Kyala ikʉtuufigwa kʉ mbombo syake
111
Muntuufyege ɄNTWA!Ngʉntuufyaga ɄNTWA nɨ ndumbula jangʉ joosa,
pabʉjo ʉbʉ babʉngeene abagolofu.
2 Ɨmbombo sya NTWA ngʉlʉmba,
boosa aba biikyeliile nasyo bikʉsiinogona.
3 Ɨmbombo syake siiswile ʉlwɨmɨko nʉ bʉsisya,
ʉbʉgolofu bwake bʉtikʉmalɨka sikʉ.
4 Asipelile ʉkʉkʉmbʉkigwa ɨmbombo syake ɨsisya,
ɄNTWA gwa kɨsa ni ipyana.
5 Ikʉbapa ɨfindʉ aba bikʉntiila,
ikʉlʉkʉmbʉka ʉlwitɨkano lwake bwila na bwila.
6 Abanangiisye abandʉ baake amaka gaa mbombo syake,
ʉkʉbapa ɨfiisʉ ɨfya bandʉ abangɨ ʉkʉja bʉjo bwabo.
7 Ɨmbombo sya maboko gaake ngolofu kangɨ sikʉsʉʉbɨligwa,
syosa ɨsi ikʉlagɨla sya bwanalooli.
8 Sikʉjako bwila na bwila,
sibombiigwe mbwanalooli na mbʉgolofu.
9 Aabapokile abandʉ baake,
aalagiile ʉlwitɨkano lwake ʉkʉtɨ lʉjege lwa bwila na bwila,
ɨngamu jaake nyiikemo kangɨ sisya.
10 Ʉkʉntiila ɄNTWA bo bwandɨlo bwa mahala,
boosa aba bikʉsikonga ɨndagɨlo syake balɨ na mahala,
ɨnduufyo syake sya bwila na bwila.