SURAT PAULUS JOK TOPAHTUK
AHKAN
TIMOTIUS
Salam
1
Tahkan ahkuk Paulus, jok jadik rasul Kristus Yesus kotului poletah Hotalak Ponyolamat tok, khavun poletah Kristus Yesus jok umbak Iyok kiyak ihtok boharap. a 2 Ahkam muk Timotius ihkok onik kuk jadik anak kuk tului ihtok havoi pocayak mbak Kristus.Nihak ngindoi Hotalak Amai khavun Kristus Yesus Tuhan tok nongak kopion ahtoi Ah jok punak hajok, pongavat khavun damai sojahtera tahkan Iyok nulo umbak ihkok.
Mongenai ajar barak jok lajat
3 Kotihkak ahkuk kanik nurus ponyalak kuk noku kota bohkon nuk daerah Makedonia, ahkuk nyuhuk kam supayak ihkok tehtap mocon nuk Epesus. Nuk anai arok ulun-ulun jok narung ajar barak jok iyam hinut. Mocon noh nuk anai nyuhuk ah noh idoh supayak idoh tondok narung ajar barak erih. 4 Marak ahkan doh supayak idoh arak kalut mbak kolimoi jok iyam arok gunai ah khavun dolang kesah uhtus koturun jok iyam arok pongohpah ah. Kotului paring ah erih ngolopung batah jeleh kiyak, khavun iyam dohop ulun nguan evak Hotalak jok nyolamat kolunon tului pocayak mbak Iyok kiyak. 5 Ajar barak erih kongesah supayak idoh havo-havoi mongasihi icok mbak jok bohkon, yok erih kasih jok lopung tahkan ahtoi jok borasih, ahtoi pihkir jok morong, khavun tuꞌuk-tuꞌuk pocayak mbak Kristus. 6 Tahpik arok tongai ulun jok iyam bolum numun erih hinok, khavun idoh lajat mbak batah jeleh jok yarok gunai ah. 7 Idoh kanik ulun bohkon taꞌai ngindoi idoh guruk agamak. Oluk poh idoh iyam ngorehti inon jok kongajar ah, totahpik idoh ngomok yakin inon jok kongajar doh hinut.
8 Ihtok taꞌai ngindoi hukum Taurat erih pios, ngindoi ponogunak mbak hinut. 9 Punak alah tonohouk ngindoi hukum erih konguan iyam ahkan ulun jok pios, totahpik ahkan dolang ulun jok iyam kanik pahtuh mbak hukum erih, dolang ulun jaek, ulun jok pihkir jaek, mbak ulun-ulun jok bodosa, ulun jok yam arok agamak ah, ulun duniak, paring ulun jok munuk, holovik hinok ulun jok munuk amai khavun inai ah, 10 ahkan ulun jok horuh mbak ulun jok iyam oruh ah, bahkas horuh mbak bahkas, jok nahko kolunon, jok bobalik; khavun ulun jok unuk pongadilan bobalik ngesah paring aꞌang jok iyam hinut khavun iyai kiyak jok nguan paring aꞌang jok hokolavan mbak ajar barak jok hinut. 11 Ajar barak erih arok nuk luvang Tarung Pios jok sonyuhuk Hotalak ahkak kuk ngesah ah, yok erih Tarung Pios jok tahkan Hotalak jok bokuasak khavun jok pahtut tok nyembah Ah.
Bosukur tului kopion ahtoi Hotalak
12 Ahkuk bosukur noku Tuhan tok Kristus Yesus jok nulo nongak komuhat noku ahkuk. Ahkuk halik bosukur noku Iyok jok nohtok ahkuk sobagai ulun jok sotia sohinggak Iyok nongak kopocayak ahkak kuk nguan polayanan ihtuh. 13 Oluk poh holuk ahkuk suhkak ngonjaek ngarai Ah, monyorak Yok khavun ngohinak Iyok, totahpik Hotalak masik mbak ahkuk. Kotului beteng hun erih ahkuk jaham pocayak, jadik ahkuk yam taak inon jok konguak kuk. b 14 Holovik hinok ahkuk ngonduon kopion ahtoi Hotalak jok punak hajok. Iyok nongak ahkak kuk komuhat supayak ahkuk pocayak mbak Iyok khavun mongasihi paring kolunon. Komuhat erih tongak noku ihtok paring ah jok was hicok mbak Kristus Yesus. 15 Ihtok was bojoin nyonih auh tuh: “Kristus Yesus uwas lombut noku duniak ihtuh ahkan nyolamat ulun jok bodosa.” Ihkam alah norimak ah khavun tuꞌuk-tuꞌuk pocayak mbak ah. Khavun tahkan holang paring ulun jok bodosa, ahkuk noh jok punak jaek. 16 Totahpik kotului erih noh Kristus Yesus mokarah kosabar Ah jok punak hajok mbak ahkuk, Iyok masik mbak ulun jok punak jaek ihtuh. Iyok nguan aꞌang erih supayak paring ulun nohtok bokolo ko sabar Ah mbak ahkuk, sohinggak idoh jadik pocayak mbak Iyok khavun ngonduon komolum jok yarok tihkas nyamah ah. 17 Konolehkak noh khavun kongisung noh Hotalak jok yarok tihkas nyamah ah, jok iyam taan tok nohtok ah, khavun Iyok tihkas icok kiyak. Hotalak noh Lacak jok yarok pongohpah ah.
Paulus ngajar marak Timotius supayak iyok sotia
18 Timotius, anak kuk! Korejak ihtuh tonongak kuk ahkam muk numun tanjik Hotalak jok pomarak dolang nabik mongenai ihkok. Nohouk ah noh tanjik erih supayak luvang polayanan muk, ihkok touk ngotiak ah ahkai pios. 19 Tului erih, ihkok alah tuꞌuk-tuꞌuk borohon nuk luvang iman muk khavun ihkok alah tepun ahtoi pihkir jok borasih. Arak noh kolo pirak behtik ulun jok iyam nai kanik ngohasuk ahtoi pihkir doh jok pios sohinggak idoh iyam nai pocayak mbak Kristus. 20 Tahkan holang idoh erih iyok noh Himeneus khavun Aleksander. Dorok uwas ponosuah kuk jorak ngohasuk Lacak paring otuk, supayak dorok botobat khavun iyam nai ngolavan Hotalak.