Kyala jo Malafyale ʉNkʉlʉmba
99
ɄNTWA jo Malafyale,abandʉ boosa bikʉtetema.
Atʉʉgeele pamwanya pa baakelubu,a
ɨkiisʉ kikʉsenyendeka.
2 ɄNTWA jo nkʉlʉmba pa kyamba Syoni,
afumwike kʉ fikolo fyosa ɨfya bandʉ.
3 Boosa bajɨtuufyege ɨngamu jaake ɨngʉlʉmba, ɨndiiligwa,
ʉmwene Mwikemo.
4 Gwe Malafyale gwɨtʉ, ʉlɨ na maka,
ʉsiganile ɨsya bwanalooli.
Jo ʉgwe ʉbʉkoleeliile ʉbwanalooli,
ʉbombile kʉ bʉgolofu kʉ baa ndʉjungu lwa Jaakobo.
5 Mumpaalege ɄNTWA, Kyala gwɨtʉ,
mubungulukege nkyeni mmyake,
ʉmwene Mwikemo.
6 Moose na Aaloni baalɨ bamo mbapuuti baake,
na Samweli aalɨ jo jʉmo ndɨ aba biipuutaga kʉmyake.
Bankoolelaga ɄNTWA, aabaamulaga.
7 Aajobaga nabo mu mbanda ɨjaa ibɨngo,b
baasikolile ɨngomeelesyo nɨ ndagɨlo ɨsi aabapeele.
8 Gwe NTWA, Kyala gwɨtʉ, jo ʉgwe gwabaamulaga,
gwalɨ gwe Kyala gwa kʉhobokela,
na paapo gwabafundaga abandʉ baako,
kʉ mbombo syabo ɨmbiibi.
9 Mumpaalege ɄNTWA Kyala gwɨtʉ,
mwipuutege pa kyamba kyake ɨkiikemo,
ɄNTWA Kyala, Kyala gwɨtʉ, Mwikemo.