SURAT PAULUS JOK KODUOK
AHKAN JOMAAT NUK
TESALONIKA
Salam
1
Surat ihtuh tahkan Paulus, Silwanus khavun Timotius ahkan ulun-ulun jok pocayak nuk Tesalonika, jok hicok mbak Hotalak Amai tok khavun Tuhan Yesus Kristus. a 2 Ihkai bodoa nihak ndoi Hotalak Amai khavun Tuhan Yesus Kristus mokarah kopion ahtoi jok punak hajok khavun nongak ihkam damai sojahtera.Bosukur khavun bodoa
3 Bari-basak kuk, ihkai harus nulo bosukur umbak Hotalak kotului ihkam. Ihkai pahtut nguan erih kotului ihkam mahi-mahik kopocayak mbak Kristus khavun mahi-mahik mongasihi icok mbak jok bohkon. 4 Kotului erih nuk husuk dolang jomaat Hotalak nuk daerah jok bohkon, ihkai ngandah ngesah bohkolo ihkam tehtap borohon luvang kopocayak mik mbak Kristus beteng kam ngomok pononyorak khavun jorak.
5 Was nyahtak ngindoi Hotalak Hakim jok adil. Ihkam was jorak kotului Korajaan Hotalak, khavun kotului erih noh Iyok mokarah ihkam pahtut nyolong noku luvang Korajaan-Ah 6 Iyok ahkan nguan inon jok adil, khavun ahkan malos kojorak mik mbak ulun jok was nguan ihkam jorak. 7 Hotalak ahkan nongak konihak ahkam muk jok pononyorak khavun ahkan kai kak, beteng ondo Tuhan Yesus lombut tahkan surga motohtok arop-Ah havo-havoi mbak dolang molekat-Ah jok punak bokuasak. 8 Iyok ahkan lombut mbak ahpui jok ngonyelak ngonyehau ahkan ngohukum ulun-ulun jok iyam podulik mbak Hotalak khavun jok iyam kanik bolum sosuai mbak Tarung Pios mongenai Tuhan tok, Yesus. 9 Ulun-ulun erih ahkan konohukum nyiring lohpung yarok tihkas nyamah ah, idoh ahkan kongindo tahkan husuk Tuhan khavun iyam taꞌai nai ngomok kuasak-Ah jok hajok.b 10 Paring ah erih ahkan torjadik beteng hondo Tuhan lombut nain, ulun-ulun jok Iyok tepui ahkan ngisung khavun nyembah yok, khavun Iyok ahkan konolehkak paring ulun jok pocayak. Ihkam pun ahkan arok nuk holang ulun-ulun erih, kotului ihkam was pocayak kesah jok pomarak kai ahkan mik.
11 Kotului erih noh ihkai nulo bodoa ahkan mik supayak Hotalak nguan ihkam pahtut bolum kolo jok kokaniu-Ah; kotului erih noh Hotalak naꞌah ihkam. Anggar ah Hotalak mbak kuasak-Ah ngavat ihkam nguan kokanin mik jok pios, khavun nyuhkup paring korejak jok konguan mik kotului pocayak mbak Kristus. 12 Umbak erih Tuhan tok Yesus kongisung nyihing ihkam, khavun ihkam halik kongisung Yesus kotului kopion ahtoi Hotalak tok khavun Tuhan Yesus Kristus.