Kojaek kolunon sojaham polombut Yesus
2
Huntuh kuk kanik ngesah ah mongenai polombut Tuhan tok Yesus Kristus khavun bohkolo Iyok ahkan ngupur ihtok mocon hicok humbak mbak Iyok. Ahkuk tuꞌuk-tuꞌuk nyavot mbak ihkam, a 2 ihkam arak pohos liduk pahuk khavun pusong kotihkak ihkam nyonih tarung mongenai ondo polombut Tuhan Yesus jok uwas dahpot noh ondo ah. Anggar ah tarung erih kam nyonih tahkan tanjik ngindoi iyam ajar barak, arok kak ulun jok marak ahkan mik ngindoi ihkai alik tonulih mongenai tarung erih nuk icok surat kai. 3 Bokolo pun arak sapai ihkam tonihpuk ulun, kotului sojaham ondo polombut Tuhan erih paring aꞌang ihtuh ahkan torjadik: Ahkan lombut ondo ah tumbuk ulun ahkan ngolavan Hotalak, khavun Kolunon jok Jaek Ahtoi ah iyok ahkan mokarah arop ah, iyok was tonetu konolohpung nuk luvang noraka. 4 Iyok ahkan ngolavan Hotalak khavun ngisung arop ah punak isung tahkan paring aꞌang jok sonyembah kolunon khavun paring aꞌang jok sonyembah sobagai Hotalak. Holovik hinok iyok tuot nuk Lovun Hotalak khavun ngahkuk ngindoi arop ah Hotalak jok alah sonyembah. b5 Nohouk ah nai ahkuk alik marak paring ah erih beteng hun ahkuk honong hicok humbak ihkam. 6 Huntuh ihkam taꞌai inon jok nahan Kolunon jok Jaek Ahtoi ah supayak iyok iyam lombut. Iyok iyam ahkan ponosuah marah nyiring kotihkak jok uwas tonetu Hotalak. 7 Komuhat kojaek was topahtuk korejak ah mocuhuk-mocuhuk, totahpik honong tonahan. Nain ngindoi jok nahan erih was umbot sonyarok, 8 mahkak khitan noh Kolunon jok Jaek Ahtoi ah erih. Totahpik Tuhan Yesus ahkan munuk Kolunon jok Jaek Ahtoi ah erih umbak hasong-Ah khavun ngolohpung iyok mbak kolondang kolosah-Ah kotihkak Iyok lombut. c 9 Polombut Kolunon jok Jaek Ahtoi ah erih ahkan marah umbak kuasak jok hajok tahkan Lacak paring otuk. Iyok ahkan nguan paring aꞌang jok motaher khavun paring tandak aꞌang jok yamios umbak tumbuk tihpui ah. d 10 Umbak dolang tihpui ah jok jaek iyok ngolanyat ulun-ulun jok ahkan ngolohpung. Idoh ahkan konolohpung kotului idoh ngomelek khavun iyam suhkak umbak tarung jok hinut tahkan Hotalak jok touk nyolamat doh. 11 Kotului erih noh Hotalak mosuah idoh lajat supayak idoh pocayak mbak inon jok iyam hinut. 12 Mahkak paring ulun jok suhkak nguan dosa khavui iyam pocayak aꞌang jok hinut idoh ahkan konohukum.
Konopilik ahkan sonyolamat
13 Bari-basak jok kongasik Tuhan, ihkai alah nulo bosukur umbak Hotalak tului ihkam. Kotului Hotalak tahkan topahtuk ah was ngopilik ihkam jadik ulun-ulun jok ahkan sonyolamat. Aꞌang erih torjadik tului inon jok konguan Roh Hotalak ahkam muk supayak jadik ulun-ulun jok suci jok Iyok tepui khavun tului ihkam pocayak mbak tarung jok hinut tahkan Hotalak. 14 Hotalak naꞌah ihkam supayak ngonduon kosolamatan erih nyihing Tarung Pios jok kongesah ahkan mik, sohinggak ihkam touk ngonduon komuliaan Yesus Kristus, Tuhan tok. 15 Kotului erih dolang bari-basak tombok noh umbak borohon khavun namit ah nulo noh ajar barak jok umbot kai nongak ah ahkan mik, iyok erih ajar barak jok tonulih khavun jok kongesah kai.
16-17 Nihak ngindoi Tuhan tok Yesus Kristus bongoi, khavun Hotalak Amai tok nguan ahtoi kam ngandah khavun ngorohon ihkam supayak kam duon nguan inon jok pios. Kotului Hotalak mongasihi ihtok, khavun nyihing kopion ahtoi-Ah, Iyok nguan ihtok tehtap borohon khavui ngoharap aꞌang jok pios.