Sarat jadik pomipin nuk luvang gereja
3
Punak tuꞌuk noh auh tuh: “Ulun jok ahkan jadik okon nuk luvang gereja, iyok milik nguan korejak jok punak bolehkak.” 2 Kotului erih okon nuk gereja alah ulun jok iyam alik buah kouh tahkih, iyok alah icok kiyak oruh ah, touk nahan arop ah tahkan aꞌang jok jaek, horahtik khavun pios tobiat ah; iyok suhkak norimak ulun mocon nuk lohpo ah, khavun iyok touk ngajar ulun; a 3 iyam baas buso, iyam baas birat totahpik molomuk tuhtui auh ah, khavun iyok hokopios mbak paring ulun. Iyok iyam bokahuk mbak duit. 4 Iyok alah touk ngahtur avui humai ah mbak pios, khavun ngajar marak dolang anak ah sohingga doh pahtuh khavun ngolehkak ah. 5 Ngindoi ulun jok yam taꞌai ngahtur avui humai ah, bohkolo iyok touk ngahtur ulun-ulun jok pocayak mbak Hotalak? 6 Ulun jok jadik okon nuk luvang gereja arak ulun jok punai ah pocayak, kotului nain iyok touk ngohanyok arop ah. Ngindoi iyok ngohanyok arop ah mahkak Hotalak ahkan ngohukum iyok kolo Hotalak ngohukum Lacak paring otuk lomoi. 7 Iyok alah noh ulun jok ngarai ah pios nuk husuk ulun-ulun jok jaham pocayak; kotului ngindoi iyam koderih, iyok ahkan konohina ulun sohinggak botahas noku luvang tihpuk Lacak paring otuk.Sarat jadik polayan jomaat
8 Dolang polayan jomaat iyok alah ulun jok tobiat ah pios khavun mbak kotuui ahtoi ah; iyam bokahuk mbak duit khavun iyam baas ngorih dolang arak boram jok moharik. 9 Idoh alah borohon mbak ajar barak jok hinut jok tonongak Hotalak ahkan tok, khavun tuꞌuk-tuꞌuk bolum mbak ahtoi pihkir jok borasih. 10 Idoh alah tonoliti holuk, khavun ngindoi idoh iyam alik buah kouh tahkih, mahkak idoh touk molayan nuk luvang jomaat. 11 Oruh doh pun alah noh ulun jok konolehkak, iyam bavik jok baas nuhtui ngunuk ulun bohkon. Idoh alah touk nahan arop doh khavun touk ponocayak nuk luvang paring aꞌang. 12 Polayan jomaat iyok alah icok kiyak oruh ah, iyok alah touk ngahtur avui humai ah khavun touk ngahtur dolang anak silih ah mbak pios. 13 Ulun-ulun jok molayan mbak pios nuk luvang jomaat, iyok ahkan konolehkak khavun jadik mahik bohanyik bokesah ahkan ulun bohkon mongenai kopocayak ah mbak Kristus.
Tarung kosolamatan jok ponokarah ahkan tok
14 Ahkuk boharap pohos tobarung mbak ihkok. Oluk poh koderih, huntuh ahkuk nulih surat ihtuh ahkam muk. 15 Supayak ngindoi ahkuk iyam pohos lombut, ihkam was taꞌai bokolo tok alah bolum sobagai koluarga Hotalak, iyok erih jomaat Hotalak jok bolum. Jomaat Hotalak kolo lovun jok tepun johik jok borohon. Mbak koderih jomaat Hotalak alah namit ajar barak jok hinut. 16 Ihtok taꞌai ngindoi holuk ajar barak tahkan Hotalak erih sonyuhuk totahpik huntuh was ponokarah-Ah ahkan tok, tului ajar barak erih hinut:
Yesus Kristus mokarah arop ah jadik kolunon,
Roh Hotalak motohtok ah Iyok hinut,
khavun tonohtok dolang molekat.
Tarung ah konihan nuk holang bangsak-bangsak jok iyam ngenal Hotalak,
paring ulun nuk duniak pocayak mbak Iyok
khavun Iyok kongahtang noku surga luvang komuliaan.