Mongenai doa ulun jok pocayak
2
Topahtuk ah ahkuk ngajar kok supayak ihkok ngajar marak dolang jomaat, ahkan doh bodoa marak dolang kopoduluk doh noku Hotalak, supayak doh bosukur ahkan paring ulun. Bodoa kak supayak Hotalak nyodiak dolang kopoduluk ulun arok, 2 ahkan dolang lacak khavun paring ulun jok bokuasak. Ahkuk nyavot paring erih supayak tok touk bolum linuh khavun hokopios icok mbak jok bohkon, supayak ihtok touk tuꞌuk-tuꞌuk ngolehkak Hotalak mbak tobiat tok jok pios. 3 Doa jok kolo erih noh jok pios khavun jok ngosenang ahtoi Hotalak, Ponyolamat tok. 4 Iyok kanik supayak paring ulun sonyolamat khavun taan doh paring aꞌang jok hinut mongenai Hotalak. 5 Hotalak icok kiyak khavun tihkas icok kiyak jok touk nguan kolunon tonorimak Hotalak, yok erih Yesus Kristus jok was jadik kolunon. 6 Iyok uwas nyerah arop Ah ahkan molahpas ulun-ulun tahkan paring dosa doh. Mbak koderih Hotalak motohtok ngindoi Iyok kanik paring ulun sonyolamat, kohtihkak uwas ohkot Ah. 7 Khavun kotului erih noh ahkuk konopilik Hotalak jadik rasul khavun ahkan ngesah Tarung Pios noku ulun jok iyam ulun Yahudi ahkan marak doh ajar barak mongenai kopocayak jok hinut. Korejak kuk sobagai guruk ahkan ulun jok iyam ulun Yahudi, erih tuꞌuk ahkuk iyam bobalik. aTobiat ulun bahkas khavun ulun bavik nuk luvang jomaat
8 Kotului erih ahkuk kanik supayak nuk amoh pun ulun bahkas bodoa. Idoh alah bolum nyembah Hotalak khavun bodoa mbak longok khavun ahtoi jok borasih idoh iyam birat, iyam hobatah hojeleh icok mbak jok bohkon.
9 Koderih kak ahkuk kanik supayak paring bavik jok pocayak idoh alah mokajan arop doh sopahtut ah kiyak, idoh alah hatin hatik jok sopan. Balo ah arak pomihkot malik macam, arak hatin bulo leai jok dalo holovik kolo dolang lasung kukung bulo ngindoi iyam mutiara, khavun arak hatin hatik jok bolehkak. b 10 Totahpik e rih noh jok sopahtut ah ahkan paring bavik jok nyembah Hotalak idoh alah mokajan arop doh mbak tobiat pios. 11 Dolang bavik alah bolajar nyonih mbak tonih khavun norimak ajar barak erih mbak pahtuh. 12 Ahkuk iyam mosuah bavik ngajar marak khavun idoh iyam taꞌai moletah bahkas, alah noh idoh tonih-tonih kiyak. 13 Kotului jok topahtuk tonapak arok noh Adam khavun ulik erih Hawa. c 14 Mahik hinok iyam Adam jok tonihpuk totahpik Hawa noh sohinggak iyok iyam ngohasuk poletah Hotalak. d 15 Totahpik bavik ahkan sonyolamat tului iyok dimbit anak ah, iyok alah mongasihi khavun tuꞌuk-tuꞌuk pocayak mbak Kristus, mongasihi ulun bohkon khavun komolum ah ongak ah noku Hotalak kiyak.