6
Ulun-ulun Kristen jok jadik jihpon, alah ngomok ngindoi dolang tuan doh pahtut konolehkak. Supayak ulun iyam ngohinak ngaran Hotalak khavun ajar barak tok. 2 Dolang jihpon jok tuan ah ulun Kristen, iyam taꞌai iyok ngopindak tuan ah kotului idoh havo-havoi ulun Kristen. Idoh alah molayan tuan doh erih holovik pios hinok, tului tuan jok konolayan mbak pios erih idoh havo-havoi ulun pocayak jok alah kongasih idoh.Ajar barak jok ngolanyat khavun ponahto jok hinut
Paring ajar barak ihtuh ihkok alah marak ah.
3 Iyai jok ngajar mbak ajar barak jok bohkon mbak ajar barak tok, khavun iyam norimak ajar barak jok hinut tahkan Tuhan tok Yesus Kristus, khavun iyam nai sotuju mbak ajar barak jok sosuai mbak agamak tok, 4 ulun erih arok noh ulun jok sahkah khavun iyam taꞌai paring aꞌang! Oros ah iyok noh baas hobatah khavun hotuhui mongenai rehti dolang auh jok nguan ulun ngomeluk, hobomilang, motenah, khavun mihkir aꞌang jok jaek mongenai ulun bohkon, 5 iyok nulo hobatah. Jalan pihkir ulun erih was bototuhtup khavun pihkir ah iyam nai hinut. Iyok pihkir ngindoi ngohasuk Hotalak touk nguan yok tahto.
6 Punak hinut ngindoi ihtok bolum nyembah Hotalak khavun ngomok cuhkup inon jok arok mbak ihtok, erih noh utung jok punak hajok ahkan tok. 7 Tului iyam arok icok pun jok ahkan onin tok noku luvang duniak ihtuh, khavun iyam arak icok pun jok touk tok ngoniu boluak! 8 Jadik, ngindoi arok ukun ponguman khavun hatik, erih was cuhkup noh. 9 Totahpik ulun jok kanik jadik tahto, idoh tokurung mbak kokanin doh jok malik macam jok ngonyaek arop doh. dolang kojolik doh erih noh jok nguan idoh lohpung khavun colahkak. 10 Kotului bokahuk mbak duit noh ngolohpung malik macam kojaek. Tului bokahuk mbak duit sohinggak arok tongai ulun nyipang tahkan inon jok was yok pocayak ah, khavun erih noh jok nguan kojorak ahkan doh.
Arok pirak aꞌang jok alah tonohouk
11 Timotius Hotalak noh jok tepun ihkok, jadik ngacuk ah noh arop muk tahkan paring aꞌang erih. Ihkok alah ngotiak jadik ulun jok hinut nuk mahtan Hotalak, khavun pahtuh mbak Hotalak, pocayak noh mbak Kristus, mongasihi havoi arop muk, sabar noh nuk luvang kojorak, khavun ihkok alah pios tuhtui auh muk. 12 Ngotiak ah noh kolo ulun jok lomba nokoruk iyok kanik ngonduon piala kohtihkak manang. Koderih kak ihkok alah ngotiak ah supayak ngonduon komolum jok hinut komolum jok yarok tihkas nyamah ah. Kotului erih noh Hotalak naꞌah ihkok beteng ihkok ngahkuk nuk husuk ulun arok ngindoi ihkok pocayak mbak Kristus. 13 Khavun huntuh, nuk husuk Hotalak jok nongak hasong ahkan paring aꞌang jok bolum, khavun nuk husuk Yesus Kristus jok nongak kosaksian jok tuꞌuk ahkan Pontius Pilatus, ahkuk nyavot ihtuh mbak ihkok: a 14 Pahtuh noh mbak paring poletah erih mbak ahtoi jok tuꞌuk-tuꞌuk khavun ahtoi jok borasih nyiring Tuhan tok Yesus Kristus lombut hinok. 15 Polombut-Ah tonetu Hotalak beteng was dahpot noh ohkot ah. Iyok Hotalak Ponguasak jok ico-icok ah kiyak; Iyok arok noh Lacak nuk isung paring lacak, khavun Tuhan nuk isung paring tuan. 16 Iyok kiyak jok bolum nyiring yarok tihkas nyamah ah. Iyok bolum nuk luvang tarang sohinggak iyam dahpat konoronik iyai pun. Iyam arok icok behtik kolunon pun jok pujik nohtok-Ah, khavun jok duon nohtok-Ah. Iyok konolehkak khavun bokuasak nyiring yarok tihkas nyamah ah! Amin.
17 Ahkan ulun-ulun jok tahto nuk duniak ihtuh, Timotius alah noh ihkok nyavot supayak idoh arak sahkah khavun arak harap mbak dolang koponahto jok touk ohpah. Totahpik idoh alah ngoharap Hotalak kiyak kotului Iyok jok nongak paring aꞌang jok yamios karoi ahkan tok mbak holovik holeak supayak tok ngomok ah. 18 Nyuhuk doh ngingat ah supayak motohtok kopios, tumbuk nguan paring aꞌang jok pios, idoh baas ngavat ulun khavun suhkak nongak narui ulun. 19 Mbak koderih doh nginak koponahto doh nuk surga ahkan arop doh noh. Sohinggak idoh ahkan ngonduon komolum jok yarok tihkas nyamah ah, yok erih komolum jok kotuui ah. 20 Inon jok was kuk pocayak ah kok nguai. Jagak ah noh kopocayak kuk erih mbak pios, Timotius! Ihkok alah ngomacuk arop muk tahkan pander kesah jok yarok gunai ah khavun hobatah mongenai “kopitar” sobenar ah kopitar doh arok noh kobaleh doh. 21 Tului arok dolang ulun jok marak ah ngindoi idoh tepun kopitar erih, sohinggak idoh nyipang tahkan dolang ajar barak Kristus jok idoh pocayak holuk.
Nihak ngindoi Hotalak ngomerkat dolang bari-basak basak.
Kai ngolehkak kam paring ah.
Tahkan ahkuk, Paulus.