Bodoa khavun korejak
3
Bari-basak pongopah kesah kuk, ahkuk nyavot bodoa noh ahkan kai supayak tarung jok tahkan Tuhan touk pohos konihan khavun tonorimak ulun mbak pios, havoi kolo jok umbot torjadik ahkan mik lomoi. 2 Khavun bodoa kak supayak Hotalak nyolamat ihkai tahkan ulun-ulun jok punak jaek. Kotului iyam paring ulun jok nyonih tarung tahkan Hotalak idoh ahkan jadik pocayak.3 Totahpik Tuhan sotia. Iyok ahkan nongak komuhat khavun ngolindung ihkam tahkan aꞌang jok jaek. 4 Tuhan noh jok nguan ihkai tuꞌuk-tuꞌuk pocayak ngindoi ihkam honong nguan inon jok ponoletah kai khavun ihkam ahkan nguai ah nulo nyiring havun.
5 Ihkai bodoa nihak ngindoi Tuhan ngavat ihkam supayak ngorehti ngindoi Hotalak mongasihi ihkam khavun ihkam nohouk ah bohkolo Kristus tehtap borohon nuk luvang kojorak-Ah.
Paring ulun alah korejak
6 Barih basak, ihkai moletah kam nuk luvang kuasak Tuhan Yesus Kristus, supayak ihkam iyam hicok humbak umbak ulun pocayak jok bokolas khavun jok iyam pahtuh mbak ajar barak jok was tonorimak tahkan ihkai. 7 Ihkam taꞌai ngindoi ihkam alah numun inon jok konguan kai. Ihkai iyam bokolas beteng kai hicok humbak umbak ihkam. 8 Ihkai iyam kuman ukun ponguman ulun bohkon koderih kiyak totahpik ihkai bayar ah, ihkai korejak mahto-mahtoi hondo ngolomik supayak iyam ngorepot iyai-iyai pun tahkan holang kam. 9 Jok kotuꞌui ah iyam salak ngindoi ihkai nyavot kavat mbak ihkam, totahpik ihkai kanik supayak inon jok uwas konguan kai ahkan mik numui ah kolo erih kak. 10 Beteng hun ihkai honong mocon hicok humbak mbak ihkam, ihkai nguan icok poletah: Ulun jok iyam kanik korejak, iyam taꞌai kuman.
11 Ihkai marak kolo ihtuh kotului ihkai nyonih arok ulun-ulun unuk holang ihkam idoh bolum nguan kolas ah kiak. Idoh iyam kanik korejak inon pun totahpik idoh kalut umbak komolum ulun bohkon. 12 Mbak kuasak Tuhan Yesus Kristus ihkai moletah ulun-ulun erih khavun ngingat doh supayak doh bolum umbak pios sohinggak touk korejak ngurah ukun ponguman doh.
13 Totahpik ihkam alah nulo nguan aꞌang jok pios. 14 Ngindoi nain arok ulun jok iyam kanik ngohasuk inon jok tonulih ihkai unuk luvang surat ihtuh, bojaga-jagak noh umbak ulun jok kolo erih khavun arak hojolahan umbak idoh supayak iyok miak. 15 Tahpik arak noh nguan iyok kolo musuh, ngajar marak ah noh iyok kolo ihkok ngajar marak bari-basak muk.
Pongohpah auh
16 Ihkai bodoa noku Tuhan jok tepun damai sojahtera supayak Iyok nulo nongak ahkam muk damai sojahtera luvang paring aꞌang. Nihak ngindoi Tuhan tok Yesus havo-havoi mbak ihkam paring ah.
17 Salam tahkan ahkuk Paulus, ahkuk noh jok nehken salam ihtuh. Kolihtuh noh tulih kuk ihtuh noh tandak ah tahkan paring surat jok tonulih kuk.
18 Nihak ngindoi Tuhan tok Yesus Kristus, mokarah kopion ahtoi jok punak hajok ahkan paring bari-basak basak.