Dolang guruk palsu
4
Roh Hotalak tuꞌuk-tuꞌuk marak ah ngindoi ondo-ondo jok ahkan lombut, arok tongai ulun jok ahkan nohtah kopocayak ah mbak Yesus. Idoh pahtuh mbak roh-roh jaek jok suhkak ngolanyat ulun, khavun ngohasuk ajar barak paring otuk erih. 2 Ajar barak erih kongesah nyihing ulun-ulun jok bobalik, idoh purak-purak pios. Ahtoi pihkir ulun-ulun erih was pindong sohinggak iyam taꞌai aꞌang jok hinut mbak jok salak. 3 Idoh bajak ulun ngavuk khavun bajak ulun kuman ukun ponguman jok sobenar ah touk ulun kumai. Podahal dolang ukun ponguman erih tonaoi Hotalak ahkan ukun, ulun-ulun jok pocayak mbak Kristus jok was nyonih ajar barak jok hinut erih, idoh bosukur noku Hotalak mongenai ukun ponguman erih. 4 Paring aꞌang jok tonaoi Hotalak erih pios, khavun yarok ukun ponguman jok yam taꞌai tok kumai ngindoi ihtok kumai ah tahtup tok bosukur noku Hotalak. 5 Paring aꞌang erih kudus tului Auh Hotalak khavun doa.Ulun jok pahtut molayan Kristus
6 Ngindoi ihkok ngajar marak dolang barih basak muk jok pocayak mongenai paring aꞌang erih, mahkak ihkok ahkan jadik polayan Kristus jok korejak mbak pios. Polayan Kristus jok pios alah mahi-mahik borohon kopocayak ah kotului kongajar mbak ajar barak jok hinut, kolo jok uwas kongohasuk muk kotahin tuh. 7 Arak donik mbak dolang kolimoi jok yarok gunai ah. Ihkok alah ngalai arop muk bolum ngosenang ahtoi Hotalak. 8 Kotului ngolatih behtim muk nyohiot kiyak gunai, totahpik ngolatih arop muk sombayang tumbuk gunai ah, tului arok suang janjik mongenai komolum jok huntuh khavun komolum jok ahkan lombut. 9 Paring ah erih hinut khavun pahtut tonorimak uras. 10 Kotului erih noh ihtok ngotiak korejak hondo ngolomik, kotului ihtok harap mbak Hotalak jok bolum kiyak. Iyok noh jok nyolamat paring ulun, jok punak peting ulun-ulun jok pocayak.
11 Ngajar ah noh paring aꞌang erih khavun nyuhuk ah noh dolang ulun numui ah. 12 Arak sapai icok behtik pun marak ihkok baleh tului ihkok bio. Totahpik ihkok alah jadik toladan ahkan ulun-ulun jok pocayak nuk luvang tuhtui auh muk, nuk luvang tobiat muk, nuk luvang ihkok mongasihi ulun bohkon, nuk luvang kopocayak muk mbak Kristus, khavun nuk luvang komolum muk jok kudus. 13 Lambak erih, nyiring ahkuk lombut nain, ihkok alah tuꞌuk-tuꞌuk ngomasak Alkitab ahkan ulun arok, ihkok alah ngihit khavun ngajar marak doh. 14 Arak bokolas hapan karunia jok ongak Roh Hotalak ahkam muk, beteng dolang pomipin jomaat nihkas longon doh isung kuhung muk, khavun beteng dolang nabik marak tanjik Hotalak mongenai arop muk. 15 Ngorejak ah noh paring ah erih tuꞌuk-tuꞌuk supayak paring ulun nohtok makin segah polayanan muk. 16 Touk-touk noh ihkok nuk luvang komolum muk khavun noliti noh ajar barak muk. Sotia noh nguan paring aꞌang erih, kotului erih noh ihkok ahkan nyolamat arop muk khavun nyolamat idoh jok nyonih dolang ajar barak muk erih.