorohop jomaat iyok noh idoh jok umur ah onom puluk toun holovik, khavun idoh sinok kiyak ngomosai. 10 Khavun ulun arok taan iyok pios, kolo: uwas ngohanyok anak ah mbak pios, ngandah norimak dolang ulun tiruh nuk lohpo ah, molayan ulun-ulun jok pocayak, dohop ulun-ulun jok jorak pahpak, khavun tuꞌuk-tuꞌuk nguan paring korejak jok pios.
11 Arak mondaftar ah dolang baluk jok honong bio jok umur ah jaham onom puluk toun. Kotului ngindoi arok huang doh kanik nyangit ngomosai, mahkak idoh ngomosai hinok khavun idoh ahkan tondok korejak mbak Kristus. 12 Mahkak idoh ahkan konohukum kotului nolingau janjik doh mbak Hotalak, yok erih janjik molayan Iyok. 13 Idoh halik jadik bokolas, doh ngindo ondo doh boluak nyolong noku lohpo ulun. Khavun jok holovik jaek hinok, yok erih idoh bolajar motenah ngaran ulun bohkon khavun ngurus komolum ulun bohkon jok iyam urusan aiu khavun ngesah paring aꞌang jok yam pahtut doh ngesah ah. 14 Kotului erih noh ahkuk kanik dolang baluk jok honong bio supayak doh ngomosai hinok, khavun doh ahkan nganak ngosilih khavun ngurus avun human doh kiyak, supayak dolang musuh tok iyam arok hocok ngonyaek ngaran tok. 15 Kotului arok dolang baluk jok honong bio jok was lajat ngohasuk Lacak paring otuk. 16 Tahpik ngindoi arok bavik ulun Kristen jok barih basak ah was jadik baluk, iyok alah dohop dolang baluk erih. Arak mosuah jomaat jok nongak ukus lanjak doh. Supayak jomaat touk dohop dolang baluk jok bohkon hinok jok yarok barih basak doh.
17 Dolang okon jok nguan korejak ah mbak pios, alah konolehkak lihpet duok, jok topahtuk ah idoh jok iyam bokolas marak Auh Hotalak khavun ngajar dolang jomaat. 18 Iyam leh nuk luvang Alkitab tonulih: “Sahpik jok nicak ngihik gandum supayak bijik gandum erih hobomilang mbak pahkau ah, arak nuhtup baun sahpik erih supayak iyok touk kumai bijik gandum erih.” Khavun tonulih kak: “Ulun jok korejak iyok pahtut ngonduon uhpah ah.” a 19 Arak nyonih ulun nondah aꞌang jok jaek mbak dolang okon mik, tahpik ngindoi arok duok toluk behtik ulun jok marak ah ngindoi okon mik erih salak, mahkak ihkok touk pocayak. b 20 Marak ah noh ahkan okon mik erih ngindoi idoh nguan dosa, idoh alah kongajar pomarak nuk husuk jomaat, supayak paring ulun mihkoh nguan kosalak kolo erih.
21 Nuk husuk Hotalak, Yesus Kristus, khavun dolang molekat jok konopilik-Ah, ahkuk nyavot ah tuꞌuk-tuꞌuk mbak ihkok supayak ihkok nguan inon jok pomarak kuk tuh ahkan paring ulun, khavun ihkok arak milik-milik idoh. 22 Arak murah bodoa ngahtang longom muk nihkas ah nuk isung kuhung ulun supayak ngahtang yok jadik polayan Hotalak. Ngindoi ulun erih bodosa, mahkak ihkok halik bodosa havoi mbak idoh. Jagak ah noh arop muk supayak ihkok iyam salak.
23 Timotius ihkok arak ngorih danum puhtik kiyak; tahpik ngorih ah noh nyohiyot danum anggur supayak ngopios oros butui muk, kotului ihkok bojoin poros. 24 Arok ulun jok dosa-dosa ah murah kihtan. Dosa doh motohtok ah ngindoi idoh ahkan konohukum. Totahpik dosa-dosa ulun jok bohkon ah ahkan kihtan nain nuk ondo jok bohkon ah hinok. 25 Koderih kak dolang tobiat jok pios ahkan pohos tonohtok, khavun tobiat jok pios jok iyam kihtan pun iyam taꞌai sonyuhuk tahik-tahik kak.